ភ្នំពេញ ៖ ក្រសួងសុខាភិបាល បានប្រកាសរកឃើញអ្នកផ្ទុកកូវីដ-១៩ ចំនួន៤ករណីទៀត ដែលធ្វើឱ្យចំនួនករណីអ្នកផ្ទុកវីរុសនេះកើនដល់៣៧នាក់ហើយ។
សេចក្តីជូនព័ត៌មានរបស់ក្រសួងសុខាភិបាលចុះថ្ងៃទី១៨ខែមីនានេះ ស្តីពីការរកឃើញ២ករណីថ្មីទៀតនោះ ជាបុរសជនជាតិខ្មែរឥស្លាមដែលវិលត្រឡប់ មកពីចូលរួមពិធីសាសនា នៅប្រទេសម៉ាឡេស៊ី និង២ករណីថ្មី ជាបុរសជនជាតិម៉ាឡេស៊ីមានវីរុសកូវីដ-១៩។ សរុបករណីវិជ្ជមានវីរុសកូវីដ១៩នៅទូទាំងប្រទេស គិតយប់ថ្ងៃទី១៨មីនានេះ ចំនួន៣៧នាក់ (ស្រី២នាក់) ។
ក្រុមការងាររបស់ក្រសួងសុខាភិបាល កំពុងតែធ្វើកិច្ចការស្រាវជ្រាវករណីថ្មីជាបន្តទៀត ហើយនឹងបន្តជម្រាប់ជូនដល់បងប្អូនសាធារណជន ប្រសិនបើរកឃើញករណីវិជ្ជមានវីរុសកូវីដ១៩ថ្មីណាផ្សេងទៀត.។សូមបញ្ជាក់ថា លោកស្រី ឱ វណ្ណឌីនរដ្ឋលេខាធិការក្រសួងសុខាភិបាលនិងជាអ្នកនាំពាក្យ នៅក្នុងសន្និសិទកាសែតរៀបចំដោយអង្គភាពអ្នកនាំពាក្យរាជរ្ដឋាភិបាលនាព្រឹកថ្ងៃ ១៨ មីនា បានបញ្ជាក់ប្រាប់ក្រុមអ្នកសារព័ត៌មានថា ក្រសួងសុខាភិបាលមិនមានការទាមទារយកលុយពីសាធារណជន ពេលមកពិនិត្យរកវីរុស COVID-19ទេ។
លោកស្រីបញ្ជាក់ថា មានអ្នកប្រើប្រាស់បណ្តាញសង្គមមួយចំនួនបាននាំគ្នាបង្ហោះ និងចែកចាញថា៖ «ធ្វើតេស្តរក COVID-19 បើពិនិត្យឃើញវិជ្ជមាន(ផ្ទុកជំងឺ) គឺមិនអស់លុយទេ តែបើពិនិត្យឃើញអវិជ្ជមាន(មិនផ្ទុកជំងឺ) គឺអស់លុយ»។ លោកស្រីបន្តថា៖ «រឿងដែលថា ក្រសួងយកលុយពេលមកធ្វើតេស្តនោះ គឺជាការវាយប្រហារវិស័យសុខាភិបាលហើយ។ កន្លងមកយើងបានធ្វើតេស្តលើពលរដ្ឋ ១១១២ករណីហើយ ទាំងនោះរួមបញ្ចូលទាំងអ្នកផ្ទុកទាំង៣៥នាក់ ដោយមិនបានទាមទារយកលុយពីអ្នកទាំងនោះឡើយ ពោលគឺរដ្ឋជាអ្នកចេញលុយបន្ទុកទាំងអស់»។
រដ្ឋលេខាធិការរូបនេះ បានបន្ថែមថា៖ «បើសាធារណជនសង្ស័យថាខ្លួនមាន COVID-19 សូមទាក់ទងរកការពិនិត្យពីមន្ត្រីជំនាញ និងមន្ទីរសុខាភិបាល ហើយការពិនិត្យរកវីរុសនេះ មិនមានការយកលុយទេ។ មួយទៀត បើថ្ងៃនេះយើងមិនមាន COVID-19 តែស្អែកអាចមាន បើយើងមិនបានការពារខ្លួន។» បានន័យថាបើគ្មានការថែរក្សាខ្លួនទេការមកធ្វើតេស្តដោយគ្មានរោគសញ្ញាគ្មានប្រយោជន៍។
សម្រាប់ចំនួនមេរោគកូវីដ១៩ លោកស្រីថាមានចំនួនថយចុះជាបណ្តើរៗហើយ ដោយសារតែមានការព្យាបាលយ៉ាងយកចិត្តទុកដាក់ពីក្រុមគ្រូពេទ្យជំនាញ។
លោកស្រីវេជ្ជបណ្ឌឹតបន្តថា ប្រសិនបើមនុស្សមា្នក់មានសុភាពល្អ មិនជក់បារី មិនមានជំងឺផ្សេងៗក្នុងរាង្គកាយទេ វីរុសcovid19នេះ មិនអាចវាយលុកធ្វើឱ្យមានគ្រោះថ្នាក់ដល់អ្នកឆ្លងបានទេ។ ដូច្នេះ លោកស្រីស្នើឱ្យបន្តរក្សាអនាម័យជាប្រចាំ តាមរយៈលាងដៃនឹងសាប៊ូ លាងដៃជាមួយទឹកអាកុល និងកាត់បន្ថយចេញទៅក្រៅដែលមានមនុសប្រមូលផ្តុះច្រើន ហាមប៉ះពាល់អ្នកដែលមានជម្ងឺ ក្អក ឈឺករ ក្តៅខ្លួន ជាដើម។
