ភ្នំពេញ៖ ក្រសួងអប់រំ យុវជន និងកីឡា នៅល្ងាចថ្ងៃទី២១ ខែតុលានបានចេញប្រកាសស្តីការបើកសាលារៀនឡើងវិញ ចាប់ពីថ្ងៃទី១ ខែវិច្ឆិកា ឆ្នាំ២០២១ ។
សេចក្តីប្រកាស លើកឡើងថា ការពង្រីកវិសាលភាពនេះ រួមបញ្ចូលទាំងការពង្រីកពីកម្រិតថ្នាក់ទី៩ និងទី១២ រហូតដល់គ្រប់កម្រិតថ្នាក់មធ្យមសិក្សា និងការពង្រីកវិសាលភាពដល់កម្រិតបឋមសិក្សា គ្រឹះស្ថានឧត្តមសិក្សាសាធារណៈ និងឯកជន វិទ្យាស្ថានជាតិអប់រំ វិទ្យាស្ថានបច្ចេកវិទ្យា គ្រឹះស្ថានបណ្តុះបណ្តាលគ្រូ គ្រឹះស្ថានសិក្សាអប់រំពិសេស សាលាអនុវត្តន៍ និងវិទ្យាល័យចំណេះទូទៅ និងអប់រំបច្ចេកទេស ដោយគោរពតាមយ៉ាងខ្ជាប់ខ្ជួននូវបទដ្ឋានសុខាភិបាលជាធរមាន។
សូមរម្លឹកថា សាលារៀនថ្នាក់អនុវិទ្យាល័យ និងថ្នាក់វិទ្យាល័យ បានបើកដំណើរការឡើងវិញ កាលពីអំឡុងខែកញ្ញា ឆ្នាំ២០២១ ក្រោយពីគ្រូ និងសិស្ស បានចាក់វ៉ាក់សាំងរួចរាល់។ ក្នុងពេលបើកសាលារៀនដំបូងៗ ក៏មានគ្រូ និងសិស្ស រកឃើញឆ្លងកូវីដ១៩ ដែរ។ តែមិនច្រើន រហូតដល់ត្រូវបិទសាលារៀននោះទេ។
ក្រោយភ្ជុំបិណ្ឌ នាដើមខែតុលានេះ ក៏គ្រូបង្រៀនមួយចំនួន ធ្វើតេស្តរកឃើញឆ្លងកូវីដ១៨ ដែរ។ តែមិនមានច្រើន ហើយដំណើរការរៀន និងបង្រៀននៅថ្នាក់រៀន តាមគន្លងថ្មី រួមទាំងការបង្រៀន និងរៀនតាមអនឡាញ ក៏នៅតែបន្ត។
រហូតដល់ពេលនេះ សិស្សានុសិស្សនៅកម្រិតបឋមសិក្សា ចាប់ពីអាយុ ៦ឆ្នាំ រហូតដល់ក្រោម ១២ឆ្នាំ ក៏បានចាក់វ៉ាក់សាំង ស្ទើរតែ ១០០% ក្នុងចំណោមជិត ២លាននាក់។ ចំណែកកុមារ និងយុវវ័យ អាយុពី ១២ឆ្នាំ ដល់ក្រោម ១៨ឆ្នាំ នៅថ្នាក់អនុវិទ្យាល័យ និងវិទ្យាល័យ ក៏បានចាក់វ៉ាក់សាំងស្ទើរតែទាំងអស់ផងដែរ។ អ្នកមានអាយុ ១៨ឆ្នាំឡើង ក៏បានចាក់វ៉ាក់សាំងកូវីដ១៩ បានសឹងតែ ១០០% ហើយគ្រូបង្រៀនទាំងអស់ បានចាក់វ៉ាក់សាំង រហូតដល់ ៣ដូសរួចរាល់៕
