ភ្នំពេញ៖ លោក យួន ឈីវអ្នកកាសែតម្នាក់នៅខេត្តកោះកុងដែលសកម្មខាងការពារប្រជាពលរដ្ឋដែលរងការបំពានដីធ្លីកាលពីថ្ងៃទី២៦កញ្ញាត្រូវបានសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបញ្ជាឲ្យប្តឹងដោយចោទថាបំភ្លៃព័ត៌ ពាក់ព័ន្ធនឹងការកាត់ឆ្វៀលដី ជូនប្រជាពលរដ្ឋ នៅក្នុងខេត្តកោះកុងបានសសេរលិខិតសុំទោសហើយតែមិនដឹងថាតើអាចរួចខ្លួនដែរឬអត់នោះទេ។
គេមិនដឹងថា តើមូលហេតុអ្វីបានជាសម្តេចពិជ័យសេនាទៀបាញ់នៅមជ្ឈឹមគឺជាឧបនាយករដ្ឋមន្ត្រីនិងជារដ្ឋមន្ត្រីក្រសួងការពារជាតិចេញមុខរករឿងអ្នកកាសែតផ្ទាល់នោះឡើយ?។ តែការបញ្ជារបស់សម្តេចពិជ័យសេនា បានធ្វើឡើងបន្ទាប់ពីមានផេកហ្វេសប៊ុកឈ្មោះ Koh Kong Hot News ដែលបានផ្សាយវីដេអូ ដោយដាក់ចំណងជើងថា «លោក សុខ សុទ្ធី (អភិបាលរងខេត្តកោះកុង) ឃោឃៅបំផុតធ្វើបាបពលរដ្ឋ» ដោយសម្ភាសន៍ជាមួយប្រជាពលរដ្ឋ៣នាក់។ សម្តេចពិជ័យសេនា ទៀ បាញ់ បានចាត់ទុកថា នេះជាព័ត៌មានខុសពីការពិត មិនគ្រប់ជ្រុងជ្រោយ និងបង្កភាពចលាចលក្នុងសង្គម។
តាមរយៈសារសំឡេង គឺសម្តេចពិជ័យសេនា បានបញ្ជាយ៉ាងដូច្នេះថា៖ «ធ្វើរបាយការណ៍ជាលាយលក្ខណ៍អក្សរ និងពិភាក្សាជាមួយអ្នកច្បាប់ ធ្វើរឿងហ្នឹងឲ្យបានឆាប់រហ័សទាន់ពេលវេលា»។
កាលពីនៅថ្ងៃទី២១ ខែកញ្ញា ឆ្នាំ២០២១ គណនីហ្វេសប៊ុកឈ្មោះ យួន ឈីវ បានចុះផ្សាយអត្ថបទដោយមានខ្លឹមសារថា លោក សុខ សុទ្ធី មិនព្រមធ្វើតាមប្រមុខរាជរដ្ឋាភិបាល ពាក់ព័ន្ធនឹងការកាត់ឆ្វៀលដីជូនប្រជាពលរដ្ឋ ហើយអាជ្ញាធរខេត្តកោះកុង ដឹកនាំដោយ លោក សុខ សុទ្ធី មកកាប់ដំណាំ និងផ្ទះប្រជាពលរដ្ឋ គ្មានញញើតដៃ បន្ទាប់ពីអនុក្រឹត្យលេខ៣០ អនក្រ.បក ចុះថ្ងៃទី០២ ខែមីនា ឆ្នាំ២០២១។លោកយួនឈីវសសេរក្នុងហ្វេសប៊ុកថា៖លោក សុខ សទ្ធី ព្រហើន និងប្រសាសន៍ របស់សម្តេច តេជោហ៊ុន សែន ធ្វើបាបពលរដ្ឋយ៉ាងធ្ងន់ធ្ងរបំផុតនៅក្នុងខេត្តកោះកុង។
លោក សុខ សុទ្ធី អភិបាលរង ខេត្តកោះកុង រងការរិះគន់ យ៉ាងខ្លាំងបំផុតលើលោក ខាងកាប់ដំណាំដាំដុះប្រជាពលរដ្ឋ នៅក្នុងខេត្តកោះកុង ហើយអាងខ្លួន កាន់តួនាទី ខាងរកដំណោះស្រាយដីធ្លី តែអភិបាលរូបនេះ ធ្វើអោយប្រជាពលរដ្ឋ ឈឺចាប់អស់មួយជីវិត ក្រោយពេល ចេញអុនក្រិត្យលេខ៣០ សនក្រ,បក កាត់ឆ្លៀលដីក្នុងតំបន់ឧទ្យានជាតិ បូទុមសាគរ ដើម្បីកាត់ ជូនប្រជាពលរដ្ឋដែលបានអាស្រ័យផលជាក់ស្តែង។លោក សុខ សុទ្ធី និងមន្ត្រីបរិស្ថានខេត្តកោះកុង មិនព្រមធ្វើតាមអនុក្រឹត្យ លេខ៣០ ហើយជាពិសេសនោះ ប្រសាសន៍ដ៍ថ្លៃថ្លារបស់ សម្តេច តេជោ ហ៊ុន សែន លោក សុខ សុទ្ធី មិនដែលខ្វល់លើយ នេះហើយមន្ត្រី បំផ្លាញចិត្តប្រជាពលរដ្ឋ បំផ្លាញបេះដូងពលរដ្ឋយ៉ាងខ្លាំង ក្នុងនាមខ្លួនដែលបំរើពលរដ្ឋ មន្ត្រីរូបនេះធ្វើអោយបាត់បង់ កិត្តិយសកេរ្តិ៍ឈ្មោះនៅក្នុងខេត្តកោះកុងជាមួយពលរដ្ឋ។ ករណីខាងលើនេះ អាជ្ញាធរខេត្តកោះកុង ក៏បានច្រានចោលផងដែរ។
អាជ្ញាធរខេត្តកោះកុង បញ្ជាក់ថា ការចុះផ្សាយ និងផ្សព្វផ្សាយព័ត៌មាន របស់អ្នកសារព័ត៌មានឈ្មោះ យួន ឈីវ នេះ គឺជាការចុះផ្សាយព័ត៌មានគ្មានមូលដ្ឋានច្បាស់លាស់ ខុសពីការពិត ខ្វះវិជ្ជាជីវៈ ខ្វះក្រមសីលធម៌ជាអ្នកសារព័ត៌មាន ហើយការចុះផ្សាយព័ត៌មាននេះ មានចេតនា បង្កាច់បង្ហូចកេរ្តិ៍ឈ្មោះ លោក សុខ សុទ្ធី អភិបាលរងខេត្តកោះកុង ធ្វើឱ្យប៉ះពាល់ដល់កិត្តិយស រដ្ឋបាលខេត្ត ធ្វើឱ្យសាធារណជនមានការយល់ច្រឡំ និងបង្កភាពចលាចលក្នុងសង្គម។
កាលពីថ្ងៃទី១៩ ខែកញ្ញា ឆ្នាំ២០២១ កន្លងទៅនេះ ក្រុមការងាររដ្ឋបាលខេត្តកោះកុង ដោយមានការចូលរួមសហការពីមន្ទីរ អង្គភាពជំនាញពាក់ព័ន្ធ និងស្ថាប័នអយ្យការអមសាលាដំបូងខេត្តកោះកុង បានចុះអនុវត្តវិធាន រដ្ឋបាលនៅចំណុចអូរយ៉ូយ៉ា ចំណុចខ្មោច ៤នាក់ ស្ថិតនៅភូមិចម្លងគោ និងចំណុចព្រែករាក់ ចំណុចព្រែកគល់ ស្ថិតនៅភូមិចម្ការលើ ឃុំថ្មស ស្រុកបូទុមសាគរ ខេត្តកោះកុង គឺដោយសារនៅទីតាំងទាំងនេះ មានការចូលទន្ទ្រានកាន់កាប់ដីរដ្ឋដោយខុសច្បាប់ពីសំណាក់ជនខិលខូច ហើយនៅទីតាំងដែលរដ្ឋបាលខេត្តចុះអនុវត្តវិធានរដ្ឋបាលនេះ គឺជាទីតាំងដីស្ថិតនៅក្នុងឧទ្យានជាតិបូទុមសាគរ ខេត្តកោះកុង មិនមែនស្ថិតនៅក្នុងអនុក្រឹត្យលេខ៣០ អនក្រ.បក ចុះថ្ងៃទី០២ ខែមីនា ឆ្នាំ២០២១ ឡើយ។
អាជ្ញាធរឲ្យកាសែតដឹងថាមុននឹងរដ្ឋបាលខេត្តកោះកុង ចុះអនុវត្តវិធានរដ្ឋបាលនៅទីតាំងទាំងនេះ រដ្ឋបាលស្រុកបូទុមសាគរ បានចេញលិខិតជូនដំណឹងចំនួន ២ដង ឱ្យបុគ្គលទាំងឡាយណាដែលមានជាប់ពាក់ព័ន្ធនឹងការទន្ទ្រានកាន់កាប់ដីរដ្ឋដោយខុសច្បាប់ សាងសង់ខ្ទមអនាធិបតេយ្យ ក្នុងតំបន់ការពារធម្មជាតិនៃឧទ្យានជាតិបុទុមសាគរ ខេត្តកោះកុង ឱ្យធ្វើការរុះរើផ្ទះ ខ្ទម រោងចាំចំការទាំងឡាយ ចេញពីទីតាំងដីនេះដោយខ្លួនឯង ប៉ុន្តែបុគ្គលទន្ទ្រានកាន់កាប់ដីរដ្ឋដោយខុសច្បាប់ទាំងនោះ រឹងទទឹងមិនព្រមសហការអនុវត្តតាមសេចក្តីជូនដំណឹងរបស់អាជ្ញាធរ ។
ម្យ៉ាងទៀត ក្នុងចំណោមបុគ្គលដែលទន្ទ្រានកាន់កាប់ដីរដ្ឋដោយខុសច្បាប់ ហើយត្រូវបានរដ្ឋបាលខេត្តកោះកុងអនុវត្តវិធានរដ្ឋបាល ក្នុងនោះក៏មានបុគ្គលឈ្មោះ យួន ឈីវ ដែលជាអ្នកសារព័ត៌មាននេះផងដែរ ទើបបណ្តាលឱ្យបុគ្គលនេះខំប្រឹងផ្សាយព័ត៌មានបំភ្លៃការពិតដូច្នេះ។
មកដល់ថ្ងៃទី២៧កញ្ញាតាមរយៈហ្វេប៊ុកលោកយួនឈីវឲ្យដឹងថាលោកបានទៅជួបសមត្តកិច្ចហើយបានសសេរលិខិតសុំទោសពីរសន្លឹកដែលមានខ្លឹមសារថា៖ខ្ញុំបាទ យួន ឈីវ ចាងហ្វាងការផ្សាយគេហទំព័រកោះកុងទាន់ហេតុការណ៍ សូមធ្វើការអភ័យទោសជាសាធារណៈនូវការចុះផ្សាយព័ត៌មានដែលទទួលបានមិនគ្រប់ជ្រុងជ្រោយធ្វើអោយមានការប៉ះពាល់ទៅដល់អារម្មណ៍ថ្នាក់ដឹកនាំ និងការងារដ្ឋបាលសាធារណៈ រួមទាំងបង្កអោយមានការភ័ន្តច្រឡំពីសាធារណជន ហេតុនេះខ្ញុំបាទសូមទទួលនូវកំហុសឆ្គងរបស់ខ្ញុំបាទ ដូចដែលមានចែងក្នុងលិខិតខាងក្រោម ÷ (២៧.៩.២០២១)៕
(ប្រភពគេហទំពរ័CNCនិងហ្វេប៊ុកលោកយួនឈីវ)
