ភ្នំពេញ ៖ ស្ងាត់ៗ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា លោក ង្វៀង ភូជុង អគ្គលេខាបក្សកុម្មុយនីស្ដវៀតណាម និងលោក ថងលូន ស៊ីស៊ូលីត អគ្គលេខាបក្សប្រជាជនបដិវត្តន៍ឡាវ នៅថ្ងៃទី២៦ ខែកញ្ញា ឆ្នាំ២០២១នេះ បានជួបពិភាក្សាជាមួយគ្នានៅទីក្រុងហាណូយ សាធារណរដ្ឋសង្គមនិយមវៀតណាម ។ជំនួបកំពូលរវាងមេបក្សកាន់អំណាចប្រទេសឥណ្ឌូចិននេះធ្វើឡើងនាទីស្នាក់ការកណ្តាលគណបក្សកុម្មុយនីស្ដវៀតណាម។
អំពីជំនួបនោះសេចក្តីប្រកាសរបស់គណបក្សប្រជាជនកម្ពុជា បានឲ្យដឹងថា៖មេដឹកនាំគណបក្សនីមួយៗបានជូនដំណឹងគ្នាទៅវិញទៅមកអំពីសភាពការណ៍ក្នុងប្រទេសរៀងៗខ្លួន ក្នុងនោះមានការងារគណបក្ស ការងារអភិវឌ្ឍសេដ្ឋកិច្ច សង្គម ពិសេសក្នុងទិដ្ឋភាពបង្ការ និងប្រឆាំងជំងឺកូវីដ-១៩។មេដឹកនាំនៃគណបក្សទាំងបី បានពិគ្រោះយោបល់គ្នាអំពីកិច្ចកិច្ចសហប្រតិបត្តិការក្នុងរយៈពេលកន្លងមក និងបានពិភាក្សាអំពីទិសដៅនៃកិច្ចសហប្រតិបត្តិការសម្រាប់រយៈពេលខាងមុខ ហើយបានឯកភាពរួមគ្នាអំពីសារៈសំខាន់ នៃទំនាក់ទំនងជាប្រពៃណី សាមគ្គីភាព មិត្តភាព ស្អិតរមួតរវាងបក្សទាំងបីនៃប្រទេសទាំងបី។
មេដឹកនាំនៃគណបក្ស ទាំងបី បានឯកភាពបង្កើនកិច្ចសហប្រតិបត្តិការលើគ្រប់វិស័យ ព្រមទាំងពង្រឹង និងពង្រីកដោយប្រសិទ្ធភាពនូវបណ្តា យន្តការដែលមានស្រាប់ និងបន្តពិគ្រោះយោបល់សម្រាប់កិច្ចសហប្រតិបត្តិការលើគ្រប់វិស័យសម្រាប់ពេលខាងមុខ ដើម្បីផលប្រយោជន៍នៃប្រជាជនរបស់ប្រទេសទាំងបី ក្នុងគោលដៅរក្សាបាននូវសន្តិភាព ស្ថិរភាព សហប្រតិបត្តិការ និងអភិវឌ្ឍក្នុងតំបន់ និងលើពិភពលោក។
មានការកត់សម្គាល់ថាជំនួបនេះបានកើតឡើងក្នុងពេលដែលតំបន់សមុទ្ទចិនខាងត្បូងមានភាពតានតឹងដោយកម្លាំងយោធានិងបន្ទាប់ពីប្រធានាធិបតីវៀតណាមកាលពិថ្ងៃទី២៥កញ្ញាថ្លែងទៅកាន់អង្គប្រជុំលើកទី៧៦អង្គការសហប្រជាជាតិព្រមានមិនចេញឈ្មោះស្តីពីភាពតានតឹងនិងការអាចមានផ្ទុះសង្គ្រាមដែលបង្កឡើងដោយប្រទេសមួយនិងក្នុងពេលដែលកម្ពុជានឹងក្លាយជាប្រធានអាស៊ាននៅឆ្នាំ២០២២ខាងមុខផងដែរ ៕
