ភ្នំពេញ៖ លោក ឃួង ស្រេង អភិបាលរាជធានីភ្នំពេញ បានបញ្ជាភ្លាមៗ ដល់អភិបាល
ខណ្ឌទាំង១៤ ឱ្យចាប់ផ្តើមស្រង់ស្ថិតិមនុស្សចាស់ ដែលមានអាយុចាប់ពី ៦០ឆ្នាំឡើង ដែលកំពុងរស់នៅក្នុងមូលដ្ឋានរបស់ខ្លួន ដើម្បីទទួលបានការចាក់វ៉ាក់សាំងការពារជំងឺកូវីដ-១៩ អាស់ស្ត្រាសេនេការ(Astra Zeneca) ដែលផលិតនៅប្រទេសឥណ្ឌាក្នុងពេលឆាប់ៗ។
លោក ឃួង ស្រេង បានណែនាំបែបនេះធ្វើឡើងក្នុងកិច្ចប្រជុំបន្ទាន់មួយនៅព្រឹកថ្ងៃទី៧ ខែមីនា ឆ្នាំ២០២១ ដែលមានការចូលរួមពីអភិបាលខណ្ឌទាំង១៤ និងមន្ទីរសុខាភិបាលរាជធានីភ្នំពេញ និងអាជ្ញាធរពាក់ព័ន្ធមួយចំនួនទៀត។ ក្នុងកិច្ចប្រជុំ ក៏បានជំរុញឱ្យអាជ្ញាធរមូលដ្ឋាន ព្រមទាំងចៅសង្កាត់ ជួយសម្រួលក្នុងការផ្តល់ភាពងាយស្រួលដល់ប្រជាពលរដ្ឋក្នុងមូលដ្ឋានដែលមានអាយុចាប់ពី ៦០ឆ្នាំឡើង ដើម្បីអាចឱ្យគាត់ទទួលបានសេវាចាក់ថ្នាំការពារជំងឺកូវីដ-១៩ ដោយរលូន។
សូមបញ្ជាក់ថា កម្ពុជា មកទល់នឹងពេល នេះ ទើបទទួលបានវ៉ាក់សាំងស៊ីណូហ្វាមចំនួន ៦០ម៉ឺនដូស ជាអំណោយរបស់ប្រទេសចិន និងវ៉ាក់សាំង AstraZeneca ចំនួន៣២ ម៉ឺន៤ពាន់ដូស ជាវ៉ាក់សាំងក្នុងក្របខណ្ឌរបស់មជ្ឈមណ្ឌកូវ៉ាក់។ កម្ពុជា ត្រៀមនឹងទទួលវ៉ាក់សាំងជំនួយស៊ីណូហ្វាមចំនួន ៤០ម៉ឺន ដូសទៀតពីប្រទេសចិន ដែលរំពឹងថា នឹងមកដល់ប្រទេសកម្ពុជានៅមុខថ្ងៃចូលឆ្នាំខ្មែរ។ ដោយឡែកចំពោះវ៉ាក់សាំងAstraZene ca ពីមជ្ឈមណ្ឌលកូវ៉ាក់ កម្ពុជា រំពឹងទទួលបានប្រមាណ ២០ភាគរយ នៃចំនួនប្រជាជន ១៦លាននាក់ ដែលស្មើនឹង ៣លាន២សែននាក់ ឬស្មើនឹងវ៉ាក់សាំងចំនួន ៦លាន៤សែនដូស។ កម្ពុជា ក៏កំពុងស្វែងរកវ៉ាក់សាំងចាក់បង្កាកូវីដ-១៩ រហូតដល់២០លាន ដូស ដើម្បីការចាក់លើពលរដ្ឋខ្មែរចំនួន ១០លាននាក់ ដោយឥតគិតថ្លៃ ដែលផ្អែកតាមចំនួននោះ អាចបានប្រមាណ២ភាគ៣ នៃចំ ណោមប្រជាពលរដ្ឋខ្មែរទាំងមូល៕
