ភ្នំពេញ ៖ សម្តេចក្រឡាហោម ស ខេង ផ្ដល់អំណោយសម្ភារៈ ជូនលោក ឃួង ស្រេង ដើម្បីយកចែកជូនបន្ដអ្នកធ្វើចត្ដាឡីស័ក ទីតាំងបិទខ្ទប់ភូមិសាស្ដ្រ ក្នុងរាជធានីភ្នំពេញ នាព្រឹកថ្ងៃពុធ ទី១៤ ខែមេសា ឆ្នាំ២០២១នេះ ជាមួយគ្នានោះ ក៏បានអញ្ជើញចុះសួរសុខទុក្ខកងកម្លាំង និងពិនិត្យមើលទីតាំងបិទខ្ទប់ ក្នុងមូលដ្ឋាន ខណ្ឌមានជ័យ ខណ្ឌសែនសុខ និងខណ្ឌពោធិ៍សែនជ័យ រាជធានីភ្នំពេញ ព្រមទាំងបានប្រគល់អំណោយរួមមានថវិកា ទឹកសុទ្ធ និងមីផងដែរ។
សូមបញ្ជាក់ថា ដើម្បីគ្រប់គ្រងការឆ្លងរាលដាលនៃជំងឺកូវីដ-១៩ ក្នុងសហគមន៍ អាជ្ញាធររាជធានីភ្នំពេញ បានដាក់ចេញនូវវិធានការបិទខ្ទប់នូវភូមិសង្កាត់មួយចំនួន រួមមាន៖ * ខណ្ឌសែនសុខ៖ ភូមិទ្រង់មាន់ នៃសង្កាត់អូរបែកក្អម ។ * ខណ្ឌមានជ័យ៖ ភូមិទាំងអស់ នៃសង្កាត់ស្ទឹងមានជ័យទី១, ភូមិទាំងអស់ នៃសង្កាត់ស្ទឹងមានជ័យទី២, ភូមិទ្រា៤ ភូមិដំណាក់ធំ២ ភូមិដំណាក់ធំ៣ នៃសង្កាត់ស្ទឹងមានជ័យទី៣ ។ * ខណ្ឌពោធិ៍សែនជ័យ៖ ភូមិចំការឪឡឹក១ ភូមិប៉ប្រកខាងជើង ភូមិប៉ប្រកខាងត្បូង ភូមិត្រពាំងល្វា១ នៃសង្កាត់កាកាបទី១, ភូមិចំការឪឡឹក២ នៃសង្កាត់កាកាបទី២, ភូមិត្រពាំងថ្លឹង២ ភូមិទួលពង្រ នៃសង្កាត់ចោមចៅទី១។
ការបិទខ្ទប់ភូមិសាស្ត្រមួយចំនួន ដែលមានការឆ្លងធ្ងន់ធ្ងរនេះ មានរយៈពេល១៤ថ្ងៃ គិតចាប់ពីម៉ោង ០០៖០០ ថ្ងៃទី១០ ដល់ថ្ងៃទី២៣ ខែមេសា ឆ្នាំ២០២១។ អំឡុងពេលបិទខ្ទប់ បុគ្គលគ្រប់រូបត្រូវបានហាមឃាត់ការធ្វើដំណើរចេញពីលំនៅឋាន ឬទីតាំងសំណាក់បច្ចុប្បន្ន លើកលែងតែក្នុងករណីចាំបាច់៕
