ភ្នំពេញ៖ លោក ឃួង ស្រេង អភិបាលរាជធានីភ្នំពេញ បានធ្វើការអំពាវនាវដល់ បងប្អូន ប្រជាពលរដ្ឋចូលរួមអនុវត្តឱ្យបាននូវការដាក់ បម្រាមបិទខ្ទប់រាជធានីភ្នំពេញ ដើម្បីកាត់ផ្តាច់ការឆ្លងរាលដាលជំងឺកូវីដ-១៩ បើមិនដូច្នោះទេការបិទខ្ទប់នឹងអាចបន្តពន្យាពេលយូរជាង នេះថែមទៀត។ ការអំពាវនាវដូចនេះ បានធ្វើឡើង.នៅព្រឹកថ្ងៃទី២៣ ខែមេសា ឆ្នាំ២០២១ ក្នុងពេលនាំយកអំណោយសម្តេចតេជោ ហ៊ុន សែន ចែកជូនប្រជាពលរដ្ឋចំនួន ២១៦៣គ្រួសារ រស់នៅក្នុងតំបន់ផ្សារសាំហាន់ សង្កាត់ទួលសង្កែទី១ និងទី២ ខណ្ឌឬស្សីកែវ។
លោក ឃួង ស្រេង ក្នុងពេលសាកសួរសុខទុក្ខ និងចែកអំណោយដល់ប្រជាពលរដ្ឋនោះ ក៏បានលើកឡើងនូវគោលនយោបាយរបស់សម្តេចតេជោនាយករដ្ឋមន្ត្រី ដោយ មិនទុកឱ្យប្រជាពលរដ្ឋណាម្នាក់ស្លាប់ដោយការអត់បាយនោះឡើយ។ រាជធានីភ្នំពេញមានទីស្នាក់ការសង្កាត់នៅជិតទីស្នាក់ការខណ្ឌ នៅជិតរួមទាំងទីស្នាក់ការសាលារាជធានីភ្នំពេញថែមទៀត សម្រាប់បម្រើដល់តម្រូវការប្រជាពលរដ្ឋ ជាពិសេសពលរដ្ឋដែលជួបបញ្ហាខ្វះខាតស្បៀង អាចទំនាក់ទំនងទៅគោលដៅរដ្ឋបាលណាដែលនៅជិត ហើយអាជ្ញាធររាជធានីភ្នំពេញ ខណ្ឌ សង្កាត់ តែងផ្តល់ និងផ្សព្វផ្សាយនូវប្រព័ន្ធទូរស័ព្ទនានា សម្រាប់ប្រជាពលរដ្ឋទាក់ទងសំណូមពរ និងរកជំនួយផ្សេងៗផងដែរ។
អភិបាលរាជធានីភ្នំពេញ បានអំពាវនាវដល់ប្រជាពលរដ្ឋដោយអត់ធ្មត់ថា ក្នុងនាមអាជ្ញាធរមានសមត្ថកិច្ចកំពុងអនុវត្តច្បាប់ទូទាំងរាជធានីភ្នំពេញ មិនដែលចង់ធ្វើការផាកពិន័យដល់ពលរដ្ឋណាម្នាក់នោះឡើយ ដោយសូមឱ្យតែប្រជាពលរដ្ឋចូលរួមទាំងអស់គ្នា អនុវត្តវិធានការបិទខ្ទប់ភូមិសាស្ត្ររាជធានីភ្នំពេញឱ្យទទួលបានជោគជ័យ កាត់ផ្តាច់ឱ្យបានការឆ្លងរាលដាលជំងឺកូវីដដ៏សាហាវក្នុងពេលវេលាដ៏លំបាកមួយនេះទាំងអស់គ្នា។ ប្រសិនប្រជាពលរដ្ឋនៅតែរឹងទទឹង នៅតែដើរហើរ នៅតែដើរញុំា នៅតែប្រមូលផ្តុំ ពីផ្ទះមួយទៅផ្ទះមួយ ពីបន្ទប់មួយទៅបន្ទប់មួយ នោះមិនអាចធានាបានថា ការដាក់បម្រាមនេះនឹងទទួលបានជោគជ័យនោះឡើយ ដែលនាំការបិទខ្ទប់រាជធានី អាចនឹងពន្យាពេលយូរជាងនេះថែមទៀត។
អភិបាលរាជធានី ក៏បានលើកឡើងជាថ្មីទៀតផងដែរ នូវវិធានការបិទខ្ទប់ភូមិសាស្ត្រ ដែលមានហានិភ័យ មិនមែនមានតែនៅកម្ពុជាទេ ខណៈជំងឺកូវីដ-១៩ ដែលកំពុងវាយលុកលើពិភពលោក ប្រទេសដែលជួបហានិភ័យខ្លាំង ក៏អនុវត្តវិធានការបិទខ្ទប់នេះផងដែរ។
ការបង្កាទប់ស្កាត់ការឆ្លងរាលដាលជំងឺដ៏សា ហាវនេះឱ្យបានជោគជ័យ គឺអាស្រ័យលើការអនុវត្តរបស់ប្រជាពលរដ្ឋ ដែលជាឧត្តមប្រយោជ ន៍រួម មិនមែនជាប្រយោជន៍របស់បុគ្គលណា ម្នាក់នោះឡើយ។
សូមបញ្ជាក់ថា៖ ក្នុងរយៈពេលដែលរាជធានីភ្នំពេញកំពុងស្ថិតក្នុងដំណាក់កាលបិទខ្ទប់ និងតំបន់ខ្លះ បាននិងកំពុងដាក់ជាតំបន់ក្រហមនេះ អាជ្ញាធររាជធានី អាជ្ញាធរខណ្ឌ បាន នាំយកស្បៀងអាហារ ចែកជូនដល់ប្រជាពលរដ្ឋ កម្មករ កម្មការិនី ជារៀងរាល់ថ្ងៃ។ ស្បៀងអាហារដែលជាអំណោយរបស់សម្តេចតេជោ ដែលត្រៀម និងបានចែកជូនដល់ប្រជាពលរដ្ឋជាបន្តបន្ទាប់នោះ រួមមាន អង្ករ២៥គីឡូក្រាម, មី ១កេស,ត្រីខ១យួរ, ទឹកត្រី១យួរ, និងទឹកស៊ីអ៊ីវ១យួរ ៕
