ខេត្តប៉ៃលិន ៖ គ្រោះថ្នាក់ចរាចរមួយ បានកើតឡើង រវាងម៉ូតូ បុកជាមួយម៉ូតូ បណ្តាលមនុស្ស២នាក់រងរបួសធ្ងន់ និងម្នាក់ទៀតរបួសស្រាល កាលពីវេលាម៉ោង១៩និង៤៥ យប់ថ្ងៃទី២៦ ខែសីហា ឆ្នាំ២០១៦ លើកំណាតផ្លូវជាតិលេខ៥៧ ស្ថិតក្នុងភូមិអូរតាពុកក្រោម សង្កាត់ទូលល្វា ក្រុងប៉ៃលិន ខេត្តប៉ៃលិន ។
ប្រភពព័ត៌មាន ពីកន្លែងកើតហេតុបានឲ្យដឹងថា: មុនពេលកើតហេតុ គេឃើញម៉ូតូមួយគ្រឿងម៉ាក០១៦ ពាក់ស្លាកលេខ ប៉ៃលិន 1C-1539 ជិះឌុបគ្នាពីរនាក់ក្នុងទឹសដៅពីកើតមកលិច បម្រុងនិងបត់ទៅខាងធ្វេងដៃ ស្រាប់តែមានម៉ូតូមួយគ្រឿងទៀត ម៉ាក០១៥ ពាក់ស្លាកលេខប៉ៃលិន1B-1578 ជិះម្នាក់ឯង ក្នុងទឹសដៅបញ្រា្ជស់ទឹសគ្នា រួចក៏បុកម៉ូតូ០១៦ពេញទំហឹង បណ្តាលឲ្យដួលបោកក្បាលខ្លួនឯង សន្លប់ស្តូកស្តឹង និងអ្នករួមដំណើរជាមួយម៉ូតូមួយទៀតសន្លប់និងកន្លែងផងដែរ ។ក្រោយពេលកើតហេតុ គេឃើញរថយន្តរបស់មន្ទីរពេទ្យបង្អែកខេត្តប៉ៃលិន មកដឹកយកទៅសង្គ្រោះភ្លាមៗផងដែរ ។
បើតាមសមត្ថកិច្ចចរាចរណ៍ នៃស្នងការនគរបាលខេត្តប៉ៃលិន បានឲ្យដឹងថា: ជនរងគ្រោះឈ្មោះ ឈិន មុំ ភេទស្រី អាយុ១៥ឆ្នាំ រងរបួសធ្ងន់ រស់នៅភូមិអូរខ្ទីង សង្កាត់អូរតាវ៉ៅ ក្រុងប៉ៃលិន ជាអ្នករួមដំណើរ ចំណែកអ្នកបើកបរម៉ូតូឈ្មោះ ផន ចាម ភេទប្រុស អាយុ៥៥ឆ្នាំ ជាអ្នករត់ឌុប រស់នៅភូមិថ្នល់កែង ឃុំអូរអណ្តូង ស្រុកសាលាក្រៅ ខេត្តប៉ៃលិន ជិះម៉ូតូម៉ាក០១៦ ស្លាកលេខប៉ៃលិន1C-1539 ពណ៌ខ្មៅ ។
ជនបង្កហេតុ មានឈ្មោះ ព្រិត ដន ភេទប្រុស អាយុ៣៧ឆ្នាំ រស់នៅភូមិបរឌិននៀវ សង្កាត់ប៉ៃលិន ក្រុងប៉ៃលិន រងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យខេត្តបាត់ដំបង ជិះម៉ូតូម៉ាក០១៥ ពាក់ស្លាកលេខ ប៉ៃលិន1B-1578 ពណ៌ខ្មៅ ។ បច្ចុប្បន្នម៉ូតូទាំង២គ្រឿង ត្រូវបានសមត្ថកិច្ចយកមករក្សាទុកនៅការិយាល័យចរាចរខេត្ត រងចំការដោះស្រាយគ្នាតាមផ្លូវច្បាប់៕ ទូច សុខន
