ភ្នំពេញ៖ នៅថ្ងៃទី២៨ ខែ តុលា ឆ្នាំ២០២១នេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានទទួលតំណែងជាប្រធានអាស៊ាន និងទទួលធ្វើជាម្ចាស់ផ្ទះ នៃកិច្ចប្រជុំកំពូលអាស៊ាន នៅ ឆ្នាំ២០២២ បន្តពីប្រទេសប្រុយណេដារុយសាឡឹម។
នៅលើទំព័រហ្វេសប៊ុកសម្តេចសសេរថា «ខ្ញុំជានាយករដ្ឋមន្ត្រីកម្ពុជាមួយរូប ដែលបានកាន់ញញួរប្រធានអាស៊ានរហូត៣ដង។ ខ្ញុំសូមយកឱកាសនេះ ថ្លែងអំណរគុណចំពោះបងប្អូនជនរួមជាតិ ដែលបានគាំទ្រដល់រូបខ្ញុំក្នុងការដឹកនាំកម្ពុជា ដែលធ្វើឱ្យខ្ញុំមានលទ្ធភាពចូលរួមក្នុងកិច្ចការតំបន់និងអន្តរជាតិតាមរយៈអាស៊ាន»។
សម្តេចតេជោ ហ៊ុន សែន ថ្លែងពេលបិទកិច្ចប្រជុំនារសៀលថ្ថៃទី២៨យុលាថា «ក្នុងនាមជា ប្រធានអាស៊ានឆ្នាំ ២០២២ កម្ពុជាប្ដេជ្ញាចិត្តដឹកនាំអាស៊ានបោះជំហានទៅមុខដើម្បី ភាពសុខដុមរមនា សន្តិភាព និងវិបុលភាពក្នុងតំបន់ទាំងមូល»។សម្តេចតេជោ ហ៊ុន សែន បានគូសរំលេចនូវអាទិភាពការងារមួយ ចំនួនសម្រាប់ឆ្នាំ២០២២ ក្នុងនោះ កម្ពុជានឹងយកចិត្តទុកដាក់ពង្រឹងអាស៊ាន និងឯកភាពអាស៊ាន ទាំងក្នុងយន្តការតំបន់ និងកិច្ចសហប្រតិបត្តិការដៃគូខាងក្រៅ ដោយឈរលើគោលការណ៍អាស៊ាន ដូចមានចែងក្នុងធម្មនុញ្ញអាស៊ានសន្ធិសញ្ញាមិត្តភាព និងសហប្រតិបត្តិការនៅអាស៊ីអាគ្នេយ៍ និងទស្សនវិស័យអាស៊ាន ស្ដីពីឥណ្ឌូប៉ាស៊ីហ្វិក អាស៊ាន និងមានភាពធន់ទប់ទល់រឹងមាំ នៃឥទ្ធិពលប្រកួតប្រជែងភូមិសាស្ត្រនយោបាយ ដែលកំពុងកើតឡើងបញ្ហាឧក្រិដ្ឋកម្មឆ្លងដែន ភាវកម្ម ការប្រែប្រួលអាកាសធាតុ ជំងឺរាតត្បាត។ល។
សម្តេចតេជោ «កម្ពុជា នឹងជំរុញការអនុវត្តឲ្យមាន ប្រសិទ្ធ ភាពខ្ពស់ នូវរាល់គំនិតផ្ដួចផ្ដើមវិធានការដែលបានឯកភាពគ្នា និងទាញយកផល ប្រយោជន៍ ជាអតិបរមា នៃកិច្ចព្រមព្រៀងពាណិជ្ជកម្មសេរី ដើម្បីស្ដារកំណើនសេដ្ឋកិច្ចឲ្យឆាប់រហ័ស ពិសេសតាមរយៈការជំរុញការតភ្ជាប់ទាំងរូបវន្តឌីជីថល ការលើកកម្ពស់សហគ្រាស ខ្នាតមីក្រូ តូច និងមធ្យម និងការលើកកម្ពស់ស្ត្រី និងយុវជន និងការងារអតិភាពផ្សេងទៀត ដើម្បីកាត់បន្ថយគម្លាតអភិវឌ្ឍន៍ និងពង្រឹងសមាហរណកម្មតំបន់»។
សម្តេចតេជោ បានបញ្ជាក់ថា កម្ពុជា នឹងជំរុញអភិវឌ្ឍធនធានមនុស្ស ឆ្លើយតបនឹងតម្រូវការជាក់ស្ដែងក្នុងការកសាងសហគមន៍រួម ការជំរុញចូលរួមស្ត្រី និងយុវជនក្នុងការចូលរួមរក្សាសន្តិភាព និងការអភិវឌ្ឍ ប្រព័ន្ធការពារសង្គម និងការជំរុញប្រាស្រ័យទាក់ទងរវាងប្រជាជន និងប្រជាជន សំដៅពង្រឹងស្មារតី អត្តសញ្ញាណអាស៊ានតែមួយ។ ជារួម កម្ពុជា នឹងកៀរគរកិច្ចសហប្រតិបត្តិការ ដើម្បី សម្រេចគោលដៅការកសាងសហគមន៍អាស៊ាន តាមទស្សនៈវិស័យសហគមន៍អាស៊ានឆ្នាំ ២០២៥។
