ឧត្តរមានជ័យ ៖ មិនទាន់មានការបកស្រាយពន្យល់ករណីលោក វ៉ាន់ ក្តេ ប្រធានការិយាល័យគយច្រកអូរស្មាច់និងមេគយចល័តខេត្តឧត្តរមានជ័យឈ្មោះគួនសុភាពដែលឃុបឃឹតគ្នាបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់ចូលតាមច្រកអូរស្មាច់នាំមកលក់នៅភ្នំពេញត្រូវសមត្តកិច្ចផ្សេងបង្ក្រាបបាននោះឡើយមកទល់ពេលនេះ។
សូមបញ្ជាក់កាលពីយប់ថ្ងៃទី១៩ ខែកញ្ញា ឆ្នាំ២០២១ សមត្ថកិច្ចបានឃាត់រថយន្ត១គ្រឿង ដឹកជញ្ជូនផលិតផលកែច្នៃពីសត្វ រួមមានប្រហិតចម្រុះ ស្លាបមាន់ភ្លៅមាន់និងកោះមាន់សរុប៣២,០៤៤តោន នៅចំណុចភូមិគោកត្រាច ឃុំបាគង ស្រុកប្រាសាទបាគង ខេត្តសៀមរាប។ ប្រភពពីសមត្ថកិច្ចជំនាញបានឲ្យដឹងថា ទំនិញទាំងនោះត្រូវបានឈ្មួញនាំចូលពីប្រទេសសៀម តាមច្រកទ្វារអន្តរជាតិអូរស្មាច់ ក្រុងសំរោង ខេត្តឧត្តរមានជ័យ ដើម្បីយកទៅលក់ចែកចាយក្នុងទីផ្សារនៅរាជធានីភ្នំពេញ។
ប្រភពស្និទ្ធនឹងលោក វ៉ាន់ ក្តេ ប្រធានការិយាល័យគយច្រកអូរស្មាច់ បានឲ្យដឹងថា ដោយសារអាងមានលោក ឈុន សុភមង្គល ប្រធានសាខាគយខេត្តឧត្តរមានជ័យ ជាបង្អែករឹងមាំទើបលោក វ៉ាន់ ក្តេ មិនញញើតក្នុងការប្រព្រឹត្តអំពើពុករលួយឃុបឃឹតជាមួយឈ្មួញនោះឡើយ។ ជាក់ស្តែងតាំងពីលោក វ៉ាន់ ក្តេ ទទួលបានតំណែងជាប្រធានការិយាល័យគយច្រកអូរស្មាច់គឺលោក វ៉ាន់ ក្តេ ប្រព្រឹត្តអំពើពុករលួយពេញទំហឹង គ្មានញញើតអ្វីទាំងអស់។
ប្រភពពីមន្ត្រីពាក់ព័ន្ធនៅច្រកទ្វារអន្តរជាតិអូរស្មាច់ ក្រុងសំរោង ខេត្តឧត្តរមានជ័យ បានឲ្យដឹងថា បច្ចុប្បន្នលោក វ៉ាន់ ក្តេ ប្រធានការិយាល័យគយច្រកអូរស្មាច់ នៅតែបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់តាមច្រកអូរស្មាច់ដដែល។ ប្រភពបានឲ្យដឹងទៀតថា អំពើពុករលួយរបស់លោក វ៉ាន់ ក្តេ មេគយច្រកអូរស្មាច់ អាចប្រព្រឹត្តទៅដោយរលូនគឺមានការរួមដៃពីលោក គួន សុភាព មេគយចល័តខេត្តឧត្តរមានជ័យ ផងដែរ។ មានន័យពួកគេត្រូវធ្វើការជាប្រពន្ធ័ទើបធ្វើបាន៕
