ម៉ាឡេស៊ី៖ ព្រះមហាក្សត្រម៉ាឡេស៊ី និងអគ្គមហេសី បានសម្រេចព្រះទ័យគង់ប្រថរាប់នៅដាច់ដោយឡែកដើម្បីតាមដានព្រះរាជសុខភាព រយៈពេល១៤ថ្ងៃ បន្ទាប់ពីអ្នកបម្រើការក្នុងព្រះបរមរាជវាំង Istana Negara ចំនួន៧នាក់ផ្ទុកជំងឺថ្មីកូវីដ-១៩។
សេចក្ដីថ្លែងការណ៍ របស់ព្រះបរមរាជវាំងអ៊ិស្តាណានីហ្ការ៉ា( Istana Negara )ចេញកាលពីថ្ងៃ ព្រហស្បតិ៍ ទី ២៦ ខែ មីនា បានឲ្យដឹងថា អ្នកបម្រើការក្នុងព្រះបរមរាជវាំងចំនួន៧នាក់ ត្រូវគេបញ្ជូនទៅសម្រាកព្យាបាលនៅឯមន្ទីរពេទ្យគូឡាឡាំពួរ បន្ទាប់ពីធ្វើតេស្ដវិជ្ជមានជំងឺថ្មីកូវីដ-១៩។ បច្ចុប្បន្ននេះ ក្រសួងសុខាភិបាលក៏កំពុងកំណត់អត្តសញ្ញាណនៃប្រភពឆ្លងរបស់អ្នកជំងឺទាំង៧នោះផងដែរ។ ជាមួយគ្នានេះដែរ រាល់អ្នកទាំងឡាយណា ដែលមានទំនាក់ទំនងជិតស្និទ្ធជាមួយអ្នកជំងឺទាំងនោះ ត្រូវបានគេណែនាំឲ្យទៅធ្វើតេស្ដរកមេរោគ និងដើម្បីធានាសុវត្ថិភាព គឺតម្រូវឲ្យនៅដាច់ដោយឡែកពីអ្នកដទៃរយៈពេល១៤ថ្ងៃតែម្ដង។
ព្រះមហាក្សត្រស៊ុលតង់អាឌុលឡាស៊ុលតង់អាម៉ាដស្ហា( Sultan Abdullah Sultan Ahmad Shah) និងអគ្គមហេសីរបស់ទ្រង់ Tunku Azizah Aminah Maimunah Iskandariah បានធ្វើតេស្ដរកមេរោគកូវីដ-១៩នោះរួចហើយ ដោយលទ្ធផលរបស់ទ្រង់ទាំងពីរអង្គគឺអវិជ្ជមាន។ ទោះជាយ៉ាងណាក៏ដោយ ទ្រង់ទាំងពីរអង្គ បានសម្រេចព្រះទ័យគង់នៅដាច់ដោយឡែកក្នុងព្រះបរមរាជវាំងរយៈពេល១៤ថ្ងៃ ដែលបានចាប់ផ្ដើមតាំងពីថ្ងៃពុធមកម្ល៉េះ។
សូមជម្រាបថា ប្រទេសម៉ាឡេស៊ីមានអ្នកស្លាប់ដោយសារជំងឺកូវីដេ-១៩ ចំនួន២៣នាក់ និងមានករណីឆ្លងសរុបចំនួន២,០៣១នាក់ ដែលជាតួលេខខ្ពស់ជាងគេបំផុតនៅអាស៊ីអាគ្នេយ៍។ នេះបើយោងទៅតាមតារាងទិន្នន័យ Tracking Coronavirus របស់ BNO News គិតត្រឹមព្រឹកថ្ងៃទី ២៧ ខែ មីនា ឆ្នាំ ២០២០ ៕
