ភ្នំពេញ ៖ សម្តេចនាយករដ្ឋមន្ត្រី ហ៊ុន សែន បានបញ្ជាឱ្យរដ្ឋមន្ត្រីក្រសួងយុត្តិធម៌លោក កើត រិទ្ធ សិក្សាអំពីការរៀបចំធ្វើវិសោធនកម្មរដ្ឋធម្មនុញ្ញ និងច្បាប់ពាក់ព័ន្ធដើម្បីបិទច្រកអ្នកមានសញ្ជាតិ២មិនឲ្យធ្វើនាយករដ្ឋមន្ត្រីប្រធានសភានិងព្រិទ្ធសភាទទួលបានការសាទរពីមន្តីរិគ្រប់លំដាប់ថ្នាក់។
តាមរយះ Facebook នៅថ្ងៃទី៦ ខែកញ្ញា ឆ្នាំ២០២១នេះ សម្តេចតេជោ ហ៊ុន សែន បានបញ្ជាក់ថា៖«ដើម្បីបង្ហាញនូវការស្មោះត្រង់ចំពោះជាតិនិងបញ្ចៀសនូវការជ្រៀតជ្រែកពីបរទេស ថ្នាក់ដឹកនាំជាតិដែលកាន់តួនាទីជាប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញត្រូវមានសញ្ជាតិខ្មែរតែមួយ។ ខ្ញុំបានប្រគល់ការងារជូន ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ សិក្សារៀបចំធ្វើសេចក្តីព្រាងច្បាប់វិសោធនកម្មរដ្ឋធម្មនុញ ឬសេចក្តីព្រាងច្បាប់អង្គការ ដែលចេញពីរាជរដ្ឋាភិបាល ឬជាសេចក្តីស្នើច្បាប់ដែលចេញពីព្រឹទ្ធសភា និងរដ្ឋសភា។បើលេងកុំខឹងបើខឹងកុំលេងព្រោះទ្វារត្រូវបានបិទជារៀងរហូតហើយ សម្រាប់ពួកសញ្ជាតិពីរ ដែលប៉ុនប៉ងកាន់តំណែងកំពូលនេះ ពិសេសតំណែងនាយករដ្ឋមន្ត្រីព្រោះថាវិសោធនកម្មរដ្ឋធម្មនុញ្ញក្តីឬច្បាប់អង្គការក្តីត្រូវការសម្លេង២ភាគ៣ ទើបអាចអនុម័តបាន»។
ប្រតិកម្មសម្តេចនាយករដ្ឋមន្ត្រី ហ៊ុន សែន បានធ្វើឡើងបន្ទាប់ពី លោកសម រង្ស៉ី បានផ្សព្វផ្សាយចោទប្រកាន់ដោយយោងការផ្សាយរបស់កាសែតThe Guardian ថា សម្តេចនាយករដ្ឋមន្ត្រី ហ៊ុន សែន បានទិញលិខិតឆ្លងដែន និងបានទទួលសញ្ជាតិ ពីប្រទេសសាយប្រឹស (Cyprus) ដែលជាកោះមួយ នៅទ្វីបអឺរ៉ុប។ករណិយ៍នៃការចុះផ្សាយនេះមេធាវីរាជរដ្ឋាភិបាលក៏បានចេញលិខិតបដិសេធផងដែរ។
ឯរដ្ឋមន្ត្រីក្រសួងយុត្តិធម៌ លោក កើត រិទ្ធនៅថ្ងៃទី៦តុលានេះដែរក៏ បានចេញរលិខិតមួយផ្ញើរទៅកាន់រដ្ឋមន្ត្រីក្រសួងយុត្តិធម៌ និងសណ្តាប់ធ្នាប់សាធារណៈប្រទេសស៊ីប លោកស្រី Stephie Dracos ស្នើឱ្យមានការស្រាវជ្រាវដើម្បីបញ្ជាក់ការពិតទៅលើការចុះផ្សាយរបស់សារព័ត៌មាន The Guardian និង The Washington Post ដែលចោទប្រកាន់ទៅលើលោកនាយករដ្ឋមន្ត្រី ហ៊ុន សែន ថាមានលិខិតឆ្លងដែនប្រទេសស៊ីប (Cyprus) ឬមានសញ្ជាតិស៊ីប។
លោក កើត រិទ្ធ លើកឡើងថា នាពេលថ្មីៗនេះ មានសារព័ត៌មានមួយចំនួនដូចជា The Guardian ដែលមានមូលដ្ឋាននៅប្រទេសអង់គ្លេស និង The Washington Post ដែលមានមូលដ្ឋាននៅសហរដ្ឋអាមេរិក បានផ្សព្វផ្សាយនូវលទ្ធផលនៃការស្រាវជ្រាវមួយដែលគេហៅថា «The Pandora Papers Investigation» ក្នុងនោះក៏មានព័ត៌មានបំផ្លើសខុសពីការពិតដែលចោទប្រកាន់ថា លោក ហ៊ុន សែន មានលិខិតឆ្លងដែនស៊ីប។
លោកកើតរិទ្ធ សរសេរថា សម្តេច ហ៊ុន សែន មានសញ្ជាតិខ្មែរតែមួយគត់ និងធ្លាប់ប្រកាសជាសាធារណៈជាច្រើនលើកច្រើនសារចំពោះមុខប្រជាជនកម្ពុជា នូវគោលជំហរនយោបាយឥតងាករេ គឺ «រួមសុខរួមទុក្ខជាមួយប្រជាជនកម្ពុជា ហើយដាច់ខាតមិនរត់ចោលប្រជាជន កម្ពុជា និងប្រទេសកម្ពុជាឡើយ ទោះបីក្នុងកាលៈទេសៈលំបាកយ៉ាងណាក៏ដោយ»។
លោក កើត រិទ្ធ ចាត់ទុកពត៍មានខាងលើថា ការផ្សព្វផ្សាយព័ត៌មានមិនពិត និងបំផ្លើសរបស់សារព័ត៌មានទាំងនេះចំពោះលោក ហ៊ុន សែន បានធ្វើឱ្យប៉ះពាល់ធ្ងន់ធ្ងរដល់កិត្តិយស និងសេចក្តីថ្លៃថ្នូររបស់នាយករដ្ឋមន្ត្រីកម្ពុជា ក៏ដូចជា ប្រទេសកម្ពុជា និងប្រជាជនកម្ពុជាទាំងមូល។៖ «ក្រសួងយុត្តិធម៌នៃព្រះរាជាណាចក្រកម្ពុជា សូមស្នើសុំកិច្ចសហការពីលោកជំទាវ រដ្ឋមន្ត្រី មេត្តាស្រាវជ្រាវជុំវិញការចោទប្រកាន់បំផ្លើសការពិតចំពោះនាយករដ្ឋមន្ត្រីនៃព្រះរាជាណាចក្រកម្ពុជា ថា មានលិខិតឆ្លងដែននៃសាធារណរដ្ឋស៊ីប ឬមានសញ្ជាតិស៊ីប ដូចដែលសារព័ត៌មានខាងលើបានផ្សព្វផ្សាយ ដើម្បីបញ្ជាក់ឱ្យឃើញការពិតឱ្យបានច្បាស់លាស់ជូនដល់សាធារណជន និងប្រជាជនកម្ពុជាទាំងមូល ក៏ដូចជា ដើម្បីធានារក្សាកិត្តិយស និងសេចក្តីថ្លៃថ្នូររបស់ព្រះរាជាណាចក្រកម្ពុជា និងនាយករដ្ឋមន្ត្រីនៃព្រះរាជាណាចក្រកម្ពុជា»។
