នៅព្រឹកថ្ងៃតី២៩ ខែសីហានេះ មន្ទីរសាធារណៈការ និងដឹកជញ្ជូនខេត្តក្រចេះ ដឹកនាំដោយលោក ស្រេង ស្រស់ ប្រធានមន្ទីរខេត្ត ក្រោមវត្តមានលោក វ៉ា ថន អភិបាលរងនៃគណៈអភិបាលខេត្តក្រចេះ និងមានការចូលរួមពីមន្ត្រីនគរបាលចរាចរផ្លូវគោក និងអាជ្ញាធរទាំង៥ស្រុក-ក្រុង១ បានបើកយុទ្ធនាការចែក ស្ទីកឃើ ចំណាំងផ្លាតនៅពេលយប់ ចំនួន ៣៥,៧៨២សន្លឹក ជូនប្រជាពលរដ្ឋ និងមានការបិតផ្ទាល់លើគោយន្ត និងម៉ូតូ ប្រមាណជាង ១០០គ្រឿង ដែលគ្មានភ្លើងបំភ្លឺផ្លូវនៅពេលយប់ផងដែរ។
លោក វ៉ា ថន អភិបាលរងខេត្ត បានប្រសាសន៍ថា សព្វថ្ងៃនេះ បងប្អូនប្រជាកសិករ ភាគច្រើនបានប្រើប្រាស់គោយន្តកន្ត្រៃ ឬតាឡេថង ដើម្បីធ្វើស្រែចំការ និងបើកបរលើផ្លូវសាធារណៈ ជាពិសេសលើផ្លូវជាតិតែម្តង ។ ដូច្នេះ អាជ្ញាធរបងប្អូនប្រជាពលរដ្ឋ ត្រូវយកស្ទីកឃើ ឬសន្លឹកចំណាំងផ្លាតនៅពេលយប់នេះ ទៅបិទលើគោយន្ត ឬទោចក្រយានយន្តឲ្យបានគ្រប់គ្នា ដើម្បីជៀសវាងបងប្អូនធ្វើដំណើរពេលយប់ជួបគ្រោះថ្នាក់ដល់អាយុជីវិត។
លោក បន្ដថា ពេលដែលបងប្អូនទទួលនស្ទីកឃើ នេះហើយ ត្រូវចេះថែរក្សា ហើយបើមានរហែក ឬរបក ត្រូវសុំពីអាជ្ញាធរយកបិតទៀត ។
លោក ស្រេង ស្រស់ ប្រធានមន្ទីរសាធារណៈការ និងដឹកជញ្ជូនខេត្ត បានបញ្ជាក់ថា ដោយទទួលស្ទីកឃើ ចំណាំងផ្លាត ពីឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន លើការគិតគូរពីសុវត្ថិភាពចរាចរ លោក បានចែកស្ទីកឃើ ចំណាំងផ្លាតទៅការិយាល័យជំនាញ គ្រប់ស្រុកក្រុង ធ្វើយ៉ាងណាបិទនិងចែកឲ្យប្រជាពលរដ្ឋ យកបិតលើយានជំនិះ របស់ពួកគាត់ឲ្យបានគ្រប់ៗគ្នា៕