ភ្នំពេញ ៖ ស្របពេលដែលមានតម្រូវការអាល់កុលខ្ពស់ដើម្បីបង្ការកូវីដ១៩ក្រសួងសុខាភិបាល បានចេញសេចក្តីជូនដំណឹងមួយចុះថ្ងៃទី១៨មិនាដោយណែនាំឱ្យ ម្ចាស់ឱសថស្ថាន និងឱសថការីទទួលបន្ទុកបច្ចេកទេសនៅតាមឱសថស្ថាន នៅកម្ពុជា ត្រូវទិញអាល់កុល ដែលមានប្រភពច្បាស់លាស់ ។
ក្រសួងសុខាភិបាល បានប្រកាសថា បច្ចុប្បន្ននេះ មានឱសថស្ថាន ឱសថស្ថានរងមួយចំនួន បានទិញអាល់កុលមកលក់ ដោយពុំមានប្រភពច្បាស់លាស់ ដែលមានគុណភាពមិនត្រឹមត្រូវតាមស្តង់ដារ ។នៅកម្ពុជា ដោយអាល់កុលមួយចំនួន មានការលាយសារធាតុមេតាណុលជាមួយអេតាណុល និងអាល់កុលមួយចំនួនទៀត ពុំមានសារធាតុអេតាណុលទេ គឺមានតែសារធាតុមេតាណុលតែប៉ុណ្ណោះ។
ក្រសួងសុខាភិបាល បានជម្រាបដល់សាធារណជនឱ្យបានជ្រាបថា ប្រើប្រាស់សំរាប់សំលាប់មេរោគ គឺជាល្បាយដែលមានសារធាតុអេតាណុលជាមួយទឹក ដោយមិនត្រូវមានសារធាតុផ្សេងទៀតទេ ជាពិសេសសារធាតុមេតាណុល។ ចំពោះសារធាតុមេតាណុលមិនត្រូវបានគេប្រើប្រាស់សម្រាប់សម្លាប់មេរោគទេ ដោយសារធាតុនេះ មានមុខងារសម្លាប់មេរោគខ្សោយបំផុត ប៉ុន្តែវាអាចបណ្ដាលឲ្យពុលនឹងគ្រោះថ្នាក់ដល់អាយុជីវិតទៀតផង ក្នុងករណីប្រើប្រាស់សារធាតុនេះមិនបានត្រឹមត្រូវ។សូមបញ្ជាក់ថាថ្មីៗនេះមន្ត្រីកាំកុងត្រូលចបានចុះត្រួតពិនិត្យនិងឱសថស្ថានមួយនៅក្បែរផ្សារអូរឡាំពិកដែលលក់អាលកុលគ្មានគុណភាព។
យោងតាមហ្វេសបុករបស់លោក លោក គង់ វុទ្ធី អនុប្រធានសាខា កាំកុងត្រូលផែស្ងួតចុងទីភ្នំពេញ បានឲ្យដឹងពីការចុះទៅត្រួតពិនិត្យឪសថស្ថាន បានដាក់លក់អាល់កុលលាងដៃក្លែងក្លាយធ្វើឲ្យប៉ះពាល់សុខភាព ប្រជាជន លោកថា៖ អាល់កុលដែលមានមេតាណុលចំនួន៤ ពីដុងស្មើ២០ លីត្រ ត្រូវបានដកហូត។ សូមប្រកាសអំពាវនាវដល់ប្រជាពលរដ្ឋ សូមកុំទិញផលិតផលអាល់កុលណាដែលគ្មានស្លាកសញ្ញា និងមិនមានការបញ្ជាក់ពីប្រភពច្បាស់លាស់ ដើម្បីប្រើប្រាស់ សម្រាប់ការលាងសម្អាតកំចាត់មេរោគ ឬបង្ការវីរុសCovid-19។
គួរបញ្ជាក់ថាតាមវេបសាយ Hello គ្រូពេទ្យ បានឲ្យដឹងថា យោងតាមលទ្ធផលវិភាគរបស់មន្ទីរពិសោធន៍របស់អគ្គនាយកដ្ឋានកាំកុងត្រូលរកឃើញថា អាល់កុលដែលបាន និងកំពុងចរាចរលើទីផ្សារ ភាគច្រើនមិនមែនជាប្រភេទអាល់កុលធម្មតា (អេទីលអាល់កុល) ដែលមានមុខងារប្រើប្រាស់សម្រាប់លាងសម្អាតដៃ បង្ការការចម្លងមេរោគទេ។ ផ្ទុយទៅវិញអាល់ទាំងនោះ ជាសារធាតុមេតាណុល ដែលមានបរិមាណខ្ពស់រហូតដល់ ៨០%។
