ភ្នំពេញ ៖ គ្រឿងឧបភោគ បរិភោគ ដែលមានដូចជា អង្ករ មី ទឹកស៊ីអុីវ ត្រីខ និងម៉ាសបីស្រទាប់ផងដែរនោះ ត្រូវបានអង្គការទស្សនៈពិភពលោក(World vision) ប្រគល់ជូនរដ្ឋបាលរាជធានីភ្នំពេញ ដើម្បីចូលរួមទប់ស្កាត់ការរីករាលដាលនៃមេរោគកូវីដ-១៩ នៅរាជធានីភ្នំពេញ ខណៈដែលជម្ងឺនេះបាននឹងកំពុងរីករាល ដាលខ្លាំង ដោយមានអ្នកឆ្លងរហូតដល់រាប់ពាន់នាក់ និងមានអ្នកស្លាប់ជាបន្តបន្ទាប់ដែរនោះ។
ពិធីប្រគល់ និងទទួលនេះ បានធ្វើឡើងកាលពី រសៀថ្ងៃទី២៣ ខែមេសា ឆ្នាំ២០២១ នេះ នៅសាលារាជធានីភ្នំពេញក្រោមវត្តមាន លោក ហុក ហួរលីម នាយករដ្ឋបាលស្តីទី សាលា រាជធានីភ្នំពេញ។
លោក ហុក ហួរលីម បានមានប្រសាសន៍ថា ក្នុងនាមលោកតំណាងអោយ លោកឃួង ស្រេង អភិបាលរាជធានី មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទាំងអស់ នៅរាជធានីភ្នំពេញសូមថ្លែងអំណរគុណយ៉ាងជ្រាលជ្រៅចំពោះអង្គការទស្សនៈពិភពលោក ដែលបានជួយឧបត្ថមជា អង្ករ មី ទឹកស៊ីអុីវ ត្រីខ និងម៉ាសបីស្រទាប់មករដ្ឋបាលរាជធានីភ្នំពេញ ដើម្បីចូលរួមទប់ស្កាត់ការរីករាលដាលនៃជំងឺកូវីដ-១៩។ តាមរយកាយវិការ ដ៏ល្អប្រពៃ ប្រកបដោយមនុស្សធម៌ និងគុណធម៌ខាងលើនេះរបស់អង្គការទស្សនៈពិភពលោក គឺពិតជាបានរួមចំណែកយ៉ាងសំខាន់ជាមួយរដ្ឋបាលរាជធានីភ្នំពេញ និងរាជរដ្ឋាភិបាល ស្របតាមការអំពាវនាវរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការចាត់វិធានការទប់ស្កាត់ការរីករាល ដាលនៃមេរោគកូវីដ-១៩ នៅរាជធានីភ្នំពេញ ក៏ដូចជានៅទូទាំងព្រះរាជាណាចក្រកម្ពុជា បានទាន់ពេលវេលា។
សូមបញ្ជាក់ថា៖ អំណោយជាគ្រឿងឧបភោគ បរិភោគ ខាងលើនេះរួមមាន អង្ករចំនួន៣តោនកន្លះ ទឹកស៊ីអុីវ៥០ឡូ ត្រីខ៥០យួរ និងម៉ាសបីស្រទាប់ ១០.០០០ម៉ាស ៕