ក្រចេះ៖ បុរសអ្នកនេសាទម្នាក់ ត្រូវខ្មាន់កាំភ្លើង មិនស្គាល់មុខ បាញ់ឲ្យរងរបួសត្រង់ត្រគៀក នៅវេលាម៉ោង១១ និង៣០ ថ្ងៃត្រង់ ថ្ងៃទី២៦ ខែសីហា ឆ្នាំ២០១៦ នៅកណ្ដាលទន្លេ ចំនុចអន្លង់ត្រឡោក ស្ថិតក្នុងភូមិប្រពន្ធតាជា ឃុំអូរគ្រៀង ស្រុកសំបូរ ខេត្តច្រេះ ។
ជនរងគ្រោះបានរៀបរាប់ឲ្យដឹងថា ខ្លួនឈ្មោះ ជីវ ឃឹមសុខខន ភេទប្រុសអាយុ អាយុ២៤ឆ្នាំ រស់នៅភូមិកំពង់រទេះ ឃុំបឹងចារ ស្រុកសំបូរ ខេត្តក្រចេះ ខ្លួនបានទៅលើកលប មានគ្នាចំនួនពីរនាក់ ពេលលើកលបហើយ ខ្លួនក៏បានបើកទូកត្រឡប់មកវិញ ដល់ចំនុចកើតហេតុ ខ្លួនបើកទូក ទន្ទឹមនឹងទូកមួយទៀត មានគ្នាពីរនាក់ដែរ ចំងាយពីគ្នាប្រហែលពី៣០ទៅ៤០ម៉ែត្រ តែខ្លួនស្គាល់អ្នកទាំងនោះទេ ពេលកំពុងបើកទូក ស្រាប់តែទូកម្ខាងទៀត អ្នកអង្គុយចំកណ្ដាលទូកលើកកាំភ្លើងអាកាស្វាយបត់ បាញ់រះមកលើទូករបស់ខ្លួន ចំនួន៧គ្រាប់ បណ្ដាលត្រូវចំត្រគៀក ហើយខ្លួនក៏បានឈប់ទូកដេកក្នុងទូក ហើយរួមដំណើរជាមួយគាត់ បើកទូកដឹកគាត់យកមកភូមិ ដើម្បីទៅព្យាបាល ចំណែកទូកម្ខាងទៀត ជាខ្មាន់កាំភ្លើង បានបើកទូកត្រឡប់ឡើងលើវិញ គឺសំដៅទៅភូមិប្រពន្ធតាជា។
ករណីនេះ លោក ណយ ស៊ីថាច អធិការងស្រុកសំបូរ ទទួលកាងារព្រហ្មទណ្ឌ បានឲ្យដឹងនៅព្រឹកថ្ងៃទី២៧នេះថា លោកកំពុងនាំ កំលាំងនៅកណ្ដាលទន្លេ ដើម្បីស៊ើបអង្កេត តែមិនទាន់មានតំរុយនៅឡើយទេ ហើយកំពុងស្រាវជ្រាវ ដើម្បីចាប់ខ្លួនជនល្មើសមកផន្ទាទោសតាមច្បាប់ ។
បច្ចប្បន្ន ជនរងគ្រោះកំពុងសំរាកព្យាបាល នៅមន្ទីរពេទ្យបង្អែកខេត្តក្រចេះ ៕