ភ្នំពេញ ៖ នារាត្រីថ្ងៃទី១១ វិច្ឆិការនេះ សាលារាជធានីទទួលបានម៉ាស់ក្រណាត់ចំនួន២លានដែលជាអំណោយរបស់សម្ដេចតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជា តាមរយៈរដ្ឋមន្ត្រីក្រសួងសុខាភិបាល។ ម៉ាស់នេះត្រូបវបានបែងចែកជូនតាមបណ្តាខណ្ឌទាំង១៤ ចំណុះសាលារាជធានីនិងជូនកងរាជអាវុធហត្ថរាជធានីភ្នំពេញនិងប្រគល់ជូនស្នងការរដ្ឋាននគរបាលរាជធានីភ្នំពេញដើម្បីយកទៅប្រគល់ជូនទៅដល់ប្រជាពលរដ្ឋក្រីក្រដែលមិនមានលទ្ធភាពក្នុងការទិញម៉ាក់យកមកប្រើប្រាស់ ខណៈដែលជំងឺកូវីដ-១៩ដែលបាននិងកំពុងកើតមាននៅក្នុងរាជធានីភ្នំពេញ ។
លោក ឃួង ស្រេងអភិបាលរាជធានី បានថ្លែងថា សម្ដេចតេជោហ៊ុនសែន តែងយកចិត្តទុកដាក់យ៉ាងខ្លាំងចំពោះបងប្អូនប្រជាពលរដ្ឋទាំងអស់ ដោយកន្លងមកនេះ សម្ដេចបានជួយប្រជាពលរដ្ឋរងគ្រោះដោយការលិចលង់ដោយទឹកជំនន់ ហើយមកដល់ពេលនេះសម្ដេចនៅបានបន្តចែកម៉ាសជូនប្រជាពលរដ្ឋក្រីក្រថែមទៀតដើម្បីឲ្យប្រជាពលរដ្ឋមានលទ្ធភាពក្នុងការការពារនូវជំងឺកូវីដ–១៩បន្ទាប់ពីមានព្រិត្តិការណ៍៣វិច្ឆិកា ។
លោកអភិបាលបញ្ជាក់ថា ម៉ាសនេះ អាចប្រគល់ជូនប្រជាពលរដ្ឋម្នាក់២ម៉ាស ដោយម៉ាសនេះអាចបោកគក់បាន ហើយក៏អាចប្រើប្រាស់បានពី ២ខែទៅ៣ខែផងដែរ បើយើងចេះថែរក្សាវាបានល្អ។លោកក៏បានអំពាវនាវឲ្យបងប្អូនប្រជាពលរដ្ឋទាំងអស់ ត្រូវរួមគ្នាពាក់ម៉ាសការពារទាំងអស់គ្នាដើម្បីទប់ស្កាត់នូវការឆ្លងនូវជំងឺកូវីដ–១៩ ។
