ខេត្តកណ្តាល ៖ ប្រាវ៉ូហេតុតែគេអ្នកចេះនិងមានធនធានមិនទាន់ជ្រុះពន្លៃពីក្បាលផងឡើងស្នងការរងនគរបាលខេត្តបាត់! នគរបាលចាស់ៗដាំចេកទុកទៅ។លោកវរសេនីយ៍ទោ ចាន់ តិចហុង អាយុជាង២០ឆ្នាំ ដែលចូលក្របខណ្ឌនគរបាលជាតិមិនទាន់បាន៥ឆ្នាំផង ត្រូវបានតែងតាំងជាស្នងការរង នៃស្នងការដ្ឋាននគរបាលខេត្តកណ្ដាលយ៉ាងស្ងៀមស្ងាត់។
តាមប្រកាសរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃចុះថ្ងៃទី១៦ ខែមីនា ឆ្នាំ២០២០ បានសម្រេចតែងតាំងមុខតំណែងលោកវរសេនីយ៍ទោ ចាន់ តិចហុង អត្តលេខ៧៧៩០៥ ដែលមានអាយុ២០ឆ្នាំស្តើងពីនាយរងការិយាល័យ នៃនាយកដ្ឋានប្រឆាំងបទល្មើសល្បែងពាណិជ្ជកម្ម ទៅជាស្នងការរង នៃស្នងការដ្ឋាននគរបាលខេត្តកណ្តាល។
ចំពោះលោក ចាន់ តិចហុង មន្ដ្រីនគរបាលខ្លះមិនទាំងស្គាល់ឈ្មោះ និងតួនាទី របស់លោកផង មនុស្សភាគច្រើន ទើបតែស្គាល់លោក ចាន់ តិចហុង នៅក្នុងប្រកាសតែងតាំង និងផ្ទេរភារកិច្ចរបស់មន្ដ្រីនគរបាលជាតិ នៅពេលនេះតែប៉ុណ្ណោះ ។សាធារណៈជនពិតជាមិនដឹងថា លោក ចាន់ តិចហុង មានស្នាដៃឆ្នើមក្នុងការងាររបស់លោកកម្រិតណាទេ ទើបបានជាលោកទទួលបានមុខតំណែង និងតួនាទីលឿនយ៉ាងនេះ ខណៈមានមន្ដ្រីនគរបាលចាស់ៗ និងមានស្នាដៃមួយចំនួន មិនហ៊ានស្រម៉ៃ ឬយល់សប្ដិឃើញតំណែងនេះផង។
ជុំវិញករណីខាងលើនេះលោកឧត្ដមសេនីយ៍ត្រី ឈឿន សុចិត្ត ស្នងការ នគរបាលខេត្តដែលមានឪពុកធ្លាប់ធ្វើជាចៅហ្វាយខេត្តកណ្តាលបានបកស្រាយការពារថា៖
១. លោកវរសេនីយ៍ទោ ចាន់ តិចហុង មុនឡើងជាស្នងការរង គឺមានតួនាទីជានាយរងការិយាល័យ នៅនាយកដ្ឋានប្រឆាំងបទល្មើសល្បែងពាណិជ្ជកម្ម ដែលតាមឋានៈនុក្រុមតំណែងនេះ ស្មើនឹងនាយការិយាល័យនៅតាមស្នងការដ្ឋាននគរបាលខេត្ត។ ដូច្នេះ ការឡើងតំណែងរបស់គាត់ គឺពុំមានផ្លោះទេ គឺឡើងតាមឋានុក្រមមួយថ្នាក់។២. លោកវរសេនីយ៍ទោ ចាន់ តិចហុង មានចំណេះដឹងភាសាចិន និងអង់គ្លេស ស្នងការដ្ឋាននគរបាលខេត្តកណ្តាល ត្រូវការ។
៣. លោកវរសេនីយ៍ទោ ចាន់ តិចហុង បានបម្រើការងារក្នុងក្របខ័ណ្ឌស៊ីវិល រយៈពេល៥ឆ្នាំ និងនគរបាល៥ឆ្នាំសរុបមកបានបម្រើការងាររដ្ឋ ១០ឆ្នាំមកហើយ(កុំចេះតែថាបើមិនដឹងនោះ!!!)។បើគិតទៅលោកចាន់តិចហុងចូលធ្វើការរដ្ឋតាំងរៀនមិនទាន់ចប់ចេញពីសាលាណុះ។មិនដឹងថាតើលោកពេជ្រប៊ុនធិនរដ្ឋមន្ត្រីក្រសួងមុខងារសាធារណៈជ្រាបដែរឬអត់ទេរឿងលោកចាន់តិចហុងចូលក្របខណ្ឌតាំពីមិនទាន់គ្រប់អាយុនោះ?។
