ខេត្តចាន់ថបុរី ប៉ៃលិន៖ នៅល្ងាចថៃ្ងទី២៥ ខែសីហា ឆ្នាំ២០១៦ នៅទីលានបាល់ទាត់ ជឹម ចំណាន ស្ថិតនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន មានរៀចំកម្មវិធី ប្រកួតកីឡាបាល់ទាត់ជាលក្ខណៈមិត្តភាព រវាងក្រុមកីឡាករបាល់ទាត់គ្រូបង្រៀនខេត្តប៉ៃលិន ដែលដឹកនាំដោយ លោក តង់ ធារ៉ា ប្រធានមន្ទីរអប់រំ យុវជន និងកីឡា ខេត្តប៉ៃលិន ជាមួយក្រុមកីឡាករបាល់ទាត់ទាហានឈុតខ្មៅថៃលេខ ៥៤៧ ការពារព្រំដែន ខេត្តចាន់ថបុរី ព្រះរាជាណាចក្រថៃ ដើម្បីផ្លាស់ប្តូរបទពិសោធន៍ និងពង្រឹង សាមគ្គីភាព មិត្តភាពរអោយកាន់តែរឹមាំបន្ថែមទៀត ។
លោក តង់ ធារ៉ា ប្រធានមន្ទីរអប់រំ យុវជន និងកីឡាខេត្តប៉ៃលិន បានមានប្រសាសន៍ឱ្យដឹងថា៖ ការប្រកួតបាលទាត់នេះគឺធ្វើឡើងជាលក្ខណៈមិត្តភាព ដើម្បីធ្វើការផ្លាស់ប្តូរនូវបទពិសោធន៍ រវាងគ្រូបង្រៀនខេត្តប៉ៃលិន និងកងកម្លាំងប្រដាប់អាវុធថៃ ក៍ដូចជាការផ្សារភ្ជាប់នូវទំនាក់ទំនងជិតស្និទ្ធដើម្បីមិត្តភាព ភាតរភាព សន្តិភាព និងកិច្ចសហការល្អគ្រប់ពេលវេលា ។
ក្រោយពីការប្រកួតដ៏ស្វិតស្វាញរួចមក ជាលទ្ធផលក្នុងតង់ទី១ ក្រុមកីឡាករគ្រូបង្រៀនខេត្តប៉ៃលិន ស៊ុតបញ្ចូលទីនាំមុខក្រុមកីឡាថៃ បាន ៥ ទល់ នឹង៤គ្រាប់ ហើយចូលតង់ទី២ ក្រុមកីឡាករបាល់ទាត់ទាហានឈុតខ្មៅ បានស៊ុតបញ្ចូលទី៣គ្រាប់បន្ថែមទៀត រហូតដល់ចប់ការប្រកួតក្រុមកីឡាករទាហានឈុតខ្មៅថៃបាននាំមុខកីឡាករគ្រូបង្រៀនខេត្តប៉ៃលិន ចំនួន២គ្រាប់វិញ ។
ដូច្នេះជាលទ្ធផលបញ្ចប់ការប្រកួតក្រុមកីឡាករគ្រូបង្រៀនខេត្តប៉ៃលិន ចាញ់ក្រុមកីឡាករទាហានឈុតខ្មៅថៃចំនួន ២គ្រាប់ គឺ ថៃ ៧ ខែ្មរ ៥ ៕
អត្ថបទ ទូច សុខន
