កោះកុង ៖ លោក យួន ឈីវ ចាងហ្វាងការផ្សាយ គេហទំព័រកោះកុងទាន់ហេតុការណ៍ (www.kohkonghotnews.com)ត្រូវបានសាលាដំបូងខេត្តកោះកុង បានផ្ដន្ទាទោស ពីបទញុះញង់(ទោះមិនទាន់ចេញផលពីការញុះញង់ក៏ដោយ) តាមបញ្ញត្តិមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌនៃព្រះរាជាណាចក្រកម្ពុជា ដែល ដាក់ពន្ធនាគារកំណត់រយៈពេល ១ឆ្នាំ ទោះជាបានសសេរលិខិតសុំទោសហើយក៏ដោយ។
ការផ្ដន្ទាទោសនេះ បានធ្វើឡើងបន្ទាប់ពីមានការណែនាំរបស់សម្ដេច ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ ដើម្បីឱ្យស៊ើបអង្កេតលើលោក យួន ឈីវ ជុំវិញការចោទប្រកាន់ថាលោក បានបង្ហោះព័ត៌មានដែលមានលក្ខណៈខុសពីការពិត អំពីការពាក់ព័ន្ធរបស់ឯកឧត្តម អភិបាលរងខេត្តកោះកុង នៅក្នុងវិវាទដីធ្លីមួយនៅខេត្តកោះកុង ។
លោក យួន ឈីវ ត្រូវបាននគរបាលស្រុកបទុមសាគរកោះហៅទៅសាកសួរកាលពីថ្ងៃអង្គារសប្ដាហ៍ទី២៩កញ្ញា ហើយលោកបានបង្ហាញវត្តមានទៅឆ្លើយបំភ្លឺដោយផ្ទាល់ ។ លោកបានធ្វើលិខិតសុំអភ័យទោស ចំពោះឯកឧត្ដមអភិបាលរងខេត្ត និងបានយល់ព្រមលុបចោលអត្ថបទ ដែលបានបង្ហោះនៅលើទំព័រហ្វេសប៊ុករបស់លោក មុនពេលករណីរបស់លោកត្រូវបានបញ្ជូនទៅតុលាការ ម្សិលមិញនេះ ។ សំណុំរឿងរបស់លោកត្រូវបានជំនុំជម្រះថ្ងៃនេះ ដោយពុំមានការបើកការស៊ើបអង្កេតតាមផ្លូវច្បាប់ ដោយផ្អែកលើហេតុផលថា លោកត្រូវបានចាប់ខ្លួនក្នុងពេលប្រព្រឹត្តបទល្មើសជាក់ស្ដែង? ។
សូមបញ្ជាក់ថា មានផេកហ្វេសប៊ុកឈ្មោះ Koh Kong Hot News ដែលបានផ្សាយវីដេអូ ដោយដាក់ចំណងជើងថា «លោក សុខ សុទ្ធី (អភិបាលរងខេត្តកោះកុង) ឃោឃៅបំផុតធ្វើបាបពលរដ្ឋ»។ សម្តេចពិជ័យសេនា ទៀ បាញ់ បានចាត់ទុកថា នេះជាព័ត៌មានខុសពីការពិត មិនគ្រប់ជ្រុងជ្រោយ និងបង្កភាពចលាចលក្នុងសង្គម។ តាមរយៈសារសំឡេងដែលបណ្តាញព័ត៌មាន ទទួលបាន គឺសម្តេចពិជ័យសេនា បានបញ្ជាយ៉ាងដូច្នេះថា៖ «ធ្វើរបាយការណ៍ជាលាយលក្ខណ៍អក្សរ និងពិភាក្សាជាមួយអ្នកច្បាប់ ធ្វើរឿងហ្នឹងឲ្យបានឆាប់រហ័សទាន់ពេលវេលា»។
