ថៃ៖ សារព័ត៌មាន CNN បានឲ្យដឹងថា មានករណីឆ្លងវីរុសកូរ៉ូណាថ្មីមួយទៀតត្រូវបានបញ្ជាក់ដោយក្រសួងសុខាភិបាលថៃ ដែលនាំឱ្យករណីឆ្លងសរុបក្នុងប្រទេសមាន៤៣ករណី។អ្នកជំងឺជាស្ត្រីជនជាតិថៃអាយុ២២ឆ្នាំដែលបានធ្វើការយ៉ាងជិតស្និទ្ធជាមួយក្រុមភ្ញៀវទេសចរ។ នាងក៏មានទំនាក់ទំនងជិតស្និទ្ធជាមួយអតីតអ្នកជំងឺម្នាក់ផងដែរ ដែលជាអ្នកបើកបរឡានដឹកភ្ញៀវទេសចរ។រហូតមកដល់ពេលនេះ ថៃមានស្លាប់មួយករណី។
នៅប្រទេសកូរ៉េវិញមជ្ឈមណ្ឌលគ្រប់គ្រងនិងបង្ការជំងឺឆ្លងបានឱ្យដឹងថា គិតត្រឹមថ្ងៃនេះ មានករណីឆ្លងមេរោគ COVID-19 ថ្មីចំនួន ៤៧៦ករណី ដែលរុញឱ្យករណីឆ្លងសរុបឡើងដល់ ៤,២១២ករណី ខណៈតួលេខអ្នកស្លាប់មានចំនួន២២នាក់។ ប្រភពដដែលបានឱ្យដឹងថា អ្នកជំងឺឆ្លងថ្មីចំនួន៣៧៧នាក់មកពីភាគខាងត្បូងក្រុងដេហ្គ៊ូ (Daegu) និង៦៨នាក់ផ្សេងទៀតមកពីភាគខាងជើងខេត្តខ្យឹងសាន (Gyeongsan) ហើយអ្នកជំងឺវ័យក្មេងបំផុតក្នុងប្រទេសគឺទារកម្នាក់ ដែលមានអាយុទើបតែបាន៤៥ថ្ងៃ។
សម្រាប់ស្រុកចិនដែលជាប្រទេសកើតជម្ងឺរលាកសួតបណ្តាលមកពីមេរោគកូវិដបើ គិតត្រឹមថ្ងៃចន្ទទី២មិនានេះ ចំនួនករណីឆ្លងវីរុសកូរ៉ូណា (COVID-19) សរុបមាន៨៩,០០២នាក់ ខណៈមានអ្នកជំងឺសរុប៤៤,៨៩៥នាក់បានជាសះស្បើយពីមេរោគ និងអនុញ្ញាតឱ្យត្រឡប់ទៅគេហដ្ឋានវិញ។ឯចំនួនអ្នកស្លាប់សរុបមាន៣,០៤៤នាក់។
សំណាងស្រុកខ្មែរយើងមិនបានរកឃើញករណីអ្នកឆ្លងវីរុសកូវីដ១៩ (Covid-19) ថ្មីទៀតនៅឡើយទេ ក្រៅតែករណីជនជាតិចិនម្នាក់នៅខេត្តព្រះសីហនុរកឃើញកាលពីថ្ងៃទី២៧ ខែមករា ឆ្នាំ២០២០ ហើយបុរសរូបនេះបានជាសះស្បើយ និងបានវិលត្រឡប់ទៅប្រទេសកំណើតវិញហើយដែរ ក្រោយពីក្រសួងបានអនុញ្ញាតឲ្យចាកចេញេពីមន្ទីរពេទ្យនៅថ្ងៃទី១០ ខែកុម្ភៈ ឆ្នាំ២០២០។។
បន្ទាប់ពីបានរៀបចំធ្វើសន្និសីទកាសែតនៅរសៀលថ្ងៃទី២ ខែមីនានេះ ក្រសួងសុខាភិបាល អង្គការសុខភាពពិភពលោក និងវិទ្យាស្ថានប៉ាស្ទ័របានចេញសេចក្តីប្រកាសព័ត៌មានមួយដោយបញ្ជាក់ថា វិទ្យាស្ថានប៉ាស្ទ័រកម្ពុជា បានធ្វើតេស្តសំណាកបុគ្គលដែលសង្ស័យសរុបចំនួន ១៣៥នាក់ គិតត្រឹមថ្ងៃទី២ ខែមីនា ឆ្នាំ២០២០ តែមិនមានរកឃើញអ្នកណាម្នាក់ នៅក្នុងប្រទេសកម្ពុជា មានវីរុសកូវីដ១៩ ក្រសួងសុខាភិបាលបានដាក់ចេញវិធានការឆ្លើយតប ការការពារ និងការត្រៀមអន្តរាគមន៍លើការចម្លងជំងឺកូវីដ១៩ ចំនួន១៤ចំណុចផងដែរ៕