ខេត្តប៉ៃលិន៖ យុវជនម្នាក់ជិះម៉ូតូក្នុងល្បឿនលឿនចុះចំណោត ត្រង់ផ្លូវប្រសព្វគ្នារវាងផ្លូវ ជាតិលេខ ៥៧ និងផ្លូវជាតិលេខ ៥៩ ហើយបានជ្រុលទៅបុកម៉ូតូ១គ្រឿងទៀត យ៉ាងពេញទំហឹងក្នុងទិសដៅស្របទិសគ្នា រងរបួសខ្លួនឯងយ៉ាងធ្ងន់ធ្ងរ។
ហេតុការណ៍គ្រោះថ្នាក់ចរាចរនេះបានកើតឡើងនៅវេលាម៉ោង១៥និង៣០នាទីល្ងាច ថ្ងៃទី២៥ ខែសីហា ឆ្នាំ២០១៦ ត្រង់ចំនុចភូមិរថក្រោះឆេះ ឃុំស្ទឹងកាច់ ស្រុកសាលាក្រៅ ខេត្តប៉ៃលិន មានយុវជនម្នាក់ ឈ្មោះ អ៊ុំ វណ្ណា ភេទប្រុស អាយុ២២ឆ្នាំ មុខរបរជា ធ្វើចំការ រស់នៅទីតាំងកើតហេតុខាងលើ (រងរបួលធ្ងន់) បានជិះម៉ូតូ ម៉ាក់ MSX ពណ៌ខ្មៅ+លឿង កាំបន្ទះ ពាក់ស្លាកលេខ ប៉ៃលិន 1C-1010 បានបើកបរយ៉ាងលឿន ក្នុងទិសដៅពីលិចទៅកើត ចុះចំណោតលើដងផ្លូវជាតិលេខ ៥៧ ហើយក៍ជ្រុលទៅបុកជាមួយម៉ូតូម៉ាក Wave សេរីឆ្នាំ ២០០៩ ពណ៌សំបកឪឡឹក ពាក់ស្លាកលេខ ភព-8747 បើកបរដោយឈ្មោះ អេង អួង ភេទប្រុស អាយុ ១៨ឆ្នាំ មុខរប ធ្វើចំការ រស់នៅរកាបោះ ឃុំកំរៀង ស្រុកកំរៀង ខេត្តបាត់ដំបង (មិនមានរបួសទេ)
តាមសមត្ថកិច្ចចរាចរផ្លូវគោកខេត្តប៉ៃលិនបានឱ្យដឹងថា គ្រោះថ្នាក់ចរាចរនេះកើតឡើងដោយសារការបើកបរក្នុងល្បឿនលឿនដោយគ្មានការប្រុងប្រយ័ត្ន ហើយបច្ចុប្បន្នជនរងគ្រោះ កំពុងសំរាកព្យាបាលនៅមន្ទីរពេទ្យបង្អែកខេត្តប៉ៃលិន ចំណែកម៉ូតូទាំងពីរគ្រឿងត្រូវបានសមត្ថកិច្ចយកមករក្សាទុកនៅអធិការក្រុងប៉ៃលិន ដើម្បីដោះស្រាយទៅតាមផ្លូវច្បាប់ ៕
ទូច សុខន
