ភ្នំពេញ ៖ ថ្មីៗនេះ លោកឧត្តមសេនីយ៍ឯក រុន រ័ត្នវាសនា ប្រធាននាយកដ្ឋាន នគរបាលចរាចរណ៍និងសណ្តាប់ធ្នាប់សាធារណៈបានព្រមាន ចាត់វិធានការតឹងរឹងចំពោះអ្នកបើកបរថយន្តដឹកដី ថ្ម ក្រួស ខ្សាច់ ជ្រុះរាយប៉ាយលើដងផ្លូវដែលធ្វើឲ្យប៉ះពាល់ដល់ផលប្រយោជន៍សាធារណៈ ពិសេសនៅរាជធានីភ្នំពេញ និងខេត្តកណ្តាល។
លោកឧត្តមសេនីយ៍ឯកបានមានប្រសាសន៍ទៀតថា លោកយល់ស្របតាមមតិដែលលើកឡើងថាប្រទេសជាតិកំពុងមានការអភិវឌ្ឍ ពិសេសវិស័យសំណង់ដែលធ្វើឲ្យតម្រូវការវត្ថុធាតុដើមរ៉ែ ដូចជាដី ថ្ម ក្រួស ខ្សាច់កើនឡើង ប៉ុន្តែការដឹកជញ្ជូន និងវេចខ្ចប់នៅមិនទាន់គោរពតាមច្បាប់នៅឡើយ បើទោះបីមន្ត្រីមានសមត្ថកិច្ចបានចុះអប់រំ និងពិន័យនៅលើដងផ្លូវ ទីតាំងរណ្តៅដី និងដេប៉ូលក់ក៏ដោយ ក៏បងប្អូនអជីវករ ក៏ដូចជាអ្នកបើកបរមួយចំនួនមិនព្រមអនុវត្តតាមច្បាប់សោះឡើយ។
ជាក់ស្តែង ក្នុងប្រតិបតិ្តការល្បាតចល័តត្រួតពិនិត្យរយៈពេលបីថ្ងៃ ដឹកនាំដោយលោក ឌិត ទីណា រដ្ឋលេធិការក្រសួងរ៉ែ និងថាមពល និងលោកឧត្តមសេនីយ៍ឯក រុន រ័ត្នវាសនា បានឃាត់រថយន្តចំនួន២០គ្រឿង និងបិទទីតាំងរណ្តៅដីចំនួន៤កន្លែងនិងដេប៉ូលក់ចំនួន២កន្លែង ក្នុងរាជធានីភ្នំពេញ និងខេត្តកណ្តាលទុកជាការព្រមាន ដូច្នេះដើម្បីទប់ស្កាត់ និងកាត់បន្ថយបញ្ហានេះ លោកឧត្តមសេនីយ៍ឯក នឹងចាត់វិធានការតាមផ្លូវច្បាប់ដោយឃាត់រថយន្តទុកតាមមាត្រា៥៦ មាត្រា៥៧ និងមាត្រា៦៦នៃច្បាប់ស្តីពីចរាចរណ៍ផ្លូវគោក និងដកហូតប័ណ្ណបើកបរក្នុងករណីមិនរាងចាល។
ក្នុងនាមប្រធាននាយកដ្ឋាននគរបាលចរាចរណ៍និងសណ្តាប់ធ្នាប់ លោកបានអំពាវនាវយ៉ាងទទូចដល់បងប្អូនអជីវករដឹកដី ថ្ម ក្រួស ខ្សាច់ សូមមេត្តាចូលរួមគោរពច្បាប់ស្តីពីចរាចរណ៍ផ្លូវគោក និងអនុវត្តតាមការណែនាំរបស់ក្រសួងរ៉ែ និងថាមពលឱ្យបានត្រឹមត្រូវទាំងអស់គ្នាដើម្បីរួមចំណែកកាត់បន្ថយគ្រោះថ្នាក់ បណ្ដាលឱ្យបាត់បង់ជីវិត ឬពិការ និងខូចខាតទ្រព្យសម្បត្តិជាដើម ៕