រតនគិរី ៖ នៅព្រឹកថ្ងៃទី៣០ខែមីនាឆ្នាំ២០២០នេះនៅស្នងការដ្ឋាននគរបាលខេត្តរតនគិរីបានរៀបចំផ្សព្វផ្សាយការកែសម្រួលអនុក្រឹត្យលេខ៤៤ អនក្រ.បកចុះថ្ងៃទី២១ខែមីនាឆ្នាំ២០១៧ស្តីពីការពិន័យអន្តរការណ៍ចំពោះអំពើល្មើសនឹងច្បាប់ចរាចរណ៍ផ្លូវគោកក្រោមអធិបតីភាពលោកឧត្តមសេនីយ៍ទោយិន ចំណានស្នងការនគរបាលខេត្តរតនគិរីនិងមានការចូលរួមពីលោកស្នងការរង,នាយរងផែន,នាយការិយាល័យ,អធិការ,អធិការរង,នាយផ្នែកនិងនាយផ្នែករងចំណុះឲ្យស្នងការដ្ឋាននគរបាលខេត្តរតនគិរីចំនួន៥៤នាក់,ស្រី១នាក់។
របាយការណ៍អានដោយលោកឧត្តមសេនីយ៍ត្រីអ៊ុង សុភាពស្នងការរងទទួលផែនសណ្តាប់ធ្នាប់បានលើកឡើងថាក្នុងរយៈពេល៣ខែគ្រោះថ្នាក់ចរាចរណ៍អ្នកស្លាប់បានកើនឡើងចំនួន១នាក់បើប្រៀបធៀបទៅនឹង៣ខែដើមឆ្នាំ២០១៩,ទោះយ៉ាងណាក្តីរយៈពេល៣ខែដើមឆ្នាំនេះកងកម្លាំងនគរបាលចរាចរណ៍ទូទាំងខេត្តបានធ្វើសកម្មភាពយ៉ាងសស្រាក់សស្រាំអនុវត្តតាមទិសដៅរបស់គណៈកម្មាធិការសុវត្ថិភាពចរាចរណ៍ផ្លូវគោកនិងគោលដៅណែនាំរបស់ក្រសួងមហាផ្ទៃដោយខិតខំប្រឹងប្រែងបំពេញភារកិច្ចមិនខ្លាចនឿយហត់ដើម្បីរួមចំណែកពង្រឹងការអនុវត្តន៍ច្បាប់ចរាចរណ៍ផ្លូវគោក ។ លោកថាទោះបី៣ខែនេះ ចំនួនអ្នកស្លាប់កើនឡើងចំនួន១នាក់ប៉ុន្តែគ្រោះថ្នាក់ចរាចរណ៍បានថយចុះចំនួន២២លើក របួសធ្ងន់ថយចុះ៤២នាក់និងរបួសស្រាលថយចុះ១៩នាក់។
លោកស្នងការរងរូបនេះបញ្ជាក់ឲ្យដឹងទៀតថាពេលបំពេញការងារកម្លាំងមានការខ្វះខាតឧបករណ៍សម្ភារៈ បច្ចេកទេសមួយចំនួនក្តីក៏បងប្អូនបានតស៊ូពុះពារគ្រប់ឧបសគ្គទ្រាំទ្រនឹងកំដៅថ្ងៃ ភ្លៀងរលឹម ចេញល្បាតត្រួតពិនិត្យការកកស្ទះចរាចរណ៍ ដោះស្រាយការគ្រោះថ្នាក់ជួយសង្គ្រោះជនរងគ្រោះមិនគិតពីពេលវេលាថ្ងៃយប់ ថ្ងៃបុណ្យទាន ថ្ងៃឈប់សម្រាកឫភាពប្រឈមនឹងគ្រោះថ្នាក់ដល់អាយុជីវិតឡើយ។
ក្នុងអង្គពិធីខាងលើនេះដែរលោកឧត្តមសេនីយ៍ទោយិន ចំណានអានសុន្ទរកថាសម្តេចក្រឡាហោមស ខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនិងជាប្រធានគណៈកម្មាធិការសុវត្ថិភាពចរាចរណ៍ផ្លូវគោកជូនមន្ត្រីនគរបាលដែលបានចូលរួមក្នុងពេលនេះគឺដើម្បីឲ្យបងប្អូនយល់អំពីការអប់រំផ្សព្វផ្សាយនិងការពង្រឹងការអនុវត្តច្បាប់ស្តីពីចរាចរណ៍ផ្លូវគោកក៏ត្រូវបានធ្វើឡើងគ្រប់រូបភាពសំដៅលើកកម្ពស់សុវត្ថិភាពចរាចរណ៍ផ្លូវគោក។ក្នុងសន្ទរកថាគូសបញ្ជាក់ថាបើប្រៀបធៀបនឹងឆ្នាំ២០១៨និងឆ្នាំ២០១៩កន្លងទៅគ្រោះថ្នាក់ចរាចរណ៍ផ្លូវគោកមានការកើនឡើង៨៥៤លើកស្មើនឹង២៦ភាគរយក្នុងនោះអ្នកស្លាប់កើនឡើងចំនួន១៣៧១នាក់ស្មើនឹង២៩ភាគរយ។ហេតុនេះដើម្បីទប់ស្កាត់និងកាត់បនថយឲ្យបានជាអតិបរមានូវគ្រោះថ្នាក់ចរាចរណ៍ផ្លូវគោកសំដៅការពារអាយុជីវិតរបស់ប្រជាពលរដ្ឋ គណៈកម្មាការជាតិសុវត្ថិភាពចរាចរណ៍ផ្លូវគោកបានសម្រេចប្រកាសរឹតបន្តឹងការអនុវត្តន៍ច្បាប់ស្តីពីចរាចរណ៍ផ្លូវគោក ចាប់ពីឆ្នាំ២០២០នេះតទៅ។
ផ្អែកលើវិធានការនេះនិងដោយមានការសិក្សាស្រាវជ្រាវអំពីឥរិយាបថនៃការគោរពអនុវត្តន៍ច្បាប់របស់អ្នកប្រើប្រាស់ផ្លូវនិងផ្អែកតាមបទពិសោធន៍នៅតាមប្រទេសនានារាជរដ្ឋាភិបាលបានសម្រេចធ្វើវិសោធនកម្មអនុក្រឹត្យស្តីពីការពិន័យអន្តរការណ៍ដោយបង្កើនប្រាក់ពិន័យអន្តរការណ៍ពី៣ទៅ៥ដងចំពោះបទល្មើសចរាចរណ៍ផ្លូវគោកដើម្បីជំរុញឲ្យអ្នកប្រើប្រាស់ផ្លូវទាំងអស់គោរពអនុវត្តច្បាប់ឲ្យបានម៉ឺងម៉ាត់បំផុត។
បន្ថែមលើនេះទៀតលោកឧត្តមសេនីយ៍ស្នងការជំរុញឲ្យកម្លាំងនគរបាលចូលរួមអនុវត្តពង្រឹងការងារសន្តិសុខ,អនុវត្តបទបញ្ជាអំពីការទប់ស្កាត់និងបង្ការវិរុសកូវីដ-១៩,ការពារគោលដៅទាំង១៤(កន្លែងទុកសម្រាប់ព្យាបាលអ្នកជំងឺ)និងតាមដានមុខសញ្ញាជនសង្ស័យដែលជាអ្នកចំណូលថ្មី,ចុះស្រាវជ្រាវនៅទីប្រជុំជន ទីផ្សារដើម្បីស្វែងរកជនល្មើសឈ្លៀតឱកាសរកផលប្រយោជន៍ លក់ឧបករណ៍ធ្វើតេស្តិ៍មេរោគកូវីដ-១៩នៅក្នុងភូមិសាស្ត្រខេត្តរតនគិរីទាំងមូល។
សូមបញ្ជាក់ថានៅស្នងការដ្ឋាននគរបាលខេត្តបើកវគ្គរៀនសូត្រជូនមន្ត្រីនគរបាលចរាចរណ៍ថ្នាក់អធិការរង,ប្រធានផ្នែកនិងអនុប្រធានផ្នែករយៈពេល៤ថ្ងៃគឺចាប់ពីរសៀលថ្ងៃទី៣០ខែមីនារហូតដល់ថ្ងៃទី២ខែមេសាឆ្នាំ២០២០និងការអនុវត្តន៍ផាកពិន័យអន្តរការណ៍គឺចាប់ផ្តើមពីដើមខែឧសភាឆ្នាំ២០២០នេះតទៅ៕
ដោយ:ចាបសំអាន
