ភ្នំពេញ៖ អភិបាលរាជធានីភ្នំពេញជំរុញឱ្យមន្ត្រីពាក់ព័ន្ធបង្កើនការថែរក្សាទ្រព្យសម្បត្តិរដ្ឋពិសេស ផ្លូវ ប្រឡាយ លូ ដើម្បីការពារផលប្រយោជន៍ជាសាធារណៈ។
ក្នុងកិច្ចប្រជុំវិសមញ្ញលើកទី២ របស់ក្រុមប្រឹក្សារាជធានីភ្នំពេញ អណត្តិទី៣ នៅព្រឹកថ្ងៃទី២៤ ខែធ្នូ ឆ្នាំ២០២០ នេះ លោក ឃួង ស្រេង អភិបាលរាជធានីភ្នំពេញ បានណែនាំដល់មន្ត្រីពាក់ព័ន្ធទាំងអស់ត្រូវបង្កើនការទប់ស្កាត់ករណីរំលោភលើចំណីផ្លូវចំណីប្រឡាយ ឬចាក់ដីរំលោកយកប្រឡាយទាំងស្រុង ដែលបង្កផលប៉ៈពាល់ធ្ងន់ធ្ងរដល់ការរំដោះទឹកជំនន់ទឹកភ្លៀងចេញទៅក្រៅក្រុង។
លោក បានបញ្ជាក់ថា បច្ចុប្បន្ននេះ ប្រឡាយមួយចំនួនត្រូវបានប្រជាពលរដ្ឋរំលោភយកដោយសាងសង់ផ្ទះនៅលើប្រឡាយ ហើយកន្លែង ខ្លះចាក់ដីលុបប្រឡាយតែម្តងយកកាន់កាប់ដោយខុសច្បាប់ ដែលធ្វើឱ្យអាជ្ញាធរជំនាញពិបាកក្នុងការស្តារ និងអភិវឌ្ឍន៍ប្រឡាយឱ្យបានល្អប្រសើរ ដើម្បីរំដោះការជន់លិចរាជធានីភ្នំពេញ។ជាទូទៅប្រឡាយយើងនៅភាគខាងលិចត្រូវបានគេរំលោភ បំពានពីអ្នកដែលរស់នៅជិខាងប្រ ឡាយ ហើយកន្លែងខ្លះទៀតក៏មានចាក់ដីលុបតែម្តង បាត់ទ្រង់ទ្រាយប្រឡាយ ចឹងបានយើងឥលូវនេះ កំពុងខិតខំពង្រឹងកិច្ចការងារបន្ថែម ជុំវិញការថែរក្សាទ្រព្យសម្បត្តិសាធារណៈពិសេសប្រឡាយលូព និង ផ្លូវ ។
លោកសាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញបានឱ្យដឹងថា នៅទូទាំងរាជធា នីភ្នំពេញមានប្រឡាយមេសរុបចំនួន ៣៧ប្រឡាយ ក្នុងនោះប្រឡាយមេធំៗមានចំនួន១៧ខ្សែ និងប្រឡាយមេរង មានចំនួន២០ខ្សែ ខណៈដែរប្រឡាយមួយចំនួនរងការរំលោភបំពានកាន់កាប់ ខុសច្បាប់។ លោកបន្ត៖ ថា នៅឆ្នាំនេះរដ្ឋបាលរាជធានីភ្នំពេញបានស្តារប្រលាយចំនួន១២ខ្សែ ដែលបានជួយ រំដោះការ ជន់លិចជំនន់ទឹកភ្លៀងបានច្រើន ហើយនៅឆ្នាំ២០២១ ខាងមុខរដ្ឋបាលរាជធានីភ្នំពេញមានផែនការស្តារ ប្រឡាយមេជាច្រើនទៀតនៅភាគខាងជើង និងភាគខាងលិចបន្តទៀត ដើម្បីធានាការពារកុំឱ្យជន់លិចរាជធានីភ្នំពេញនារដូវវស្សាខាងមុខ។ យើងត្រូវតែស្តារប្រឡាយទាំងនេះ ព្រោះវាធានានូវនិរន្តរភាព សម្រាប់ប្រឡាយឱ្យមានទឹកហូរ ជាប្រចាំ ទប់ស្កាត់ការរំលោភចាក់ដី រំលោភប្រឡាយផង ហើយនឹងសម្រួលផ្លូវទឹក ។
សូមបញ្ជាក់ថា កាលពីខែតុលាកន្លងមកនេះ កម្ពុជាបានទទួលរងឥទ្ធិពលព្យុះជាច្រើន បង្កឱ្យមាន ជំនន់ទឹកភ្លៀងលិចលង់នៅតំបន់ជាយរាជធានីភ្នំពេញជាច្រើនកន្លែង ហើយអាជ្ញាធរបានដោះស្រាយ ចុះអន្តរាគមន៍ភ្លាមៗក្នុងការជីកស្តារប្រឡាយមេមួយចំនួន ដើម្បីសម្រួលឱ្យទឹកហូរបានលឿនកាត់បន្ថយការលំបាកក្នុងជីវភាពរស់នៅ និងការធ្វើចរាចរណ៍របស់ប្រជាពលរដ្ឋ៕