ភ្នំពេញ៖ គ្រោះថ្នាក់ចរាចរណ៍មួយបង្កឡើងដោយ រថយន្តស្ទូចមួយគ្រឿង បានបើកមកបុកនារីម្នាក់ពីក្រោយពេញទំហឹង ខណៈពេលដែលនារីរូបនោះជិះម៉ូតូធ្វើដំណើរទៅទិញបាយហូប បណ្ដាលអោយនាងស្លាប់ចោលកូនភ្លោះទាំង០២របស់នាងគួរអោយអាសូរជាទីបំផុតកាលពកាលពីវេលាម៉ោង ១២និង ១០នាទីថ្ងៃទី០៣ ខែមិនា ឆ្នាំ ២០២០ ស្ថិតនៅទល់មុខវត្តក្រាំងធ្នង់ សង្កាត់គោកឃ្លៀង ខណ្ឌសែនសុខ រាជធានីភ្នំពេញ។
នារីដែលបានស្លាប់បាត់បង់ជិវិតមានឈ្មោះ ណុន គឹមស៊ាប មានអាយុ ២៩ឆ្នាំ ។ ក្រៅពីសោកនាថកម្មខាងលើនេះអ្វីដែលគួរឲ្យសង្វេគគឺកូនប្រុសនាងបានត្រឹមថើបម្តាយលាជាចុងក្រោយដែលធ្វើឲ្យរំជួលចិត្តគ្រប់គ្នា។
ប្រភពពត៌មានបានអោយដឹងថាមុនពេលមានករណីគ្រោះថ្នាក់ចរាចរណ៍នេះកើតឡើងនារីរងគ្រោះបានជិះម៉ូតូមួយគ្រឿងទៅទិញបាយហូប ស្រាប់តែមកដល់កន្លែងកើតហេតុក៏មានរថយន្តស្ទូចមួយគ្រឿង បានបើកមកបុកនាងពីក្រោយពេញទំហឹងបណ្ដាលអោយរងរបួសធ្ងន់ ហើយត្រូវបញ្ចូនទៅសង្គ្រោះបន្ទាន់នៅឯមន្ទីរពេទ្យ តែគួរអោយស្ដាយនាងបានស្លាប់បាត់បង់ជិវិតពេលបញ្ចូនទៅដល់មន្ទីរពេទ្យ។ក្រោយពេលហេតុការណ៍នេះបានកើតឡើងសមត្ថកិច្ចក៏មកដល់ហើយធ្វើការឃាត់ខ្លួនអ្នកបើករថយន្តស្ទូចនោះ ព្រមទាំងយករថយន្តទៅរក្សាទុកនៅប៉ុស្ដិ៍ប៉ូលីសដើម្បីរង់ចាំការដោះស្រាយនៅពេលក្រោយ។ចំណែកឯសាកសពសមត្ថកិច្ចប្រគល់អោយក្រុមគ្រួសារយកទៅធ្វើបុណ្យតាមប្រពៃណីខ្មែរនៅឯស្រុកកំណើតខេត្តកំពង់ចាម។
សាច់ញាតិរបស់នារីរងគ្រោះបានធ្វើការបង្ហោះរូបភាពរបស់នារីរងគ្រោះពេញបណ្ដាញសង្គមហ្វេបុកព្រមទាំងបង្ហោះសារសោកស្ដាយចំពោះការបាត់បង់ជីវិតរបស់គាត់ទាំងវ័យក្មេងចោលកូនភ្លោះ០២នាក់អោយរស់នៅកំព្រាឯកាក្នុងវាលវដ្ដសង្សារគ្មានម៉ាក់ហៅនឹងគេ។រូបភាពមួយក្នុងចំណោមរូបភាពទាំងអស់កំពុងតែចាក់ដោតបេះដូងរបស់អ្នកប្រើប្រាស់បណ្ដាញសង្គមហ្វេបុកអោយរំជួលចិត្តទប់ទឹកភ្នែកស្ទើរតែមិនជាប់គឺរូបភាពកូនតូចរបស់គាត់ទាំង០២នាក់ ដែលជាកូនភ្លោះបានថើបម្ដាយរបស់គេ ជាលើកចុងក្រោយ មុនពេលយកសាកសពទៅបូជា ឃើញទិដ្ឋភាពនេះហើយ សែនមហាកំសត់ខ្លាំងណាស់ រកពាក្យអ្វីថ្លែងពុំបាននោះទេ។
