ខេត្តប៉ៃលិន៖ ស្លាកសញ្ញាសុវត្ថិភាព ឬស្ទីកគ័រ ចំណាំងផ្លាត សម្រាប់បងប្អូនប្រជាពលរដ្ឋ ដែលធ្វើដំណើរពេលយប់ ចំនួន៣៦៩សន្លឹក ត្រូវបានលោក កើត សុធា អភិបាលនៃគណៈអភិបាលខេត្តប៉ៃលិន និង លោក ឌិន គឹម ប្រធានមន្ទីរសាធារណៈការ និងដឹកជញ្ជូនខេត្តប៉ៃលិន ព្រមទាំងអាជ្ញាធរស្រុក ឃុំ រួមនិងមន្ត្រីជំនាញ បានចុះបិទ និងចែកជូនដល់បងប្អូនប្រជាពលរដ្ឋ ដែលមានរថយន្ដកែឆ្នៃ គោយន្ដ នៅក្នុងឃុំស្ទឹងត្រង់ ។
កម្មវិធីចុះបិទស្លាកសញ្ញាសុវត្ថិភាព ឬស្ទីកគ័រ ចំណាំងផ្លាត ប្រព្រឹត្តទៅនៅព្រឹកថ្ងៃទី២៩ ខែសីហា ឆ្នាំ២០១៦ ស្ថិតក្នុងឃុំស្ទឹងត្រង់ ស្រុកសាលាក្រៅ ខេត្តប៉ៃលិន ដែលមាន រថយន្ដកែឆ្នៃ គោយន្ដ ប្រមាណជាង១០០គ្រឿង ។
លោក ឌិន គឹម ប្រធានមន្ទីរសាធារណៈការ និងដឹកជញ្ជូនខេត្តប៉ៃលិន បានឲ្យដឹងថា៖ សម្រាប់ខេត្តប៉ៃលិន គឺទទួលបាន «ស្ទីកគ័រ» ចំណាំងផ្លាតនេះ ពីលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ដើម្បីប្រគល់ជូនមកឲ្យខេត្ត ចុះចែកចាយ និងបិទជូនប្រជាពលរដ្ឋ ដែលមានរថយន្តកែច្ឆៃ គោយន្ត ពុំទាន់មានស្លាកសញ្ញាត្រឹមត្រូវ ។
លោក បានបន្តទៀតថា៖ ការបិទ «ស្ទីកគ័រ» នេះក្នុងគោលបំណង ដើម្បីកាត់បន្ថយគ្រោះថ្នាក់ចរាចរផ្លូវគោក បន្ថែមទៀត ដើម្បីពង្រឹងការគោរពច្បាប់ចរាចរ ដល់ប្រជាពលរដ្ឋ ដែលជាអ្នកប្រើប្រាស់ផ្លូវថ្នល់ទូទាំងខេត្តប៉ៃលិនតែម្តង ។ដោយឡែកថ្ងៃនេះ យើងចុះអនុវត្តន៍នៅក្នុងឃុំស្ទឹងត្រង់ ហើយនិងបន្តទៅឃុំ/សង្កាត់ផ្សេងៗទៀត នៅទូទាំងខេត្តប៉ៃលិនតែម្តង ។
ក្នុងពិធីចុះចែកនោះដែរ លោក កើត សុធា អភិបាលខេត្តប៉ៃលិន បានលើកឡើងថា៖ថ្ងៃនេះទូទាំងឃុំស្ទឹងត្រង់ យើងបើកយុទ្ធនាការ បិទ «ស្ទីកគ័រ» ដែលស្ទីកគ័រនេះ យើងទទួលបានពីលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ដើម្បីបិទលើយានជំនិះណា ដែលមិនទាន់មានសញ្ញាចរាចរត្រឹមត្រូវ ពិសេសលើរថយន្តកែច្ឆៃ គោយន្ដ ដែលអត់មានភ្លើងនៅពីក្រោយ ផងដែរ ។ លោកមានប្រសាសន៍បន្តថា៖ សកម្មភាពនេះ យើងនៅតែបន្តឲ្យមន្ត្រីជំនាញ និងស្ថាប័នពាក់ព័ន្ធ បន្តអប់រំ ផ្សព្វផ្សាយ ពីច្បាប់ចរាចរផ្លូវគោក ពិសេសការបំពាក់ភ្លើងបំភ្លឺ និងចំណាំងផ្លាត នៅលើយានយន្ដ និងទោចក្រក្រយានយន្ដគ្រប់ប្រភេទ ដើម្បីធានាឲ្យបាននូវការកាត់បន្ថយគ្រោះថ្នាក់នានា ដែលបណ្ដាលមកពីគ្រោះថ្នាក់ចរាចរ នៅលើផ្លូវជាតិ និងផ្លូវថ្នល់នានា ។ លោកក៏បានបញ្ជាក់បន្ថែមថា ការចុះបិទស្លាកសញ្ញាសុវត្ថិភាព ឬស្ទីកគ័រ ចំណាំងផ្លាត នេះមិនប្រកាន់បក្សពួក និន្នាការនយោបាយឡើយ ។
សូមបញ្ជាក់ថា ក្នុងពិធីនេះដែរ លោកអភិបាលខេត្តក៏បានណែនាំដល់មន្ត្រីគណបក្សប្រជាជន ឲ្យបន្តចុះជួយប្រជាពលរដ្ឋ តាមខ្នងផ្ទះ ព្រមទាំងចុះជួយប្រជាពលរដ្ឋនៅពេលដែលពួកគាត់មានទុក្ខលំបាក ដូចជា មានជំងឺ និងមានបញ្ហាផ្សេងៗ និងជួយសំរួលការធ្វើឯកសារនានា នៅសាលាឃុំ ព្រមទាំងណែនាំឲ្យប្រជាពលរដ្ឋទៅធ្វើអត្តសញ្ញាណប័ណ្ណឲ្យបានគ្រប់ៗ ហើយការធ្វើអត្តសញ្ញាណប័ណ្ណនេះគឺ ដើម្បីចូលរួមបោះឆ្នោតក្រុមប្រឹក្សាឃុំ សង្កាត់ នាពេល ខាងមុខ ព្រមទាំងទុកប្រើប្រាស់ផ្សេងៗផងដែរ ៕
អត្ថបទ ទូច សុខន ប៉ៃលិន
