ភ្នំពេញ៖ ស្ត្រីជនជាតិខ្មែរ ដែលបានទៅរស់នៅប្រទេសចិន ហើយត្រូវប្តីជនជាតិចិនធ្វើទារុណកម្មអស់រយៈពេល ៤ឆ្នាំ ត្រូវបានក្រសួងការបរទេស និងសហប្រតិបត្តិការអន្តរជាតិ ស្ថានទូតកម្ពុជា និងនគរបាលចិន ជួយអន្តរាគមន៍សង្គ្រោះបានហើយ។
លោក ស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ នៃគណៈកម្មាធិការជាតិប្រយុទ្ធប្រឆាំងនឹងអំពើជួញដូរមនុស្ស នៅថ្ងៃទី២១ ខែកញ្ញា ឆ្នាំ២០២១បានប្រាប់កាសែតថា «ស្ត្រីជាជនរងគ្រោះ ឈ្មោះ អាត់ សុភ័ក្រ ភេទស្រី អាយុ២៥ឆ្នាំ រស់នៅទីក្រុងណានឆាង (Nanchang) ខេត្ត ជៀងស៊ី(Jiangxi )ប្រទេសចិន។ បច្ចុប្បន្ន ជនរងគ្រោះមានសុវត្ថិភាពហើយ ដោយកំពុងស្ថិតនៅជាមួយ នគរបាលចិនដើម្បីអនុវត្តនីតិវិធីបន្ត។ មន្ត្រីជំនាញ នឹងបន្តស្វែងរកមេខ្យល់ដើម្បីចាត់ការតាមនីតិវិធីទៀត»។
សូមបញ្ជាក់ថា ស្ត្រីជាជនរងគ្រោះខាងលើ ត្រូវបានប្តីចាប់បង្ខំធ្វើបាបនៅប្រទេសចិនយ៉ាងដំណំ អស់រយៈពេល ៤ឆ្នាំមកហើយ ដោយបានបិទសិទ្ធមិនឱ្យមានការទំនាក់ទំនងជាមួយគ្រួសារនោះឡើយ ដោយឡែកជាសំណាងល្អមួយ បានអ្នកជិតខាងជួយតាមរយៈការថតបង្ហោះវីដេអូ តាមបណ្តាញសង្គម Tik Tok ស្នើសុំការជួយសង្គ្រោះពីសម្តេចតេជោ ហ៊ុន សែន។ក្នុងវីដេអូនោះ ស្ត្រីរងគ្រោះបានអំពាវនាវ ទាំងទឹកមុខក្រៀមក្រំថា «សូមសម្តេច ហ៊ុន សែន ជួយនាងខ្ញុំផង ឱ្យបានទៅខ្មែរវិញផង»៕
