ភ្នំពេញ ៖ តាមការបញ្ជាក់ឲ្យដឹងពីលោក កើត ឆែ អភិបាលរងរាជធានី ភ្នំពេញថា អភិបាល រាជធានីភ្នំពេញ លោកឃួង ស្រេង នៅរសៀលថ្ងៃទី៦ ធ្នូ ឆ្នាំ២០២០ នេះ បានដាក់បទបញ្ជា ទៅ អាជ្ញាធរខណ្ឌទាំង១៤ ចំណុះឱ្យរដ្ឋបាលរាជធានីភ្នំពេញ ត្រូវគោរពទៅតាមការណែនាំ ទាំង១០ចំណុច របស់អាជ្ញាធររាជធានី ភ្នំពេញ ដែល បានដាក់ចេញ កាលពីថ្ងៃទី៣០ វិច្ឆិកាកន្លងមកនេះ និងជាពិសេស អនុវត្ត ឱ្យបានម៉ឹងម៉ាត់ បំផុត ទៅតាម អនុសាសន៍ ណែនាំដ៏ ខ្ពង់ខ្ពស់ របស់ សម្ដេច អគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ កម្ពុជា ដែល សម្ដេច បាន ណែនាំ កាលពី ព្រឹកថ្ងៃទី៦ ធ្នូ នេះ ។
ដោយឡែកសម្រាប់មន្ទីរពាក់ព័ន្ធក៏ត្រូវតែអនុវត្តឲ្យបានល្អទៅតាមការណែនាំនេះផងដែរដើម្បីធ្វើយ៉ាងណាទប់ស្កាត់ឲ្យបានការរីករាលដាលជំងឺកូវីដ_១៩ខណៈជំងឺនេះបាននិងកំពុងរីករាលដាលចូលសហគមន៍។
១០ចំណុចនៃសេចក្តីណែនាំរបស់រដ្ឋបាលរាជធានីភ្នំពេញនិងយោងអនុសាសន៍ដឹកនាំដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោនាយករដ្ឋមន្ត្រីនាថ្ងៃទី៣០ខែវិច្ឆិកាឆ្នាំ២០២០ក្នុងការទប់ស្កាត់ការឆ្លងមេរោគកូវីដ-១៩នៅក្នុងសហគមន៍នៅរាជធានីភ្នំពេញរួមមានៈដើម្បីទប់ស្កាត់ការរីករាលដាលមេរោគកូវីដ-១៩នៅក្នុងសហគមន៍នៅរាជធានីភ្នំពេញរដ្ឋបាលរាជធានីភ្នំពេញសូមធ្វើការណែនាំដល់រដ្ឋបាលខណ្ឌទាំង១៤មន្ទីរ-រង្គភាពចំណុះរដ្ឋបាលរាជធានីភ្នំពេញពាណិជ្ជករអាជីវករនិងបងប្អូនប្រជាពលរដ្ឋទាំងអស់ដូចខាងក្រោម ៖
១-ត្រូវធ្វើការផ្អាករាល់ការជួបជុំឬការប្រមូលផ្ដុំដូចជាកម្មវិធីអាពាហ៍ពិពាហ៍កម្មវិធីជប់លៀងឬការជួបជុំបែបសាសនាទាំងអស់។ល។ ចាប់ពីថ្ងៃនេះរហូតដល់ថ្ងៃទី១៦ខែធ្នូឆ្នាំ២០២០។
២-អនុញ្ញាតឱ្យមានការជួបជុំមិនឱ្យលើសពី២០នាក់ក្នុងករណីចាំបាច់ប៉ុន្តែការជួបជុំនេះត្រូវរក្សាគម្លាតសុវត្ថិភាពសង្គមយ៉ាងតិចចម្ងាយ១,៥ម៉ែត្រពីម្នាក់ទៅម្នាក់ ។
៣-ត្រូវចាត់តាំងកម្លាំងដើម្បីផ្សព្វផ្សាយអប់រំនិងណែនាំប្រជាពលរដ្ឋដែលប៉ះពាល់ដោយផ្ទាល់ឬដោយប្រយោលៗព្រឹត្តិការណ៍សហគមន៍២៨វិច្ឆិកាឱ្យទៅធ្វើតេស្តរកមេរោគកូវីដ១៩ ។ ក្នុងករណីលទ្ធផលតេស្តអវិជ្ជមានត្រូវធ្វើចត្តាឡីស័កតាមការណែនាំរបស់ក្រុមគ្រូពេទ្យនៃក្រសួងសុខាភិបាល។
៤-ត្រូវចុះត្រួតពិនិត្យនិងតាមដាននៅតាមភោជនីយដ្ឋានអាហារដ្ឋាននិងកន្លែងលក់ដូរនានាឱ្យអនុវត្តវិធានការបង្ការនិងទប់ស្កាត់ការរីករាលដាលមេរោគកូវីដ-១៩ ក្នុងនោះម្ចាស់អាជីវកម្មទាំងអស់ខាងលើត្រូវរៀបចំជែលឬអាល់កុលលាងដៃនៅមុខច្រកទ្វារចេញ-ចូលនិងត្រូវចាត់តាំងបុគ្គលិកឱ្យធ្វើការវាស់កម្ដៅភ្ញៀវទាំងអស់ដោយឈរតម្រង់ជួររក្សាគម្លាតសុវត្ថិភាពសង្គមមុននឹងអនុញ្ញាតឱ្យចូលក្នុងទីតាំងអាជីវកម្មទាំងនោះព្រមទាំងត្រូវរៀបចំរក្សាគម្លាតសុវត្ថិភាពសង្គមយ៉ាងតិច១,៥ម៉ែត្រពីម្នាក់ទៅម្នាក់ក្នុងពេលអង្គុយ ។ ក្នុងករណីដែលម្ចាស់ទីតាំងអាជីវកម្មខាងលើមិនអនុវត្តតាមការណែនាំទេនោះរដ្ឋបាលរាជធានីភ្នំពេញនឹងបិទអាជីវកម្មជាបណ្តោះអាសន្ន។
៥-ត្រូវចុះត្រួតពិនិត្យនិងតាមដានការអនុវត្តនូវវិធានការផ្អាកជាបណ្តោះអាសន្ននូវទីតាំងអាជីវកម្មមួយចំនួនដូចជាក្លឹបហាត់ប្រាណរោងភាពយន្តKTVក្លឹបកម្សាន្ត(រង្គសាលខារ៉ាអូខេឌីស្កូតែកបៀរហ្គាឌិន)អាជីវកម្មម៉ាស្សាសុខភាពនិងស្ប៉ា។
៦-ចុះពិនិត្យស្ថានភាពនៅទីកន្លែងស្នាក់នៅរបស់បងប្អូនប្រជាពលរដ្ឋធ្វើចត្តាឡីស័កតាមផ្ទះដែលបញ្ជូនមកពីមណ្ឌលសុខភាពឬមន្ទីរពេទ្យបង្អែកនិងពិនិត្យស្ថានភាពបងប្អូនប្រជាពលរដ្ឋដែលស្ម័គ្រចិត្តធ្វើចត្តាឡីស័កនៅមណ្ឌលចត្តាឡីស័កទាំងរស់ដែលរៀបចំដោយរដ្ឋបាលរាជធានីភ្នំពេញនិងត្រូវរៀបចំចាត់ចែងការងារបន្តដោយផ្អែកលើលទ្ធផលនៃការតាមដានសុខភាព។
៧-អំពាវនាវដល់បងប្អូនប្រជាពលរដ្ឋមិនមានការចាំបាច់មិនត្រូវធ្វើដំណើរចេញក្រៅផ្ទះ។ ក្នុងករណីដែលមានតម្រូវការចាំបាច់ជៀសមិនផុតមិនត្រូវឱ្យមានការកកកុញតាមភ្លើងចរាចរណ៍នានា(ភ្លើងស្តុប)នៅក្នុងរាជធានីភ្នំពេញឡើយ។)[Forwardedfromសំរិតសួសសួស]
៨-រដ្ឋបាលខណ្ឌទាំង១៤និងមន្ទីរ-អង្គភាពជំនាញពាក់ព័ន្ធក្រោមឱវាទរដ្ឋបាលរាជធានីភ្នំពេញត្រូវធ្វើការផ្លាករាល់ការប្រជុំចាប់ពីពេលនេះរហូតដល់ថ្ងៃទី១៦ខែធ្នូឆ្នាំ២០២០។
ចំពោះទីតាំងផ្តល់សេវាសាធារណៈជូនប្រជាពលរដ្ឋត្រូវរៀបចំចាំបាច់ឱ្យមានការវាស់កម្ដៅការពាក់ម៉ាស់ការលាងដៃសម្លាប់មេរោគនិងរៀបចំកន្លែងអង្គុយចម្ងាយ១,៥ម៉ែត្រពីម្នាក់ទៅម្នាក់ដោយកំណត់ចំនួនប្រជាពលរដ្ឋដែលមកទទួលសេវាមិនឱ្យលើសពី២០នាក់ក្នុងពេលម្តងៗ ។
៩-ចំពោះផ្សាររដ្ឋនិងផ្សារឯកជនត្រូវរៀបចំឱ្យមានការវាស់កម្ដៅការពាក់ម៉ាស់និងការលាងដៃសម្លាប់មេរោគព្រមទាំងត្រូវអនុវត្តឱ្យបានខ្ជាប់ខ្ជួននូវគម្លាតសុវត្ថិភាពសង្គម។
១០-ត្រូវអនុវត្តឱ្យបានម៉ឺងម៉ាត់នូវវិធានការបង្ការនិងទប់ស្កាត់ការរីករាលដាលមេរោគកូវីដ-១៩ផ្សេងទៀតរបស់ក្រសួងសុខាភិបាលនិងស្ថាប័នពាក់ព័ន្ធនានាដែលកំពុងនៅជាធរមាន។
ទទួលបានសេចក្តីណែនាំនេះរដ្ឋបាលខណ្ឌទាំង១៤និងមន្ទីរ-អង្គភាពចំណុះរដ្ឋបាលរាជធានីភ្នំពេញទាំងអស់ត្រូវធ្វើការផ្សព្វផ្សាយឱ្យបានទូលំទូលាយនិងអនុវត្តឱ្យមានប្រសិទ្ធភាពខ្ពស់។
រដ្ឋបាលរាជធានីភ្នំពេញសង្ឃឹមយ៉ាងមុតមាំលើស្មារតីយោគយល់អធ្យាស្រ័យខ្ពស់បំផុតពីសំណាក់បងប្អូនប្រជាពលរដ្ឋគ្រប់មជ្ឈដ្ឋាននិងសូមចូលរួមអនុវត្តឱ្យបានម៉ឺងម៉ាត់នូវសេចក្តីណែនាំខាងលើកុំបីខាន៕