បន្ទាយមានជ័យ ៖ កាលពីថ្ងៃទី២២ ខែសីហា ឯកឧត្តម លី សារី អភិបាលរងខេត្ត បន្ទាយមានជ័យ ក្រុមការងាររបស់មន្ទីរកសិកម្មខេត្ត រួមនិងកសិករចំនួន១០០នាក់ បានចូលរួមពិធីចែកអង្ករ ជំនួយសង្គ្រោះបន្ទាន់របស់អាស៊ានបូក៣ នៅស្ថានីយន៍ទួលសំរោងខេត្តបាត់ដំបង និងពេលរសៀលបន្ត ចែកនៅសង្កាត់ម្កាក់ ក្រុងសិរីសោភ័ណ ចំនួន៣៥០គ្រួសារ និង២ឃុំនៃស្រុកស្វាយចេក: ឃុំតាបែន១០០គ្រួរសារ និងឃុំស្លក្រាម២៥០គ្រួសារ ដែលក្នុងមួយគ្រួសារទទួលបានអង្ករ៥០គីឡូក្រាម។
ថ្ងៃទី២៣ ខែសីហា ក្រុមការងាររបស់ការិយាល័យផលិតកម្ម និងបសុព្យាបាល បានចុះចាក់វ៉ាក់សាំងការពារជម្ងឺសារទឹកគោ-ក្របី នៅភូមិខ្វាវលិច ឃុំរលួសនៃស្រុកស្វាយចេក បានគោសរុប១១៩ក្បាល និងកំពុងបន្តការចាក់ទៅភូមិផ្សេងៗទៀតទូទាំងឃុំ។ មួយក្រុមទៀត បានចុះចាក់វ៉ាក់សាំងការពារជម្ងឺឆ្កែឆ្កួត បានឆ្កែសរុប២០ក្បាល នៅការិយាល័យកសិកម្មស្រុកម៉ាឡៃ និងកំពុងបន្តការចាក់ជាបន្តបន្ទាប់។
ថ្ងៃទី២៣ ខែសីហា ក្រុមការងាររបស់ មន្ទីរកសិកម្មខេត្ត បានចុះពិនិត្យការប្រមូលផលស្រូវដើមរដូវរបស់ប្រជាកសិករ នៅឃុំរហាល នៃស្រុកព្រះព្រះ ឃុំស្រះជីកនៃស្រុកភ្នំស្រុកបានពិនិត្យឃើញថា កំពុងដំណើរការយ៉ាងសស្រាក់សស្រាំ ដោយទទួលបាន ទិន្នផល ៥ទៅ៧តោនក្នុង១ហិកតា ហើយលក់ជាស្រូវសើមក្នុងតំលៃល្អទៅតាមប្រភេទពូជស្រូវ៖ ពូជ ៥០៤ក្នុងតំលៃ ៧៥០រៀលក្នុង១គីឡូក្រាម ពូជសែនក្រអូបតំលៃ ១ ១០០រៀលក្នុង១គីឡូក្រាម ៕
