កំពត៖ មាត់ព្រែកកំពត ប្រវែងប្រមាណ១០០០ម៉ែត្រ នៅចំណុចភូមិជុំគ្រៀល ឃុំជុំគ្រៀល ស្រុកទឹកឈូជាប់នឹងផ្លូវដែលតភ្ជាប់ពីទីរួមខេត្តទៅកាន់តំបន់កំពង់ផែ ទេសចរណ៏ថ្មី ត្រូវបានគេឃុបឃិតគ្នាលួចដឹកអាចម៏ដីចាក់លប់ចូលជ្រៅទៅ ក្នុងផ្ទៃទឹកព្រែកជម្រៅពី៥០ទៅ១០០ម៉ែត្រយកធ្វើកម្មសិទ្ធ ។
ប្រជាពលរដ្ឋដែលមានដីនៅតំបន់នោះបានអះអាងថា ដីមាត់ព្រែកកំពតនេះពីមុនមកមិនត្រូវបានអាជ្ញាធរអនុញាតឲ្យបុគ្គលណាម្នាក់ ចាក់ដីលប់រំលោភយក ឬទោះបីមានប្រជាពលរដ្ឋទៅតាំងទីលំនៅខ្លះៗក៏ដោយ ក៏អាជ្ញាធរមិនបានចេញកម្មសិទ្ធិ ឬផ្ដល់សិទ្ធិស្របច្បាប់ឲ្យនោះដែរ ព្រោះតាមគម្រោងផែនការខេត្ត ដីនៅជាប់មាត់ព្រែកកំពតនេះ គឺអាជ្ញាធរទុកបំរុងសំរាប់ធ្វើសួនច្បារ ឬកន្លែងបំរើអោយសេវាកំសាន្តសាធារណៈតែប៉ុណ្ណោះ។
ទីតាំងនេះ ជនមិនស្គាល់មុខបានឃុបឃិតគ្នា ដឹកដីចាក់លប់ទាំងយប់ទាំងថ្ងៃ ទាំងតាមរថយន្តក៏ដូចតាមទូកផងដែរ ដើម្បីបង្កើតដីគោកលយចូលទៅក្នុងទឹកព្រែក ជំរៅពី៥០ម៉ែត្រទៅ ១០០ម៉ែត្រ ប្រយោជន៏វាស់ចែកគ្នា ឬក៏លក់ទៅឲ្យឈ្មួញនានាដែលគេអះអាងថា គេហ៊ានទិញក្រោមរូបភាពជួលរយៈពេល៣០ឆ្នាំពីខេត្ត ១ម៉ែត្រដើរតម្លៃរាប់រយ-ពាន់ដុល្លារឯណោះ។
អ្នកស្រុកបានអះអាងថា ដីមាត់ព្រែកកំពតពីទីរួមខេត្ត ទៅកាន់តំបន់កំពង់ផែទេសចរណ៏ ដែលគេគ្រោងបង្កើតថ្មីកសាងដោយធនាគារអភិវឌ្ឍន៏អាស៉ី ភាគច្រើនត្រូវបានកាន់កាប់ដោយឯកជនស្ទើរតែអស់ទៅហើយ នៅសល់ចំណុចមួយចំនួនដែលនៅក្បែរៗផ្លូវប៉ុណ្ណោះ ដូចជាចំណុចខាងលើជាដើម។
ចំណុចដែលនៅសល់នេះ អ្នកស្រុកបានលើកឡើងថា អាជ្ញាធរខេត្តគួរតែរក្សាទុកធ្វើជាសួនច្បារសាធារណៈលើកស្ទួយសោភ័ណ្ឌភាពខេត្តទើបជាការល្អ មិនគួរបិទភ្នែកឲ្យឈ្មួញ និងមន្ត្រីឃុបឃិតគ្នាចាក់ដីលប់រួចហើយពុះឡូត៌លក់ឲ្យឈ្មួញកាន់កាប់ ឬយកទៅធ្វើ អាជីវកម្មជាភោជនីដ្ឋាន ផ្ទះសំណាក់ ឬសេវាកម្មផ្សេងៗដែលនាំអោយប៉ះពាល់ដល់បរិស្ថានទឹកព្រែកនោះទេ។
សូមបញ្ជាក់ថាកន្លងមកមានសេចក្តីរាយាការណ៍ថាមានបុគ្គលឈ្មោះ ហេង សុភី ដែលអ្នកកំពតស្គាល់ថា ជាអ្នកមានលុយស្តុកស្តម្ភ និងសង្ស័យមានអ្នកមានអំណាច នៅពីក្រោយខ្នងទៀតផងមិនដឹងបានធ្វើសកម្មភាពចាក់ដីរំលោភយកព្រែក។បើតាមសេចក្តីរាយការណ៍ថា ករណីចាក់ដី បូមដី និងធ្វើសំណង់រឹងបំពានដីចំណីព្រែក និងដងព្រែក មាននៅតាមដងព្រែកកោះតូច ស្ថិតនៅចំណុចជិតស្ពានរថភ្លើង ដែលមានព្រំប្រទល់រវាងភូមិព្រែកចេក និងភូមិគីឡូ១២ ក្នុងឃុំកោះតូច ស្រុកទឹកឈូ ខេត្តកំពត គឺជាករណី បំពានខុសគោលការណ៍បច្ចេកទេស នីតិវិធីច្បាប់ និងការកំណត់ដីចំណីព្រែកផងដែរ ចាំមើលមើលតើអាជ្ញាធរខេត្តកំពតរបស់លោកជាវតាយ មានការពន្យល់យ៉ាងណាវិញ?៕