ភ្នំពេញ៖ ក្រោមការដឹកនាំរបស់ ឯកឧត្ដម ឃួង ស្រេង អភិបាលរាជធានីភ្នំពេញ អាជ្ញាធរខណ្ឌ មន្ទីរ ជំនាញពាក់ព័ន្ធ បាននិងកំពុងបន្ដជួសជុល និងអ៊ុតកៅស៊ូផ្លូវចំនួន១៦ខ្សែនៅក្នុងមូលដ្ឋានខណ្ឌដូន ពេញ ដែលរងការខូចខាតដោយជំនន់ទឹកភ្លៀងកន្លងមក ដើម្បីសំរួលការធ្វើដំណើររបស់ប្រជាពលរដ្ឋនិងដើម្បីជាការលើកសោភណ្ឌភាពរាជធានីភ្នំពេញឱ្យកាន់តែមានសម្រស់មួយកម្រិតថែមទៀតផងដែរ។
ជាក់ស្ដែងកាលពីល្ងាចថ្ងៃទី៣០ ធ្នូ ឆ្នាំ២០២០នេះ លោកសាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ និងលោកសុខ ពេញវុធ អភិបាលខណ្ឌដូនពេញ បានចុះពិនិត្យដំណើរការនៃការជួសជុលកែលំអរនៅផ្លូវលេខ៥១ ចាប់ពីផ្លូវលេខ១១៤ ដល់មហាវិថី ព្រះសីហនុ នៅក្នុងមូលដ្ឋានខណ្ឌដូនពេញ ខណៈក្រុមការងារកំពុងតែអ៊ុតកៅស៊ូACលើបណ្តោយផ្លូវនេះ ។
ក្នុងឱកាសនោះលោកសុខ ពេញវុធ អភិបាលខណ្ឌដូនពេញ បានមានប្រសាសន៍លើកឡើងថា៖ សកម្មភាពជួលជុលផ្លូវលេខ៥១ ដោយចាប់ពីផ្លូវលេខ១១៤ ដល់មហាវិថី ព្រះសីហនុនេះជាផ្លូវមួយ ក្នុងចំ ណោមផ្លូវទាំង១៦ ខ្សែក្នុងខណ្ឌ ដែលលោកឃួង ស្រេង អភិបាលរាជធានីភ្នំពេញបានសំរេចឲ្យធ្វើ ការជួសជុលកែលំអរឡើងវិញជាបន្ទាន់ ក្រោយទទួលរងការខូចខាតដោយជំនន់ទឹកភ្លៀងដើម្បីសំរួលការធ្វើដំណើររបស់ប្រជាពលរដ្ឋ។
ក្នុងនោះលោកសុខ ពេញវុធ ក្នុងនាមប្រជាពលរដ្ឋក្នុងខណ្ឌដូនពេញបានថ្លែងអំណរ គុណយ៉ាងជ្រាលជ្រៅដល់ ឯកឧត្ដម ឃួង ស្រេង អភិបាលរាជធានី ដែលបានអនុវត្តតាមអនុសាសន៏ដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ណែនាំឲ្យមានការជួសជុល និងស្តារឡើងវិញ រាល់ហេដ្ឋារចនាសម្ពន្ធ័ដែលខូចខាតក្រោយជំនន់ទឹកភ្លៀងតាមបណ្តាខណ្ឌមួយចំនួននៅក្នុងរាជធានីភ្នំពេញ ហើយលោកក៏បានសំណូមពរ ដល់បងប្អូនប្រជាពលរដ្ឋដែលរស់នៅអមសងខាងផ្លូវដែលកំពុងតែដំណើរការ ជួសជុលនេះសូមចូលរួមសហការ ដើម្បីឱ្យការដ្ឋានប្រព្រឹត្ដទៅដោយរលូននិងបានរួចរាល់តាមការគ្រោងទុក។
លោក សាំ ពិសិដ្ឋ ប្រធានមន្ទីរសាធារណ ការនិងដឹកជញ្ជូនរាជធានីភ្នំពេញបានធ្វើការណែនាំដល់ក្រុមការងារជួសជុលនិងចាក់អុាតកៅស៊ូផ្លូវត្រូវធ្វើឱ្យមានគុណភាពល្អនិងស្តង់ដាតាមលក្ខណះបច្ចេកទេសត្រូវហើយក៏សំណូមពរដល់ប្រជាពលរដ្ឋរស់នៅ តាមបណ្ដោយផ្លូវដែលកំពុងជួសជុលទាំងអស់សូមមេត្តាយោគយល់និងអព្យាស្រ័យក្នុងការ បិទផ្លូវក្នុងរយះពេលខ្លីដែលរំខានដោយការ ដ្ឋានជួសជុលផ្លូវខាងលើនេះ។
បើតាមការបញ្ជាក់ឱ្យដឹងពីមន្ត្រីរដ្ឋបាលរាជធានីភ្នំពេញ បានឲ្យដឹងថា៖ គម្រោងជួសជុលផ្លូវខូចខាតឡើងវិញដោយសារជំនន់ទឹកភ្លៀងនៅក្នុងមូលដ្ឋានខណ្ឌដូនពេញ មានចំនួន១៦ខ្សែ នៅក្នុងនោះ រួមមាន៖ ទី១ ផ្លូវលេខ២១៤ ដោយចាប់ពី មហាវិថីព្រះមុនីវង្សរហូតដល់ផ្លូវលេខ១៩។ ទី២ មហាវិថីព្រះនរោត្តម ចាប់ពីរង្វង់មូលវត្តភ្នំរហូតដល់វិមានឯករាជ្យ ។ ទី៣ ផ្លូវលេខ ១៣០ ចាប់ពីផ្សារធំថ្មីរហូតដល់មហាវិថីព្រះនរោត្តម។ ទី៤ផ្លូវលេខ ៥៣ ចាប់ពីផ្លូវលេខ ១០៨ ដល់ផ្លូវលេខ១១០ ។ ទី៥ ផ្លូវលេខ១០៨ ចាប់ពីមហាវិថីព្រះមុនីវង្សរហូតដល់មហាវិថីព្រះស៊ីសុវត្ថិ។ ទី៦ ផ្លូវលេខ ១១៨ ចាប់ពី មហាវិថីព្រះមុនីវង្ស ដល់មហាវិថីព្រះស៊ីសុវត្ថិ ។ទី៧ ផ្លូវលេខ១២០ ចាប់ពីមហាវិថីព្រះមុនីវង្សដល់ផ្លូវលេខ ១១៨ ។ទី៨ ផ្លូវលេខ១៣ ចាប់ពីមហាវិថីព្រះស៊ីសុវត្ថិ ដល់ផ្លូវលេខ ១៧៨ ។ទី៩ផ្លូវលេខ៩០ចាប់ពីផ្លូវលេខ៤៧ រហូតដល់មហាវិថីព្រះស៊ីសុវត្ថិ ។
ទី១០ ផ្លូវលេខ១៨៤ ចាប់ពីមហាវិថីព្រះនរោត្តម ដល់ផ្លូវលេខ១៩ ។ទី១១ រង្វង់មូលកួចកាណុង។ទី១២ ផ្លូវលេខ៧២ ចាប់ពីរង្វង់មូលកួចកាណុង ដល់មហាវិថីព្រះស៊ីសុវត្ថិ។ទី១៣ ផ្លូវលេខ៧៤ ចាប់ពីរង្វង់មូលកួចកាណុង ដល់មហាវិថីព្រះស៊ីសុវត្ថិ។ទី១៤ផ្លូវលេខ៧៦ ចាប់ពីមហាវិថីព្រះមុនីវង្សរហូត ផ្លូវលេខ៤៧ ។ទី១៥ ផ្លូវលេខ៤៧ ចាប់ពីរង្វង់មូលកួចកាណុងដល់រង្វង់មូលវត្តភ្នំ។ទី១៦ ផ្លូវលេខ៥១ចាប់ពីផ្លូវលេខ១១៤ ដល់មហាវិថី ព្រះសីហនុ ៕
