ភ្នំពេញ៖ អំណោយដ៏ថ្លៃថ្លារបស់សម្ដេចអគ្គមហាសេនាបតីតេជោហ៊ុនសែននាយករដ្ឋមន្ត្រី និងសម្ដេចកិតិ្ដ ព្រឹទ្ធបណ្ឌិតប៊ុនរ៉ានីហ៊ុនសែន ដែលមានទាំងថវិកា សាច់ជ្រូក និងស្បៀងអាហារផ្សេងទៀតត្រូវបាន ឯកឧត្ដម ឃួង ស្រេង. អភិបាលរាជធានីភ្នំពេញ យកទៅប្រគល់ជូនប្រជាពលរដ្ឋ ចំនួន១៩៤ គ្រួសារ ដែលកំពុងធ្វើចត្តាឡីស័ក នៅភូមិទី១៦ ទប់មុខព្រឹទ្ធសភា សង្កាត់ទន្លេបាសាក់ ខណ្ឌចំការ បន្តទៀត នៅព្រឹកថ្ងៃទី០៦ មេសានេះ បើទោះបីកាលពីយប់ថ្ងៃទី៥ មេសា ឯកឧត្ដមក៏ បានចុះសួរសុខទុក្ខ និង បាននាំយកនូវស្បៀងអាហារផ្តល់ជូនម្តងហើយដែរ។
ឯកឧត្ដម. ឃួង ស្រេង បានមានប្រសាសន៍លើកឡើងថា សម្ដេចអគ្គមហាសេនាបតីតេជោហ៊ុនសែនបានយកចិត្តទុកដាក់ខ្លាំងណាស់ចំពោះជីវភាពរស់នៅរបស់បងប្អូនប្រជាពលរដ្ឋ។ ជាក់ស្តែងនៅពេលនេះខណៈ ទទួលបានព័ត៌មានពីបងប្អូនដែលកំពុងធ្វើចត្តាឡីស័កនៅភូមិ១៦ ក្នុងសង្កាត់ទន្លេបាសាក់ខណ្ឌចំការមននេះ សម្តេចបានឱ្យអាជ្ញាធររាជធានីភ្នំពេញចុះពិនិត្យមើលស្ថានភាពជាក់ ស្តែងនិងនាំយកនូវ ថវិកាស្បៀងអាហារមួយចំនួន មកចែកជូនបងប្អូនភ្លាមតែម្តង បើទោះបី នៅពេលយប់ក៏ដោយ។
ឯកឧត្ដមបន្តទៀតថា៖សម្ដេចតេជោហ៊ុន សែន នៅតែជាជួរមុខ ក្នុងជួយបងប្អូនប្រជាពលរដ្ឋ បើទោះបីស្ថិតក្នុងកាលៈទេសៈបែបណាក៏ដោយ ។ ជាក់ស្តែង ខណៈដែលបងប្អូនជួបការលំបាកក្នុងជីវភាព ពេលកំពុងធ្វើចត្តាឡីស័កនេះ គឺសម្តេចបានណែនាំអោយចុះជួយភ្លាមៗ។ ប៉ុន្តែទោះបីជាយ៉ាងណាក្តី
ឯកឧត្ដម ឃួង ស្រេង សូមឱ្យប្រជាពលរដ្ឋមានការយោគយល់ចំពោះការបិទភូមិមួយនេះមិនអោយចេញចូល ដោយសារតែនេះជាវិធានរបស់ក្រសួងសុខាភិបាលដើម្បីបង្ការទប់ស្កាត់ជម្ងឺកូវីដ-១៩ ប្រទេសណាក៏គេធ្វើដូច្នេះដែរ សំដៅធ្វើយ៉ាងណាកុំអោយជម្ងឺនេះរាលដាលកាន់តែខ្លាំង។
មន្ត្រីរដ្ឋបាលខណ្ឌចំការមន បានបញ្ជាក់ ឲ្យដឹងថា ប្រជាពលរដ្ឋរស់នៅក្នុងភូមិទី១៦ ក្នុងសង្កាត់ទន្លេបាសាក់នេះ មានចំនួនជាង ៣០០គ្រួសារ ប៉ុន្តែប្រជាពលរដ្ឋដែលអាជ្ញាធររបស់យើងតម្រូវឲ្យពួកគាត់ធ្វើចត្តាឡីស័កនៅពេលនេះ មានចំនួន១៩៤គ្រួសារ ។
អំណោយដែលប្រគល់ជូននៅពេលនេះក្នុងមួយគ្រួសារទទួលបានថវិកា៣០ម៉ឺនរៀល សាច់ជ្រូក២គីឡូកហរាម ត្រីខ១០កំប៉ុង និងទឹក បរិសុទ្ធ១កសេ ខណៈ កាលពីយប់ថ្ងៃទី៥ មេសា ឆ្នាំ២០២១ ឯកឧត្ដម ឃួង ស្រេង បាន ប្រគល់ជូននូវអង្កចំនួន២៥គីឡូក្រាម ក្នុង១គ្រួសារ រួចហើយដែរនោះ៕
