ភ្នំពេញ៖ លោក ឃួង ស្រេង អភិបាលរាជធានីភ្នំពេញ បានចុះសួរសុខទុក្ខ និងចែកអំណោយសម្ដេចតេជោ ជូន បងប្អូនកម្មករ កម្មការិនី កំពុងធ្វើចត្ដាឡីស័ក ដើម្បី បង្ការទប់ស្កាត់នូវជំងឺកូវីដ-១៩ ស្ថិតនៅ ភូមិ ត្រពាំងថ្លឹងទី២ សង្កាត់ចោមចៅទី១ ខណ្ឌពោធិ៏សែនជ៏យ ចំនួន២៣៣១គ្រួសារ កាលពីរសៀលថ្ងៃទី ១១ មេសា ឆ្នាំ២០២១ ។
ក្នុងឱកាសនោះ លោក ឃួង ស្រេង ក៏បានធ្វើការផ្ដាំផ្ញើរទៅបងប្អូន ពលរដ្ឋ និងកម្មករទាំងអស់ ដែលកំពុងធ្វើចត្ដាឡីស័កនេះ មិនគួរ ទៅទំនាក់ទំនងគ្នា ជជែកគ្នា ឬសួរសុខទុក្ខគ្នាពីផ្ទះមួយទៅផ្ទះមួយនោះទេ គឺត្រូវស្នាក់នៅក្នុងផ្ទះរបស់ខ្លួនឲ្យដាច់ដោយឡែកពីគ្នាដើម្បីកាត់បន្ថយឲ្យបាននូវការឆ្លងរាលដាលនូវជំងឺកូវីដ-១៩ទាំងអស់គ្នា ។
នេះជាការអំពាវនាវ ក៏ដូចជាការស្នើសុំរបស់លោកឃួង ស្រេង អភិបាលរាជធានីភ្នំពេញ ខណៈ លោកចុះចែកអំណោយ របស់សម្ដេចតេជោ ជូនបងប្អូនកម្មករ កម្មការិនីរោងចក្រចំនួន២៣៣១ គ្រួសារ ក្នុងពេល បងប្អូនកំពុងធ្វើចត្ដាឡីស័ក ដើម្បីបង្ការទប់ស្កាត់នូវជំងឺកូវីដ-១៩ នៅទីតាំងផ្ទះជួលចំនួន ២៥៦០ កន្លែង នៅក្នុងភូមិ ត្រពាំងថ្លឹង សង្កាត់ ចោមចៅទី១ ខណ្ឌ ពោធិ៏សែនជ័យ ។
លោក ឃួង ស្រេង. បានមានប្រសាសន៍ថា៖ ការបិទខ្ទប់លំនៅដ្ឋានរបស់បងប្អូនប្រជាពលរដ្ឋគឺធ្វើឡើងដោយការបង្ខំចិត្ត ដើម្បីទប់ស្កាត់នូវការឆ្លងរីករាល ដាលនៃជំងឺកូវីដ-១៩ ។ ដូច្នេះសូមបងប្អូនមេត្តាយោគ យល់ ។
ម្យ៉ាងវិញទៀត ខណៈបងប្អូនកំពុងបិទភូមិដ្ឋាននេះ បងប្អូនដាច់ខាតមិនគួរធ្វើទំនាក់ទំនង ជជែកគ្នាលេងឬ សាកសួរសុខទុក្ខគ្នាពីផ្ទះមួយទៅផ្ទះមួយនោះទេ ។ យើងគួររួមគ្នាទប់ស្កាត់ឲ្យបាននូវការរីករាលដាលជំងឺកូវីដ-១៩ ទាំងអស់គ្នា ខណៈជំងឺនេះ បាននឹងកំពុងរីករាលដាល និងបានធ្វើឲ្យបងប្អូនកម្មករកម្មការិនីរបស់យើងចំនួន២៣៣១គ្រួសារ ជួបការលំបាក មិនអាចចេញទៅប្រកបរបកិច្ចការងារខាងក្រៅបាន ដូច្នេះហើយ ត្រូវរួមគ្នា ទបស្កាត់ នៃការឆ្លងនូវជម្ងឺដ៏កាចសាហាវមួយ នេះឲ្យបានទាំងអស់គ្នា ។
លោកឃួង ស្រេង បានបញ្ជាក់ថា ៖អំណោយដែលបងប្អូនកម្មករ កម្មការិនី ទាំង២៣៣១ គ្រួសារទទួលបានអំណោយនេះជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោហ៊ុនសែន និងសម្ដេចកិតិព្រឹទ្ធបណ្ឌិតប៊ុនរ៉ានីហ៊ុនសែនដោយក្នុងមួយគ្រួសារ ទទួលបានថវិកា ៣០ម៉ឺនរៀល អង្ករ២៥គីឡូក្រាម ត្រីខ ២០កំប៉ុង និងមី១កេស ។
សូមបញ្ជាក់ថា ៖ សម្ដេចតេជោនាយករដ្ឋមន្ត្រី កាលពីម្សិលមិញ បានដាក់បទបញ្ជាមួយចំនួនដល់
អាជ្ញាធរ រាជធានី-ខេត្ត អនុវត្តនូវការងារមួយចំនួន ពាក់ព័ន្ធនិងជម្ងឺកូវីដ-១៩ ក្នុងនោះ ៖ ១-គ្រួសារមានសមាជិកស្លាប់ដោយកូវីដ-១៩ រដ្ឋនឹងជួយបង់ថ្លៃទឹក និងថ្លៃអគ្គិសនី រយៈពេល៥ខែ និងផ្តល់ថវិកា១០លាន រៀល និងអង្ករ១០០គីឡូក្រាម ។ ២-គ្រួសារដែល មានសមាជិកទទួលរងកូវីដ-១៩ រដ្ឋនឹងជួយបង់ថ្លៃទឹកស្អាត និងថ្លៃអគ្គិសនី រយៈពេល៣ខែ ។ ៣-គ្រួសារដែលត្រូវធ្វើចត្តាឡីស័ក រដ្ឋនឹងឧបត្ថម្ភថវិកា៣០ម៉ឺន/គ្រួសារ និងបង់ជំនួសនូវថ្លៃប្រើប្រាស់ទឹក ,អគ្គិសនី ក្នុងរយៈពេល ២ខែ ,អ្នកនៅក្រៅតំបន់ធ្វើចត្ដាឡីស័ក ទទួលបានដូចគោល ការណ៍ខាងលើដែរ ។ អ្នកនៅក្នុងតំបន់បិទខ្ទប់ រដ្ឋនឹងផ្ដល់បន្ថែមនូវអង្ករ ២៥Kg មីមួយកេសតូច និងត្រីខ ២០កំប៉ុង សម្រាប់ក្រុមគ្រួសារនីមួយៗ ។ កម្មករ-កម្មការិនី ដែលពាក់ព័ន្ធនឹងកូវីដ-១៩ និងពាក់ព័ន្ធជា មួយនឹងការធ្វើចត្តាឡីស័ក រដ្ឋនឹងបង់ជំនួសនូវថ្លៃទឹក និងថ្លៃអគ្គិសនីក្នុងរយៈពេល២ខែ បើនៅម្នាក់ឯងក៏ត្រូវចាត់ទុកថាមួយគ្រួសារផងដែរ ៕
