ហ្សឺណែវ ៖ អង្គការសុខភាពពិភពលោកហៅកាត់ថា WHO បានប្រកាសថាមានមនុស្សចំនួន ១០,៩៥៥នាក់ បានឆ្លងវីរុសកូរ៉ូណាថ្មី (COVID-19) ក្នុងរយៈពេលតែ ២៤ម៉ោងប៉ុណ្ណោះ កាលពីថ្ងៃអាទិត្យទី១៥មិនានៅទូទាំងពិភពលោក (មិនគិតចំនួននៅចិន) ខណៈស្ថានការណ៍នៃការរីករាលដាល គឺកាន់តែអាក្រក់ខ្លាំងឡើងៗហើយ។
បើតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ នាព្រឹកថ្ងៃចន្ទ ទី១៦ ខែមីនា ឆ្នាំ២០២០ ឱ្យដឹងថាបើបូកថែមតួលេខខាងលើនេះ ធ្វើឲ្យចំនួនអ្នកឆ្លងទូទាំងសកលលោកក្រៅពីចិន កើនឡើងរហូតដល់ ៧២,៤៦៩នាក់ ។ប្រទេសដែលកំពុងរងគ្រោះធ្ងន់ធ្ងរបំផុតនាពេលនេះគឺ អ៉ីតាលីមានអ្នកឆ្លងជាង ២៤,០០០ករណី, អ៉ីរ៉ង់ជាង ១៣,០០០ករណី, កូរ៉េខាងត្បូងជាង ៨,០០០ករណី និងអេស្ប៉ាញជិត ៨,០០០ករណី។ ដោយឡែកសហរដ្ឋអាមេរិក អាល្លឺម៉ង់ បារាំង និងអង់គ្លេស ក៏កំពុងបង្ហាញសញ្ញាឈានទៅរកភាពធ្ងន់ធ្ងរខ្លាំងផងដែរ។
គួរបញ្ជាក់ថា បច្ចុប្បន្ននេះមនុស្សសរុប ១៥៣,៥១៧នាក់ហើយបានឆ្លង COVID-19 នៅក្នុងបណ្តាប្រទេសចំនួន ១៤៤ នៅទូទាំងភពផែនដី ដែលមានប្រទេសផ្លូវការចំនួន ១៩៣ និងប្រជាជនសរុបជាង ៧ពាន់លាននាក់។
ដោយឡែក ទីភ្នាក់ងារព័ត៌មាន AP នៅព្រឹកថ្ងៃចន្ទ ទី១៦ ខែមីនា ឆ្នាំ២០២០ បានឱ្យដឹងថា ការធ្វើតេស្ដផ្នែកសិក្សាស្រាវជ្រាវមួយលើវ៉ាក់សាំង ប្រឆាំងនឹងវីរុសកូរ៉ូណាថ្មី (COVID-19) នឹងត្រូវចាប់ផ្ដើមធ្វើឡើងនៅថ្ងៃចន្ទសប្ដាហ៍នេះ (ម៉ោងនៅវ៉ាស៊ីនតោន) ដោយក្រុមអ្នកចូលរួមការពិសោធន៍ម្នាក់ៗ នឹងទទួលការចាក់វ៉ាក់សាំងផ្សេងៗពីគ្នា។ការធ្វើតេស្ដនេះទទួលបានការគាំទ្រ ពីវិទ្យាស្ថានជាតិសុខាភិបាលអាមេរិក (NIH)។
ប៉ុន្តែការធ្វើតេស្ដវ៉ាក់សាំង មិនទាន់ត្រូវបានប្រកាសជាសាធារណៈនៅឡើយទេ។ មន្ត្រីដដែលបន្ថែមថា ការធ្វើតេស្ដពិសោធន៍លើវ៉ាក់សាំងប្រឆាំងនឹងវីរុសកូរ៉ូណាថ្មី (COVID-19) នឹងត្រូវធ្វើឡើងនៅវិទ្យាស្ថានស្រាវជ្រាវសុខាភិបាលរដ្ឋវ៉ាស៊ីនតោន ខាយសឺ (Kaiser Permanente Washington Health Research Institute) ក្នុងទីក្រុងសៀតថល (Seattle) ដោយមានអ្នកស្ម័គ្រចិត្តចូលរួម ជាយុវជនមានសុខភាពល្អចំនួន ៤៥នាក់។
ក្រុមអ្នកស្ម័គ្រចិត្តទាំង ៤៥នាក់ នឹងទទួលការចាក់វ៉ាក់សាំងផ្សេងៗពីគ្នា ដែលត្រូវបានអភិវឌ្ឍឡើងរួមគ្នាដោយវិទ្យាស្ថាន NIH និង ក្រុមហ៊ុន ម៉ូឌែណា (Moderna) ហើយអ្នកចូលរួមទាំងនេះទៀតសោត នឹងមិនប្រឈមមុខនឹងការឆ្លងវីរុសនោះទេ ខណៈពួកគេមិនមានផ្ទុក COVID-19 ៕
