ខេត្តរតនគិរី៖ មនុស្ស២នាក់ពាក់ព័ន្ធនឹងការជួញដូរគ្រឿងញៀន និងកាន់កាប់អាវុធខុសច្បាប់ ត្រូវបានសមត្ថកិច្ច នៃអធិការដ្ឋានក្រុង បានលុង ធ្វើការបង្ហាញ មុខជាសាធារណ: កាលពីព្រឹកថ្ងៃទី២២ ខែសីហានេះក្រោយពីកម្លាំងនគរបាលនៃអធិការដ្ឋានក្រុងបានលុង សហការជាមួយ កម្លាំងនគរបាលប៉ុស្តិ៍ សង្កាត់ឡាបានសៀក បានធ្វើការចុះបង្ក្រាបកាលពីវេលាម៉ោង១៥និង០០នាទីរសៀល ថ្ងៃទី២០ ខែសីហាឆ្នាំ២០១៦នៅចំណុចផ្ទះមួយកន្លែង ស្ថិតនៅក្នុងភូមិថ្មី សង្កាត់ឡាបានសៀក ក្រុងបានលុង រតនគិរី។
សមត្ថកិច្ចវបានអោយដឹងថា ជនសង្ស័យទី១ឈ្មោះ ប៊ុត វណ្ណី ភេទប្រុស អាយុ៣១ឆ្នាំ មុខរបរជាមន្ត្រីនគរបាល មានទីលំនៅភូមិអភិវឌ្ឍន៍ សង្កាត់យក្សឡោម ក្រុងបានលុង និងទី២ឈ្មោះឡេះ រំលី ភេទប្រុស អាយុ៣២ឆ្នាំ មុខរបរ មិនពិតប្រាកដ មានទីលំនៅភូមិថ្មី សង្កាត់ឡាបានសៀក ។
ប្រភពដដែលបន្តថាក្នុងការឃាត់នោះ សមត្ថកិច្ចបាន ដកហូតវត្ថុតាងរួមមានថ្នាំញៀនប្រភេទម្សៅក្រាមពណ៌សថ្លា ចំនួន២ថង់តូច អាវុធកែច្នៃចំនួន២ដើម គ្រាប់ចំនួន៦គ្រាប់ រថយន្តចំនួន១គ្រឿង ទូរស័ព្ទ១គ្រឿង ជញ្ជីងថ្លឹងមួយគ្រឿងនិងសម្ភារៈសេពគ្រឿងញៀន១ចំនួនទៀត។ បច្ចុប្បន្ន ជនសង្ស័យត្រូវបានសមត្ថកិច្ចជំនាញនៃអធិការដ្ឋានកំពុងត្រៀមសំណុំរឿងបញ្ជូនទៅសាលាដំបូងខេត្តរតនគិរីដើម្បីចាត់ការទៅតាមផ្លូវច្បាប់៕