ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅរសៀលថ្ងៃពុធ ថ្ងៃទី១ ខែមេសា ឆ្នាំ២០២០បានសសើរលោក អង្គ វង្សវឌ្ឍនា និងលោក កើត រិទ្ធ ថាជាថ្នាក់ដឹកនាំ និងសហការី ដែលបានបំពេញការងារជាមួយគ្នាជាច្រើនឆ្នាំមកហើយ និងរួមគ្នាសម្រេចបានសមិទ្ធផលជាច្រើន ។
ក្នុងពិធីប្រកាសផ្ទេរ និងចូលកាន់មុខតំណែងរដ្ឋមន្ត្រីក្រសួងយុត្តិធម៌ថ្មីលោកកើតរិទ្ធចូលលោកអង្គ វង្សវឌ្ឍនាដែលកាន់តំណែងបីអាណត្តិ ចេញនៅទីស្ដីការក្រសួងយុត្តិធម៌ សម្ដេចក្រឡាហោមបានរំលឹកថា មុនមានវត្តមានលោក អង្គ វង្សវឌ្ឍនា ក្រៅពីរដ្ឋធម្មនុញ្ញ កម្ពុជាមិនទាន់មានច្បាប់ សំខាន់ៗដូចដែលកំពុងប្រើប្រាស់សព្វថ្ងៃនេះទេ ដូចជាក្រមព្រហ្មទណ្ឌ ក្រមរដ្ឋប្បវេណី គឺទើបតែលោក អង្គ វង្សវឌ្ឍនា ឡើងកាន់តួនាទីនោះហើយ ទើបកម្ពុជាបានបោះជំហាន គួរជាទីមោទនៈក្នុងវិស័យកសាងច្បាប់ និងលិខិតបទដ្ឋានគតិយុត្តិនានា ។
យ៉ាងណាក្តី សម្ដេចក្រឡាហហោម ក៏បានកត់សម្គាល់ដូចគ្នាដែរ អំពីចំណុចខ្វះខាតមួយចំនួន ដែលពាក់ព័ន្ធនឹងកង្វះខាតធនធានមនុស្ស ក្នុងពេលមានកំណើនសំណុំរឿង មិនមានតុល្យភាពឡើយ រវាងចំនួនសំណុំរឿង និងចំនួនមន្ត្រីតុលាការនៅកម្ពុជា ។សម្ដេចបានមានប្រសាសន៍ថា ការកកស្ទះសំណុំរឿង កាន់តែមានភាពស្មុគស្មាញ បន្ទាប់ពីការដាក់ឱ្យដំណើរការ យុទ្ធនាការប្រយុទ្ធប្រឆាំងគ្រឿងញៀន។ គិតមកដល់ពេលនេះ ចំនួនអ្នកជាប់ឃុំក្នុងសំណុំរឿងគ្រឿងញៀន មានជាង២ម៉ឺន២ពាន់នាក់ ។ ដោយឡែកបញ្ហាខ្វះទីតាំង សម្រាប់បំពេញការងារក៏ជាបញ្ហាប្រឈមដែរ ។ សម្ដេចសង្ឃឹមជឿជាក់ថា ឯកឧត្តមរដ្ឋមន្ត្រីថ្មី នឹងដោះស្រាយបញ្ហានេះ នាពេលខាងមុខ ពិសេសបន្ទាប់ពីបញ្ហាកូវីដ១៩ មានភាពធូរស្រាល ។
សម្ដេចក្រឡាហោម បាន ស្នើឱ្យក្រសួងយុត្តិធម៌ ត្រូវបង្កើនការលើកកម្ពស់ សេវាយុត្តិធម៌ ការពង្រឹងជំនឿទុកចិត្ត និងការទប់ស្កាត់ការបំពាន ដោយអយុត្តិធម៌ក្នុងសង្គម តាមរយៈការពង្រឹងការអនុវត្តច្បាប់ ការពង្រឹងភាពស្អាតស្អំ និងក្រមសីលធម៌មន្ត្រី ការពង្រឹងយន្តការវិន័យ និងការធ្វើទំនើបកម្មរដ្ឋបាលយុត្តិធម៌ ។ បន្តពង្រឹងការលើកកម្ពស់ ការផ្ដល់សេវាយុត្តិធម៌នៅមូលដ្ឋាន ការកែលម្អរយន្តការដោះស្រាយ វិវាទដើម្បីឆ្លើយតបនឹងស្ថានភាពជាក់ស្ដែង របស់សង្គមប្រកបដោយប្រសិទ្ធភាព ហើយដើម្បីសម្រេចបាន គោលបំណងខាងលើ សម្ដេចបានបន្តថា ក្រសួងយុត្តិធម៌ ត្រូវពង្រឹងការអនុវត្តយុទ្ធសាស្ត្រកំណែទម្រង់ច្បាប់ និងវិស័យយុត្តិធម៌ និងកំណែទ្រង់ប្រព័ន្ធយុត្តិធម៌ឱ្យបានត្រឹមត្រូវ ។
សម្ដេចក្រឡាហោមក៏បានមានប្រសាសន៍ អំពីតុលាការជំនាញនៅថ្នាក់សាលាដំបូង ដែលច្បាប់បានចែងឱ្យមានតុលាការរដ្ឋប្បវេណី តុលាការព្រហ្មទណ្ឌ តុលាការពាណិជ្ជកម្ម និងតុលាការការងារ ។ ប៉ុន្តែពេលនេះនៅសាលាដំបូងរាជធានី ខេត្ត មិនទាន់ដំណើរការនៅឡើយទេ ។ សម្ដេចបានណែនាំឱ្យក្រសួង ខិតខំឱ្យអស់លទ្ធភាព ដើម្បីឱ្យតុលាការជំនាញនេះ អាចដំណើរការទៅបាន ដើម្បីឆ្លើយតបនឹងការកកស្ទះសំណុំរឿង ។
សម្ដេចក្រឡាហោម ស ខេង សម្ដែងការគាំទ្រ ចំពោះគម្រោងរបស់ក្រសួងយត្តិធម៌ ដែលនឹងបើកយុទ្ធនាការដោះស្រាយ ការកកស្ទះសំណុំរឿង តាមសាលាជំនុំជម្រះក្ដីនាពេលឆាប់ៗខាងមុខ ។សម្ដេចក្រឡាហោម ស ខេងឲ្យដឹងថា គិតត្រឹមថ្ងៃទី៣០ ខែមីនា ស្ថានភាពរួមរបស់ជនជាប់ឃុំ មានជនជាប់ឃុំសរុបចំនួន៣៨.៩៩០នាក់ (ស្ត្រី ២.៥៩៣នាក់)។ ជនត្រូវចោទ និងជនជាប់ចោទ មានចំនួន ១៤.៧៩១នាក់ ក្នុងនោះជនជាប់ចោទ ៤.៧២៥នាក់ ។ ពិរុទ្ធជនមានចំនួន ១៣.៤០២នាក់ (ស្ត្រី ៩០៣នាក់)។
ពិរុទ្ធជនជាប់បណ្តឹងនៅឧទ្ធរណ៍មានចំនួន ៩៩៦នាក់ និងពិរុទ្ធជនជាប់បណ្តឹងនៅតុលាការកំពូលមានចំនួន១៣១នាក់។ ពិរុទ្ធជនមិនទាន់ទទួលបានសាលក្រម ឬសាលដីកាស្ថាពរមានចំនួន ១២.៣០៥នាក់។ទណ្ឌិតចំនួន ១០១៩៧នាក់ (ស្ត្រី ៧២៦នាក់)។
សូមបញ្ជាក់ថាលោក កើត រិទ្ធ ត្រូវបានសម្តេចតេជោ ហ៊ុន សែន នាយករដ្ឋមន្ត្រីកម្ពុជា សម្រេចជ្រើសតាំងជារដ្ឋមន្ត្រីក្រសួងយុត្តិធម៌ ជំនួសលោក អង្គ វង្សវឌ្ឍនា ដែលកាន់នៅក្រសួងនេះរយៈពេល១៦ឆ្នាំ។ លោក កើត រិទ្ធ ត្រូវបានរដ្ឋសភាផ្តល់សេចក្តីទុកចិត្តនៅថ្ងៃទី៣០ ខែមីនា ឆ្នាំ២០២០។លោក កើត រិទ្ធ បានក្លាយជារដ្ឋមន្ត្រីវ័យក្មេងមួយរូបទៀត បន្ទាប់ពីលោក សាយ សំអាល់ រដ្ឋមន្ត្រីក្រសួងបរិស្ថាន សម្រាប់រាជរដ្ឋាភិបាលកម្ពុជា។លោក កើត រិទ្ធ អាយុ ៤១ឆ្នាំ កើតនៅថ្ងៃទី០២ ខែមករា ឆ្នាំ១៩៧៩ និងមានទីកំណើតនៅភូមិព្រៃទទឹង ស្រុកព្រៃឈរ ខេត្តកំពង់ចាម។ លោក គឺជានិស្សិតដែលតស៊ូព្យាយាមសិក្សារហូតទទួលបានអាហាររូបករណ៍សិក្សាផ្នែកច្បាប់នៅប្រទេសបារាំងនៅឆ្នាំ ១៩៩៩។
