ភ្នំពេញ៖ អភិបាលរាជធានីភ្នំពេញ លោក ឃួង ស្រេង បានជំរុញឱ្យអាជ្ញាធរធ្វើការយកចិត្តទុកដាក់ការពារ និងរក្សាសណ្តាប់ធ្នាប់ ពិសេសត្រូវមានគម្លាតសង្គម ចំពោះភ្ញៀវទេសចរ និងពលរដ្ឋ ដែលនឹងទៅទស្សនាកម្សាន្ត ក៏ដូចជាទៅធ្វើពិធីសាសនាផ្សេងៗតាមបែបជំនឿ នៅរមណីយដ្ឋានប្រវត្តិសាស្ត្រវត្តភ្នំ ខណៈដែល បុណ្យចូលឆ្នាំប្រពៃណីចិន ខិតចូលមកដល់។
នេះបើយោងតាមកិច្ចប្រជុំគណៈបញ្ជាការឯកភាព ដែលមានការចូលរួមពីអាជ្ញាធរខណ្ឌទាំង១៤ និងសមត្ថកិច្ចពាក់ព័ន្ធក្នុងរាជធានីភ្នំពេញ នៅព្រឹកថ្ងៃទី១១ ខែមករា ឆ្នាំ២០២១។
ក្នុងកិច្ចប្រជុំនោះ លោក ឃួង ស្រេង បានលើកឡើងថា អាជ្ញាធរពាក់ព័ន្ធ ត្រូវចុះអប់រំជាប្រចាំដល់ភ្ញៀវទេសចរ ពិសេសពលរដ្ឋដែលមានជំនឿផ្នែកសាសនា ដែលទៅធ្វើពិធីបន់ស្រន់នៅទីតាំងរមណីយដ្ឋានវត្តភ្នំ ត្រូវរក្សាគម្លាតសង្គម និងពាក់ម៉ាស លាងដៃនឹងអាល់កុលជាប់ជាប្រចាំ ខណៈដែលប្រទេសកម្ពុជានៅតែបន្តរកឃើញមានវិជ្ជមានជំងឺកូវីដ-១៩ ជាពិសេសទៅលើពលករដែលធ្វើដំណើរត្រឡប់មកពីប្រទេសថៃតាមច្រកព្រំដែន។
ក្រៅពីនេះ លោកអភិបាលរាជធានីភ្នំពេញ ក៏បានជុំរុញឱ្យអាជ្ញាធរខណ្ឌទាំង ១៤ ត្រូវយកចិត្តទុកដាក់ពិនិត្យមើលទីតាំងល្បែងស៊ីសងខុសច្បាប់គ្រប់ប្រភេទ និងស៊ើបអង្កេតដើម្បីបង្ក្រាបការជួញដូរគ្រឿងញៀនផ្សេងៗនៅក្នុងមូលដ្ឋានរបស់ខ្លួន ដើម្បីថែរក្សាសុវត្ថិភាព សណ្តាប់ធ្នាប់សាធារណៈ និងសេចក្តីសុខជូនប្រជាពលរដ្ឋក្នុងរាជធានីភ្នំពេញ៕