ខេត្តបាត់ដំបង៖ ល្បងធំនៃពួកក្មេងអន្ធពាល ដែលអះអាងថាមានសមាជិកក្រុមប្រមាណ១០០នាក់ ប្រើរហ្សនាមថា ក្រុម«ហៃវេ បាណន់» ត្រូវសមត្ថកិច្ចចាប់ខ្លួនបានសម្រេចហើយ កាលពីវេលាម៉ោង៧និង៣០នាទីព្រឹកថ្ងៃទី២៨ តុលា នៅចំណុចផ្ទះសំណាក់មួយកន្លែង ក្នុងភូមិរំចេក៤ សង្កាត់រតនៈ ក្រុងបាត់ដំបង តាម«ដីកាបង្គាប់ឲ្យចាប់ខ្លួន» របស់ចៅក្រមស៊ើបសួរអមសាលាដំបូងខេត្ត ពីបទ«ហិង្សាដោយចេតនាមានស្ថានទម្ងន់ទោស»កាលពីដើមខែកក្ដដា កន្លងទៅនេះនៅម្ដុំសួនច្បារសម្ដេចក្រឡាហោម ស ខេង។
សមត្តកិច្ចឲ្យដឹងថា ជនត្រូវចោទមានឈ្មោះ ម៉ា ចិន្ត្រា (ចិត្រា) ហៅម៉ៅ អាយុ១៨ឆ្នាំ រស់នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ត្រូវចាប់ខ្លួនតាម «ដីកាបង្គាប់ឲ្យចាប់ខ្លួន» លេខ៥៦៨ តព្រ ចុះថ្ងៃទី១២ តុលា ២០២១ របស់លោកអ៊ី សុវណ្ណ ចៅក្រមស៊ើបសួរសាលាដំបូងខេត្ត ។ ឈ្មោះ ម៉ា ចិន្ត្រា (ចិត្រា) ហៅ ម៉ៅ បានប្រព្រឹត្តអំពើហិង្សាដ៏ឃោរឃៅទៅលើភាគីម្ខាងទៀត នៅយប់ថ្ងៃទី០៦ កក្កដា ឆ្នាំ២០២១ នៅលើសួនច្បារសម្ដេចក្រឡាហោម ស ខេង។ អំពើហិង្សារបស់ក្រុុមក្មេងពាលនេះ គឺមានបក្សពួកច្រើននាក់ ដូចគោហ្វូងប្រដាប់ដោយកាំបិត ដំបង ដេញកាប់និងគប់ទៅលើគួរសត្រូវរបស់ខ្លួនយ៉ាងឃោរឃៅ ដែលធ្វើឲ្យភាគីម្ខាងរងបួស។ ជននេះបានសារភាពប្រាប់សមត្ថកិច្ចថា « ក្រុមគាត់ឈ្មោះ ហៃវេ បាណន់។ មានសមាជិកប្រហែល១០០នាក់ជាង មានម៉ូតូជាង៥០គ្រឿង។ សម្ភារៈ ដែលពួកគេប្រើប្រាសសម្រាប់ប្រើហិង្សាទៅលើគូសត្រូវ មានផ្គាក់ កាំបិតពូថៅ និងដបសាំង»។
ទីតាំងដែលក្រុមហៃវេ បាណន់ដេញកាប់ចាក់គ្នា មាននៅលើផ្លូវហៃវេ ក្នុងស្ថានីយរថភ្លើង នៅលើសួនច្បារ និង នៅតាមកន្លែងដទៃទៀត ដែលមានគួរសត្រូវច្រើន ហើយពេលខ្លះឈ្នះ តែពេលខ្លះរងរបួសទាំងសងខាង»។ បើតាមកម្លាំងជំនាញធ្វើការស្រាវជ្រាវកន្លងមក ក្រុម«ហៃវេ បាណន់» ដែលមានឈ្មោះ ល្បងម៉ៅ ជាមេខ្លោង នេះពិតជាល្បីល្បាញមែន។ ក្រុមនេះធ្វើសកម្មភាពស្ទើរគ្រប់ទីកន្លែងឡើងកក្រើកក្រុង និង នៅតាមបណ្ដាស្រុកមួយចំនួនទៀត ព្រោះក្រុម«ហៃវេ បាណន់» នេះបង្កើតសត្រូវច្រើនណាស់។សមត្តកិច្ចឲ្យដឹងថាសមាជិកក្រុមនេះជាច្រើននាក់ត្រូវបានបង្ក្រាបបានជាបន្តបន្ទាប់ ហើយបច្ចុប្បន្នកំពុងជាប់គុកនៅឡើយ តែនៅមានឈ្មោះជាច្រើននាក់ទៀត ដែលកំពុងក្នុងបញ្ជីខ្មៅ ដែលត្រូវតាមចាប់ខ្លួននៅឡើយ តែពេលនេះមេខ្លោងធំ នៃក្រុមនេះត្រូវចាប់បញ្ចូលគុកហើយ៕