នៅព្រឹកថ្ងៃទី២៥ ខែសីហា ឆ្នាំ២០១៦ នៅសាលប្រជុំមន្ទីរសេដ្ឋកិច្ចនិងហិរញ្ញវត្ថុ បានរៀបចំវគ្គ បណ្តុះបណ្តាល ផ្សព្វផ្សាយការយល់ដឹងស្តីពីការបញ្ជ្រាបយេនឌ័រ និងការទប់ស្កាត់ការប្រើប្រាស់គ្រឿងញៀនក្នុងវិស័យទេសចរណ៍ ក្រោមអធិបតីភាព លោកជំទាវ ហ៊ុន ដានី អនុរដ្ឋលេខាធិការ និងជាប្រធានក្រុមការងារយេនឌ័រក្រសួងទេសចរណ៍ លោកជំទាវ ជា លាភ អភិបាលរងខេត្តប៉ៃលិន ទទួលបន្ទុកការងារទេសចរណ៍ លោកលោកស្រីប្រធានអនុប្រធានមន្ទីរគ្រប់ស្ថាប័នក្នុងខេត្ត ក្រុង/ស្រុក និងអាជីវករជាច្រើននាក់ទៀតផងដែរ។
លោកស្រី ស្រ៊ី ឌី អនុប្រធានមន្ទីរទេសចរណ៍ខេត្តប៉ៃលិន បានអានរបាយការណ៍សង្ខេបស្តីពីកិច្ចការងារយេនឌ័រ របស់មន្ទីរទេសចរណ៍កន្លងមកដូចជា៖ បានផ្តល់នូវការយល់ដឹង ស្តីពីការបញ្ជ្រាបយេនឌ័រជូន ដល់មន្ត្រីបុគ្គលិកមន្ទីរទេសចរណ៍ និងទប់ស្កាត់ ការប្រើប្រាស់គ្រឿងញៀន បានរៀបចំដំណែងតួនាទីស្ត្រី នៅក្នុងមន្ទីរទេសចរណ៍ តាមការណែនាំ៥០ភាគរយ ជាមន្ត្រី-បុគ្គលិក ស្ត្រីមានឋានៈនិងតួនាទីដូចបុរស។ បានរៀបចំចាត់តាំងជនបង្គោលយេនឌ័ររបស់មន្ទីរទេសចរណ៍ចំនួន០២នាក់ បានសហការ និងចូលរួមកិច្ចការងារយេនឌ័រជាមួយមន្ទីរកិច្ចការនារី ក្នុងការចូលរួមវគ្គបណ្តុះបណ្តាល និងចុះបញ្ជ្រាបយេនឌ័រតាមសហគមន៍។ បានបញ្ជ្រាបយេនឌ័រ និងទប់ស្កាត់ការប្រើប្រាស់គ្រឿងញៀន ដល់ម្ចាស់និងបុគ្គលិកដែលប្រកបអាជីវកម្មលើវិស័យទេសចរណ៍ តាមរយៈវគ្គបណ្តុះបណ្តាលបដិសណ្ឋារកិច្ច វគ្គផ្សព្វផ្សាយច្បាប់ស្តីពីទេសចរណ៍ វគ្គផ្សព្វផ្សាយ ទីក្រុងស្អាត រមណីយដ្ឋានស្អាត សេវាល្អ ។
បន្ទាប់ពី លោកស្រី ប៉ូច វលក្ខណ៍ និងលោកឧត្តមសេនីយ៍ទោ ថោង សុគន្ធា ប្រធាននាយកដ្ឋាន ធ្វើបទបង្ហាញស្តីពីសភាពការគ្រឿងញៀននៅកម្ពុជានិងយេនឌ័ររួចមក លោក ជំទាវ ហ៊ុន ដានី អនុរដ្ឋលេខាធិការ និងជាប្រធានក្រុមការងារយេនឌ័រក្រសួងទេសចរណ៍ បានមានប្រសាសន៍ថា៖ វគ្គបណ្តុះបណ្តាល និងផ្សព្វផ្សាយការយល់ដឹងស្តីពីការបញ្ជ្រាបយេនឌ័រ និងការទប់ស្កាត់ការប្រើប្រាស់គ្រឿងញៀនក្នុងវិស័យទេសចរណ៍ពេលនេះអ្នកចួលរួមទាំងអស់មានការយល់ដឹងជ្រុលជ្រាបកាន់តែច្បាស់បន្ថែមទៀតដើម្បីយកទៅផ្សព្វផ្សាយបន្ត ។ លោកជំទាវ បានន្តថា៖ ស្ត្រីដើរតួនាទីយ៉ាងសំខាន់ក្នុងសង្គមគ្រួសារ និងលើកកំពស់ជីវភាពរស់នៅក្នុងគ្រួសារអោយកាន់តែប្រសើផងដែរ ។
ដូច្នេះយើងត្រូវរួមគ្នាលើកស្ទួយយេនឌ័រនិងចូលរួមបញ្ជ្រាបយេនឌ័រដល់បងប្អូនអាជីវករទាំងអស់ឲ្យយល់ដឹងឲ្យបានច្បាស់និងចូលរួមទប់ស្កាត់ការប្រើប្រាស់គ្រឿងញៀននិងលប់បំបាត់គ្រឿងញៀនតាមមណ្ឌលកំសាន្តនានា តាមផ្ទះសំណាក់ និងតាមសណ្ឋាគារផ្សេងៗ កុំមានជាដាច់ខាត ព្រោះគ្រឿងញៀនវាបំផ្លាញក្រុមគ្រួសារ និងសង្គមជាតិ។
លោកជំទាវបានជំរុញឲ្យថ្នាក់ដឹកនាំនិងមន្ត្រីនៃមន្ទីរទេសចរណ៍ត្រូវខិតខំបញ្ជ្រាបយេនឌ័រដល់បងប្អូនអាជីករ អប់រំផ្សព្វផ្សាយដល់បុគ្គលិននិងមន្ត្រីរាជការ នៅតាម បណ្តាញសង្គមដើម្បីឲ្យបងប្អូនយើងបានយល់ដឹងនិងយកទៅផ្សព្វផ្សាយបន្ត។
បងប្អូនអាជីរករទាំងអស់ មានសិទ្ធិរាយការជូន ដល់សមត្ថិកិច្ច រាល់សកម្មភាពការប្រើប្រាស់គ្រឿងញៀន នៅកន្លែងណាមួយ ដើម្បីឲ្យសមត្ថកិច្ចចុះបង្ក្រាបបានទាន់ពេលវេលា។ លោកជំទាវបាន ផ្តាំផ្ញើរដល់ថ្នាក់ដឹកនាំ និងមន្ត្រីមន្ទីរទេសចរណ៍ត្រូវធ្វើរបាយការណ៍ឲ្យបានជាប់ជាប្រចាំសំរាប់រាយការក្នុងត្រីមាសនិងឆមាស ។
ក្នុងឱកាសនោះ លោកជំទាវ ហ៊ុន ដានី អនុរដ្ឋលេខាធិការ និងជាប្រធានក្រុមការងារយេនឌ័រ ក្រសួងទេសចរណ៍បានប្រគល់វិញ្ញាប័ណ្ណបត្របញ្ចប់វគ្គបណ្តុះបណ្តាលដល់សិក្ខាកាមផងដែរ ៕
ទូច សុខន