ភ្នំពេញ ៖ អភិបាលរាជធានីភ្នំពេញលោកឃួងស្រេងនិងលោកឧត្តមសេនីយ៍ឯកសថេតស្នងការនគរបាលរាជធានីភ្នំពេញនៅព្រឹកថ្ងៃទី ២៧ ខែតុលា ឆ្នាំ ២០២១នេះ បានចូលខ្លួនមកបង់ប្រាក់ពិន័យ៦ម៉ឺនរៀលនៅនគរបាលខណ្ឌដង្កោករណីលោកបានជិះម៉ូតូជាមួយមន្ត្រីជាច្រើនចុះត្រួតពិនិត្យស្ថានភាពទឹកជំនន់នៅខណ្ឌដង្កោមិនបានពាក់មួកសុវត្ថិភាព ។
ទាក់ទងរឿងមិនពាក់មួកសុវត្ថិភាពនេះលោក ម៉េត មាសភក្ដីអ្នកនាំពាក្យ និយាយថា តាមពិតទៅ លោកអភិបាលក៏បានយកមួកសុវត្ថិភាពមកពាក់ដែរ ប៉ុន្តែដោយកញ្ចក់មួកសុវត្ថិភាពស្រអាប់ពេកពិបាកមើលផ្លូវ ម្យ៉ាងទៀតដោយមានការបន្ទាន់ចុះពិនិត្យមើលស្ថានភាពទឹកជំនន់ដើម្បីរកដំណោះស្រាយជួយប្រជាជនផងនោះ ទើបលោកអភិបាលបេីកម៉ូតូទៅដោយមិនបានពាក់មួកសុវត្ថិភាព ។
ក្រោយពីមានការរិះគន់ដើម្បីចូលរួមអនុវត្តច្បាប់ចរាចរណ៍ទាំងអស់គ្នា លោក ឃួង ស្រេង អភិបាលនៃគណៈអភិបាល រាជធានីភ្នំពេញនិងលោកឧត្តមសេនីយ៍សថេត បានចូលខ្លួនបង់ប្រាក់ពិន័យតាមផ្លូវច្បាប់នៅស្នាក់ការនគរបាលចរាចរណ៍ផ្លូវគោក បង្ហាញពីការទទួលស្គាល់កំហុសដោយអចេតនា ទោះបីលោកនិងសហការី ប្រឈមនឹងការមមាញឹកការងារ ជួយធ្វើអន្តរាគមន៍រំដោះប្រជាពលរដ្ឋរងគ្រោះដោយជំនន់ទឹកភ្លៀង ទាំងយប់ ទាំងថ្ងៃក៏ដោយ ។
គេមិនដឹងថាតើការផាកពិនយ័ធ្វើទាំងអស់គ្នាឬលើតែមេដឹកនាំទេហើយតើវាជាទង្វើបំពេញភារកិច្ចរបស់មន្ត្រីនគរបាលចរាចរដោយភ្ញាក់រលឹកឬជាការបញ្ជារក្រោយពីមានការរិះគន់នោះទេ?។ប្រសិនបើជាទង្វើបំពេញការងារតាមកាតព្វកិច្ចវាគួមានការលើកទឹកចិត្តដល់មន្ត្រីនគរបាលចរាចរផងដែលប្រថុយនិងហានិភយ័ផាកមេរបស់ខ្លួនឯង។
សូមបញ្ជាក់ដែរថា បើគេមិនទាន់ភ្លេចទេកាលពីប៉ុន្មានឆ្នាំមុនសម្តេចតេជោហ៊ុនសែននាយករដ្ឋមន្ត្រីក៏ធ្លាប់ស្មគ្រ័ចិត្តឲ្យនគរបានចរាចរខេត្តកោះកុងផាករឿងជិះម៉ូតូមិនពាក់មួកសុវត្ថិភាពផងដែរ។រឿងល្បែងបង្ហាញភាពគំរូនេះដែរប្រសិនបើអ្នកណាធ្លាប់មើលរឿងសាមកុកក៏ឃើញមានឈុតមួយមេទព័ឆាវៗបានដាក់ពិន័យខ្លួនឯងដោយយកដាវកាត់សក់បន្ទាប់ពីបររទេះសេះកាត់ស្រែរបស់ប្រជាពលរដ្ឋផងដែរ៕
