វៀតណាម៖ នៅថ្ងៃចន្ទទី៩មីនា២០២០នេះអាជ្ញាធរវៀតណាមបានព្រមានថា នរណាដែលហ៊ានលាក់បាំង អំពីការឆ្លងវីរុសកូរ៉ូណាថ្មី ឬ COVID-19 នោះនឹងត្រូវប្រឈមមុខចំពោះច្បាប់ ។នេះបើតាមការចេញផ្សាយ CNA នា ។
កន្លងមកនេះប្រទេសវៀតណាមបានប្រកាស ពីការរកឃើញអ្នកជំងឺឆ្លង COVID-19 ចំនួនតែ ១៦ករណីតែប៉ុណ្ណោះ ហើយក្រុមគ្រូពេទ្យក៏បានព្យាបាលពួកគេ ឲ្យជាសះស្បើយទាំងស្រុងផងដែរ។ ប៉ុន្តែថ្មីៗនេះមានការរកឃើញបន្ថែមទៀតនូវអ្នក COVID-19 នៅលើយន្តហោះដឹកអ្នកដំណើរ ២០១នាក់ពីចក្រភពអង់គ្លេស មកកាន់ទីក្រុងហាណូយ ដែលនាំឲ្យមហាជនមានការភ្ញាក់ផ្អើល និងភ័យខ្លាច។
ក្រសួងសុខាភិបាលវៀតណាមបានប្រកាស ពីការរកឃើញអ្នកផ្ទុកវីរុស COVID-19 ចំនួនម្នាក់ទៀត ដែលវាជាករណីទី ១៧ នៅក្នុងប្រទេសអាស៊ានមួយនេះ។ អ្នកផ្ទុក COVID-19 ថ្មីដែលត្រូវបានរកឃើញនោះ គឺជាស្ត្រីជនជាតិវៀតណាមវ័យ ២៦ឆ្នាំ ដែលទើបមកពីសួរសុខទុក្ខបងប្អូននៅអង់គ្លេស រួចបន្ទាប់មកនាងក៏បានធ្វើដំណើរទៅកាន់ប្រទេសអ៉ីតាលី និងបារាំងផងដែរ ហើយទើបបកត្រឡប់មកកាន់ទីក្រុងហាណូយ នៃប្រទេសវៀតណាមវិញ។កូនស្រីអ្នកមុខជំនួញជនជាតិវៀតណាម ដែលមានឈ្មោះ Nga Nguyen ឆ្នាំអាយុ២៧ ឆ្នាំត្រូវបានគេដឹងថាបានចូលរួមការបង្ហាញម៉ូត Saint Laurent នៅទីក្រុងប៉ារីស និងGucci នៅឯមីឡាន។
គួរបញ្ជាក់ផងដែរថា នាងក៏បានបង្ហោះរាល់សកម្មភាព ដែលនាងបានចូលរួមកម្មវិធីទាំងពី រនៅលើគណនី Instagram របស់នាង ឥឡូវនេះត្រូវបាននាងបានលុបចោលទាំងអស់ភ្លាមៗ បន្ទាប់មានរឿងនេះកើតឡើង ពេលរកឃើញថាផ្ទុកវីរុស។ ដោយក្នុងនោះនាងបានធ្វើទស្សនកិច្ចនៅអឺរ៉ុប ជាមួយប្អូនស្រីរបស់នាងឈ្មោះ Nguyen Hong Nhung អាយុ ២៦ ឆ្នាំដែលបានធ្វើតេស្តិ៍រកមេរោគវិជ្ជមានដូចគ្នាផងដែរ។ បើយោងតាមសារព័ត៌មានវៀតណាម នាង Nga គឺកូនស្រីរបស់ម្ចាស់ក្រុមហ៊ុនដែកថែប ដែលមានមូលដ្ឋានរវាងប្រទេសវៀតណាម និងទីក្រុងឡុងដ៏ល្បីឈ្មោះផងដែរុំ
ស្ត្រីវ័យ ២៦ឆ្នាំខាងលើនេះត្រូវបានគេសង្ស័យថា បានចម្លងមេរោគទៅដល់មីងរបស់នាង ព្រមទាំងតៃកុងឡានផងដែរ ដែលបានបង្ខំឲ្យអាជ្ញាធរទីក្រុងហាណូយធ្វើការបិទលំនៅឋាន សណ្ឋាគារ និងមន្ទីរពេទ្យឯកជនមួយ ដែលធ្លាប់ទទួលស្វាគមន៍នាងឲ្យស្នាក់នៅ និងពិនិត្យសុខភាព។ សម្រាប់អ្នកដែលត្រូវបានរកឃើញថា មានផ្ទុក COVID-19 នៅលើជើងហោះហើរខាងលើនេះដែរនោះ គឺជាជនជាតិវៀតណាម អង់គ្លេស អៀរឡង់ និងម៉ិចស៊ីកូ ដែលសរុបទាំងអស់ ១៣នាក់។
គួរបញ្ជាក់ថា ការរកឃើញករណីឆ្លងថ្មីៗខាងលើនេះ ធ្វើឲ្យចំនួនអ្នកឆ្លងសរុបនៅវៀតណាម កើនឡើងដល់ ៣០ករណី។ អ្វីដែលគួរឲ្យកត់សម្គាល់ គ្រាន់តែបានឃើញសកម្មភាពបិទមន្ទីរពេទ្យ សណ្ឋាគារ និងលំនៅឋានមួយចំនួននោះ ប្រជាជននៅក្នុងទីក្រុងហាណូយមានការតក់ស្លុត និងសម្រុកទិញទំនិញពីហាង ព្រមទាំងទីផ្សារដោយសារតែខ្លាចការរីករាលដាល នៃវីរុសកូរ៉ូណាថ្មីនេះកាន់តែខ្លាំង។ ជុំវិញករណីនេះមានការចោទប្រកាន់ថា ព័ត៌មានអំពីការឆ្លងវីរុសថ្មី ត្រូវបានលាក់បាំង។
លោក ង្វៀន សួនហ្វុក (Nguyen Xuan Phuc) នាយករដ្ឋមន្ត្រីវៀតណាមបានប្រកាស ថា អាជ្ញាធរនឹងដាក់ទោសបណ្តាអ្នកពាក់ព័ន្ធ ដែលបានលាក់បាំងព័ត៌មាន ឬមិនព្រមរាយការណ៍អំពីការរកឃើញអ្នកផ្ទុក COVID-19 ក្រោយការធ្វើរោគវិនិច្ឆ័យ។ នៅក្នុងកិច្ចប្រជុំមួយ នៅទីក្រុងហាណូយ នាយករដ្ឋមន្ត្រីវៀតណាមបានលើកឡើងយ៉ាងដូច្នេះថា «យើងត្រូវការវិធានការរឹងមាំគ្រប់គ្រាន់ និងជាបន្ទាន់ ដើម្បីបញ្ឈប់ប្រភពនៃការចម្លងរោគ»។
