ខេត្តកំពង់ឆ្នាំង៖ ប្រជាពលរដ្ឋជាង ៨០ គ្រួសារ មកពីជាង ១០ ភូមិ នៅក្នុងឃុំជ្រៃបាក់ ស្រុករលាប្អៀរនៅថ្ងៃទី១៣ តុលា ២០២១ នេះ បាននាំគ្នាមកតវ៉ា នៅចំណុច អន្លង់ភ្លង ក្នុងឃុំជ្រៃបាក់ សុំអាជ្ញាធរ ជួយដោះដូរដី ៤ ហិកតា ជាមួយក្រុមហ៊ុន ដើម្បីយកដីដែលមានដីឥដ្ឋល្អ អាចផលិតចង្ក្រានឆ្នាំង សម្រាប់ចិញ្ចឹមជីវិត។ ការកើតការតវ៉ានេះ ដោយសារ ប៉ុន្មានថ្ងៃ ថ្មីៗនេះ ខាងក្រុមហ៊ុន បានជីកប្រឡាយបិទ ផ្លូវជាថ្មីម្ដងទៀត ដោយមិនអនុញ្ញាត ឲ្យពួកគាត់ ចូលជីកយកដីឥដ្ឋ មកផលិតចង្ក្រាន-ឆ្នាំងដី ទៀតឡើយ ដែលបានធ្វើឲ្យមុខរបរ ចិញ្ចឹមជីវិតប្រចាំថ្ងៃ របស់ពួកគាត់ ជួបការលំបាក។
ប្រជាពលរដ្ឋ ប្រាប់ថាៈ ពួកគាត់ជាអ្នកប្រកបមុខ របរផលិតចង្ក្រានឆ្នាំង ចិញ្ចឹមជីវិត តាំងពីដូនតា តៗគ្នា រៀងមក រស់ក្នុងភូមិត្រពាំងគរ ភូមិអូររោង ភូមិអូរកណ្ដោល ភូមិព្រៃលាក់នាង ភូមិអូរកំណប់ ភូមិអាឡែង ភូមិឃ្លៃ ភូមិត្រពាំងអន ក្នុងឃុំជ្រៃបាក់ ស្រុករលាប្អៀរ ដែលកន្លងមក ធ្លាប់នាំគ្នាមកជីកយកដីឥដ្ឋ នៅចំណុចអន្លង់ភ្លងនេះ ទៅផលិតធ្វើចង្ក្រាន-ឆ្នាំង ដើម្បីលក់ដូរ ចិញ្ចឹមជីវិតរាល់ឆ្នាំ។ កាលពីប្រមាណជាង ៣ ឆ្នាំមុន ក្រុមហ៊ុនដី ខាងលើ បានបិទផ្លូវមិនឲ្យគាត់ ចូលមកជីកយកដីឥដ្ឋ នៅតំបន់នេះ ម្ដងហើយ។ តែក្រោយពីពួកគាត់ បានតវ៉ា កាលណោះ ដោយមានការសម្របសម្រួល របស់អាជ្ញាធរមក ខាងក្រុមហ៊ុន ក៏បានអនុញ្ញាតឱ្យដីទំហំ ៤ ហិកតា សម្រាប់ជីកយកដីឥដ្ឋ ផលិតជាចង្ក្រាន -ឆ្នាំង។
ក្រោយមក ការជីកយកដីឥដ្ឋ នៅក្នុងដីទំហំ ៤ ហិកតានេះ ទៅផលិតចង្ក្រាន-ឆ្នាំង ចេះតែផ្ទុះខូច ពុំអាចផលិតចង្ក្រាន-ឆ្នាំង យកទៅលក់ដូរបានឡើយ។ ពួកគាត់ ក៏ចេះតែចូលមកជីក កកាយយកដី នៅកន្លែងផ្សេងៗ របស់ក្រុមហ៊ុនទៅ ហើយខាងក្រុម ហ៊ុន ក៏មិនដែលរករឿងអ្វីឡើយ ព្រោះក្រុមហ៊ុន ក៏បានចូលយកដីក្រួសបាយក្រៀម ក្នុងតំបន់ដី ៤ ហិកតា របស់ប្រជាពលរដ្ឋដែរ ។ប៉ុន្តែក្នុងពេលថ្មីៗនេះ ពេលក្រុមហ៊ុន ឈប់យកដីក្រួសបាយក្រៀម ក្នុងតំបន់ដីរបស់ ប្រជាពលរដ្ឋ ក្រុមហ៊ុន ក៏បានជីកកាយប្រឡាយ បិទផ្លូវ មិនឱ្យប្រជាពលរដ្ឋ ចូលយកដីឥដ្ឋ ក្នុងតំបន់ដីរបស់ក្រុមហ៊ុនទៀតឡើយ ។
ដូច្នេះនៅថ្ងៃនេះ ប្រជាពលរដ្ឋ បានលើកគ្នា មកសំណូមពរដល់ អាជ្ញាធរស្រុក ខេត្ត និងមន្ត្រីជំនាញពាក់ព័ន្ធ មេត្តាជួយសម្របសម្រួល ដោះដូរដីចាស់ ទំហំ ៤ ហិកតារបស់គាត់ សុំដូរយកក្នុងទីតាំងដី របស់ក្រុមហ៊ុន ដែលមានដីឥដ្ឋល្អ អាចយកដីឥដ្ឋ ទៅផលិតចង្ក្រាន -ឆ្នាំង លក់ដូរបានផងចុះ។លោក តាំង ប៊ុនទត មេឃុំជ្រៃបាក់ ក៏បានមកជួបប្រជាពលរដ្ឋ តវ៉ា ប្រាប់ថាគាត់នឹងទទួលយក សំណូមពរ របស់ប្រជាពលរដ្ឋ ខាង លើនេះ រាយការណ៍ ទៅអាជ្ញាធរស្រុក និងខេត្ត ដើម្បីសុំសម្របសម្រួល ជាក្រុមហ៊ុន ស្នើសុំដោះដូរដីទំហំ ៤ ហិកតា ដែលមានដីឥដ្ឋល្អ អាចយកទៅផលិតចង្ក្រាន-ឆ្នាំង បាន ជូនប្រជាពលរដ្ឋ ប៉ុន្តែត្រង់ថា អាចដោះដូរបាន ឬមិនបាន យ៉ាងណានោះ លោកមិនហ៊ានសន្យានោះទេ។
