ភ្នំពេញ ៖ ថ្មីៗនេះមហាជនអ្នកលេងបណ្តាញសង្គមមានការភ្ញាក់ផ្អើលចំពោះវត្តមានលោកចាន់សម័យក្លាយជាថៅកែលក់ដីឡូត៍មួយរូបជ្រកក្រោមឈ្មោះអគ្គនាយកក្រុមហ៊ុន C. D. Land។ប្រការនេះធ្វើឲ្យមានសំណួរជាច្រើនលើកឡើងថាអ្នកណាជាអ្នកជប់ចម្រៀងរូបនេះឲ្យក្លាយជាថៅកែនិងខ្លះនិយាយថាលោកចាន់សម័យជីកកំណប់ណាបានឆាប់មានម្លេះ?។
ប្រសិនបើគេមិនទាន់ភ្លេចទេកាលពី២ឆ្នាំមុន(ឆ្នាំ២០១៩) ម្ចាស់បទ «សុំមេមាន់មួយ» តារាចម្រៀង លោក ចាន់ សម័យ ត្រូវមហាជនដឹងឮថា មានជីវិតធ្លាក់ខ្លួន លំបាករស់នៅក្នុងផ្ទះតូចមួយមានជម្ងឺប្រចាំកាយ រួមនឹង សម្រស់ដែលប្រែប្រួលមើលស្ទើរមិនស្គាល់ ខណៈពេលនោះហ្វេនៗនិងអ្នកសិល្បៈ នរណាៗក៏ភ្ញាក់ផ្អើលដែរ។ ក្រោយពីបានឃើញ លោក ចាន់ សម័យ ធ្លាក់ខ្លួនបែបនេះ ស្របពេលមានជំងឺពុំអាចចេញច្រៀងរកប្រាក់កម្រៃផ្គត់ផ្គង់ជីវភាពគ្រួសារដ៏គួរឲ្យអាណិតជាខ្លាំង ឃើញថាមានមិត្តៗក្នុងសិល្បៈជាច្រើន បានជួយជ្រោមជ្រែង ផ្តល់ជាថវិកាជាហូរហែ ដើម្បីឲ្យលោកអាចដោះស្រាយការលំបាកក្នុងគ្រួសារបានខ្លះ និងក៏ដូចផ្តល់កម្លាំងចិត្ត ឲ្យលោកបានវិលត្រឡប់មកកាន់វិថីសិល្បៈវិញផងដែរ។
លើសពីនេះ អ្វីដែលរំភើបជំនួសនោះ លោក ចាន់ សម័យ ក៏បានទទួលអំណោយផ្ទះវីឡាតឿមួយខ្នង ក្នុងបុរី ឡេង ណាវ៉ាត្រា (នៅម្តុំទួលពង្រ) សង្កាត់ចោមចៅ ពីសម្តេច ហ៊ុន សែន និងសម្តេចកត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផងដែរ។
មិនតែប៉ុណ្ណោះ ក្រោយពីដឹងថា តារាចម្រៀងជើងចាស់រូបនេះ មានជីវិតរស់នៅលំបាកយ៉ាងដូច្នេះ បងប្អូនខ្មែរជាច្រើន ព្រមទាំំង អ្នករួមអាជីពសិល្បៈជាមួយគ្នា បានឧបត្ថម្ភតាមសទ្ធា រហូតដល់តារាចម្រៀងរូបនេះ មានលទ្ធភាពព្យាបាលជំងឺរបស់ខ្លួន រហូតដល់សះស្បើយ។ថ្មីៗនេះ គេក្រឡេកឃើញ មុខមាត់របស់រូបលោក ប្រែស្រស់បស់មិនដូចមុន លើសពីនេះទៅទៀត មើលទៅរូបលោក ក៏កំពុងមានជីវភាពល្អគួរសម ហើយអ្វីដែលនឹកស្មានមិនដល់នោះ គឺពេលនេះ រូបលោក បានក្លាយជា អគ្គនាយកក្រុមហ៊ុន C. D. Land ដែលមានលក់ដីឡូតិ៍ជាច្រើន ទៀតផង៕