ភ្នំពេញ ៖ ក្រសួងមិនមានការលាក់លៀមព័ត៌មានរឿងជំងឺកូរ៉ូណាថ្មី ឬកូវីដ១៩ទេ ព្រោះការងារនេះ ក្រសួងតែងតែសហការជាមួយអង្គការសុខភាព និងវិទ្យាស្ថានប៉ាស្ទ័រកម្ពុជា។
នៅក្នុងពិធីបើកវគ្គបណ្ដុះបណ្ដាលដល់អ្នកសារព័ត៌មាន កាលពីរសៀលថ្ងៃទី២៨កុម្ភៈលោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានមានប្រសាសន៍ឲ្យដឹងថា «ខ្ញុំសូមបញ្ជាក់ដល់សាធារណជនឲ្យបានច្បាស់ថា ក្រសួងសុខាភិបាល មិនមានការលាក់លៀមរឿងព័ត៌មានជំងឺកូវីដ១៩នេះទេ ហើយក៏មិនមានមូលហេតុអ្វីដែលក្រសួងត្រូវធ្វើបែបនេះដែរពោលគឺមានតែបើកទូលាយរឿងនេះដល់ប្រជាពលរដ្ឋថែមទៀតផង ដើម្បីឲ្យយើងទាំងអស់គ្នាមានការប្រុងប្រយ័ត្ន និងការពារខ្លួនកុំឲ្យឆ្លងជំងឺនេះ។ ជាក់ស្តែងជួនកាលក្រសួងត្រូវចេញសេចក្តីជូនព័ត៌មាន២ដង ក៏មានដែរ ក្នុង១ថ្ងៃ»។
លោកស្រីវេជ្ជបណ្ឌិតបានលើកជាសំណួរថា «ហេតុអ្វីបានជាមានអ្នកលេងបណ្តាញសង្គមមួយចំនួនចេះតែបង្ហោះរឿងព័ត៌មានក្លែងក្លាយ ឬមិនពិត ដែលធ្វើឲ្យមហាជនមានការភ័ន្តច្រឡំ ហើយការធ្វើបែបនេះបានផលប្រយោជន៍អី និងមានចំណេញអីសម្រាប់ប្រទេសជាតិយើង»។
ពាក់ព័ន្ធទៅនឹង មានការដួលសន្លប់ និងស្លាប់ជនបរទេសមួយចំនួនជាំបន្តបន្ទាប់នៅភ្នំពេញខេត្តព្រះសីហនុនិងខេត្តសៀមរាបដែលមានការលើកឡើងថាមកពីជំងឺកូវីដ១៩ លោកស្រីវេជ្ជបណ្ឌិតបានបញ្ជាក់ថា ទាំងនេះ ជាព័ត៌មានក្លែងក្លាយទាំងស្រុងព្រោះថាករណីស្លាប់ជនបរទេសទាំងនោះ គឺបណ្តាលមកពីសុខភាពផ្ទាល់ខ្លួនរបស់គាត់ទេដូចជាជំងឺលើសឈាម និងគាំងបេះដូងជាដើម វាមិនមែនបណ្តាលមកពីជំងឺកូវីដ១៩ទេ។
លោកស្រីវេជ្ជបណ្ឌិត បានស្នើឲ្យគ្រប់ភាគី និងគ្រប់និន្នាការទាំងអស់ សូមចូលរួមទាំងអស់គ្នាដើម្បីទប់ស្កាត់កុំឲ្យជំងឺនេះឆ្លងមកកម្ពុជា បើទោះបីជាកម្ពុជានៅមិនទាន់រកឃើញមានប្រជាពលរដ្ឋណាម្នាក់ឆ្លងជំងឺកូវីដ១៩នេះក្តី ក៏យើងមិនត្រូវភ្លេចខ្លួនដែរ គឺត្រូវតែបន្តប្រុងប្រយ័ត្នខ្ពស់ និងត្រៀមវិធានការថ្មីៗបន្ថែមទៀត ពិសេសបង្កើនការអប់រំស្ដីពីវិធានការការពារកុំឲ្យឆ្លងជំងឺនេះ។ ពេលឃើញព័ត៌មានណាដែលក្លែងក្លាយមិនពិតសុំកុំស៊ែរបន្តទៀត ព្រោះធ្វើឲ្យមហាជនមានការភ័ន្តច្រឡំ។
លោកស្រីវេជ្ជបណ្ឌិត បានស្នើឲ្យអ្នកសារព័ត៌មានចូលរួមផ្សព្វផ្សាយព័ត៌មានដែលត្រឹមត្រូវពិត និងច្បាស់លាស់ទាក់ទិននឹងជំងឺកូវីដ១៩នេះដល់មហាជន ដើម្បីលុបបំបាត់ព័ត៌មានក្លែងក្លាយដែលធ្វើឲ្យប៉ះពាល់សង្គមយ៉ាងខ្លាំង។លោកស្រីវេជ្ជបណ្ឌិត លី អាយឡាន មន្ត្រីអង្គការសុខភាពពិភពលោក បានមានប្រសាសន៍ថា «ស្រម័យមើលបើការសរសេរអត្ថបទមួយដែលមិនមានការផ្ទៀងផ្ទាត់ឲ្យបានត្រឹមត្រូវនោះ វានឹងធ្វើឲ្យប៉ះពាល់ដល់សុខភាពខ្លាំងណាស់»។
លោកស្រីវេជ្ជបណ្ឌិតបានបន្ថែមថា អង្គការសុខភាពពិភពលោក និងក្រសួងសុខាភិបាល តែងតែធ្វើការជាមួយគ្នាយ៉ាងជិតស្និទ្ធ ដើម្បីផ្តល់ព័ត៌មានត្រឹមត្រូវដល់ប្រជាពលរដ្ឋស្ដីពីជំងឺកូវីដ១៩នេះដើម្បីការពារខ្លួនគេ និងក្រុមគ្រួសារឲ្យចៀសផុតពីជំងឺនេះមកប្រទេសកម្ពុជា។