កណ្តាល ៖ អ្នកទេសចរ និងនាវិកប្រមាណ ២០០នាក់ដែលជិះលើនាវា៥គ្រឿងដែលវៀតណាមមិនឲ្យចូលស្រុកគេ ត្រូវបានអនុញ្ញាតឲ្យធ្វើដំណើរ ចាកចេញពីច្រកក្អមសំណរ ឆ្ពោះមករាជធានីភ្នំពេញ ក្រោយពីពិនិត្យមិនឃើញមានមេរោគ COVID-19 សម្រាប់អ្នកដែលជិះនៅលើ នាវាទាំងនេះ។នេះបើតាមលោក រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានប្រាប់ភ្នាក់ងារព័ត៌មាន។
ក្រោយពិនិត្យឃើញថា ក្រុមទេសចរ និងអ្នកបម្រើការងារនៅលើនាវាទាំងនេះ មិនមានរោគសញ្ញាណាមួយ នៃជំងឺ COVID-19 បន្ទាប់ពីមានការត្រួតពិនិត្យពីក្រុម ចត្តឡីស័ក ក្រុមការងារបានសម្រេចឲ្យនាវា អាចបន្តដំណើរឆ្ពោះមករាជធានីភ្នំពេញ ប៉ុន្តែពេលដល់ភ្នំពេញ ត្រូវធ្វើការធ្វើតេស្តម្តងទៀត។
សូមបញ្ជាក់ថា នាវាទេសចរណ៍ខ្មែរ ៤គ្រឿង ដែលវៀតណាម មិនឱ្យចូលចតនោះ បានវិលត្រឡប់មកដល់ច្រកក្អមសំណរ ស្ថិតក្នុងស្រុកលើកដែក ខេត្តកណ្តាល នៅល្ងាច និងយប់ថ្ងៃទី១៦ ខែមីនា ឆ្នាំ២០២០។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ថា ក្នុងចំណោមនាវាទេសចរណ៍ទាំង ៥គ្រឿង ដែលនឹងត្រូវចតនៅច្រកក្អមសំណរនេះ (មួយគ្រឿងកំពុងចតនៅក្អមសំណររួចហើយ) នាវា ៣គ្រឿង មានអ្នកទេសចរ។ ដោយឡែកនាវាពីរគ្រឿងទៀត មានតែអ្នកបម្រើការងារលើនាវា និងនាវិក មិនមានអ្នកទេសចរនោះឡើយ។ លោករដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា នាវាទាំង ៥គ្រឿងផ្ទុកមនុស្សសរុប ២០០នាក់ ក្នុងនោះអ្នកទេសចរ ៧៧នាក់, អ្នកបម្រើការងារ និងនាវិក ១២៣នាក់៕
