កំពង់ធំ៖ មេឈ្មួញឈើប្រចាំស្រុកសន្ទុកឈ្មោះធួក ដែលគេល្បីថាជាមេឈ្មួញដុះស្លែខាងដឹកជញ្ជូនផលអនុផលព្រៃឈើចេញពីតំបន់ព្រៃអង់តែនបានសម្រេចចិត្តដុតឈើក្នុងឡានដើម្បីគេចខ្លួនបន្ទាប់ពីត្រូវសមត្តកិច្ចមេព្រែស្ទាក់ឃាត់កាលពីវេលាម៉ោងប្រមាណ ២:១៥នាទីរសៀលថ្ងៃទី ១៨ កញ្ញា ២០២១ត្រង់ចំណុចភូមិខ្វែក ឃុំកំពង់ថ្ម ស្រុកសន្ទុក ខេត្តកំពង់ធំ។
ប្រភពពីសមត្ថកិច្ចបានឲ្យដឹងថារថយន្តដែលឃាត់នោះជាប្រភេទរថយន្តកូរ៉េ 3 តោន ក្បាលពណ៌ស ទ្រង់ពណ៌បៃតង ដឹកប្រភេទឈើចម្រុះ ចេញពីតំបន់ព្រៃអង់តែន ជាឈើមិនគ្រប់អាយុកាប់ដែលរដ្ឋបាលព្រៃឈើហាមឃាត់។បច្ចុប្បន្នវត្ថុតាងប្រភេទឈើចម្រុះត្រូវបានយកមករក្សាទុកនៅផ្នែករដ្ឋបាលព្រៃឈើកំពង់ថ្ម ដោយឡែករថយន្តត្រូវបានជនល្មើសឈ្មោះធួក និង បក្ខពួកយកសាំងដុតក្នុងឡានដើម្បីបំភ័យសមត្ថកិច្ច រួចបើករត់គេចបាត់ស្រមោល! ។ពេលនេះសមត្ថកិច្ចប្រាប់ថាកំពុងតែកសាងសំណុំរឿងនិងចំណាត់ការបន្តតាមនីតិវិធី ស្វែងរករថយន្តដែលជាមធ្យោបាយដ៏សំខាន់ខាងដឹកជញ្ជូនផលអនុផលព្រៃឈើយកមកចំណាត់ការតាមច្បាប់។
