អ៊ីរ៉ង់៖ លោកស្រីម៉ាស៊ូម៉េអេតេកា( Masoumeh Ebtekar)អនុប្រធានាធិបតីរបស់អ៉ីរ៉ង់ ត្រូវបានធ្វើតេស្តរកឃើញថា ឆ្លងជំងឺ COVID-19 ដែលបានផ្តាច់ជីវិតប្រជាពលរដ្ឋអ៊ីរ៉ាងកើនដល់២៦នាក់ហើយ ។ នេះបើតាមការដកស្រង់ការផ្សាយចេញពី សារព័ត៌មាន CGTN នៅថ្ងៃព្រហស្បតិ៍ ទី២៧ ខែកុម្ភៈ ឆ្នាំ២០២០។
លោកស្រីអេតេកា( Ebtekar) គឺជាអនុប្រធានាធិបតីអ៉ីរ៉ង់ទទួលបន្ទុកកិច្ចការស្ត្រីនិងគ្រួសារ។ ក្នុងថ្ងៃដដែលនេះ ក៏មានព័ត៌មានដែរថា លោក Mojtaba Zonnour ដែលជាប្រធានគណៈកម្មការគោលនយោបាយការបរទេស និងសន្តិសុខជាតិនៃសភាអ៉ីរ៉ង់ ក៏បានឆ្លងផងដែរ បន្ទាប់ពីអនុរដ្ឋមន្ត្រីសុខាភិបាលអ៉ីរ៉ង់ លោក Iraj Harirchi ត្រូវបានធ្វើតេស្តរកឃើញថា មានជំងឺនេះ កាលពីថ្ងៃអង្គារ៍។
គួរជម្រាបថា បើតាមអាជ្ញាធរអ៉ីរ៉ង់ គិតត្រឹមថ្ងៃព្រហស្បតិ៍នេះ ក្នុងប្រទេសអ៉ីរ៉ង់មានអ្នកឆ្លងជំងឺ COVID-19 សរុបកើនដល់២៤៥នាក់ ហើយក្នុងនោះមាន២៦នាក់បានបាត់បង់ជីវិត ខណៈអ៉ីរ៉ង់បានរកឃើញករណីដំបូងបំផុតនៃអ្នកឆ្លង នៅទីក្រុង Qom ភាគកណ្តាល ប្រទេសកាលពីថ្ងៃទី១៨ ខែកុម្ភៈ។
ទាក់ទងនិងបញ្ហាមេរោករាតត្បាត COVID-19 អាជ្ញាធរអារ៉ាប៊ីសាអ៊ូឌីតបានប្រកាសផ្អាក ការផ្តល់ជូនទិដ្ឋាការពិសេស អឺមរ៉ាហ៍ (Umrah) ជាបណ្តោះអាសន្នទៅដល់ជនបរទេសនានា (សាសនិកឥស្លាម) ចូលមកធ្វើបុណ្យនៅឯទីក្រុងមឹកកៈ (Mecca) និងមាឌីណៈ (Madina) ដែលជាទីសក្ការៈធំបំផុតទាំងពីររបស់សាសនិកឥស្លាម ដើម្បីទប់ស្កាត់ការរាតត្បាតជំងឺ COVID-19។ នេះបើតាមការចេញផ្សាយ ដោយសារព័ត៌មាន Franch24 នាយប់ថ្ងៃព្រហស្បតិ៍ ទី២៧ ខែកុម្ភៈ ឆ្នាំ២០២០។
ក្រសួងការបរទេសអារ៉ាប៊ីសាអ៊ូឌីតបានគូសបញ្ជាក់ថា ក្រសួងកំពុងរៀបចំផ្អាកទិដ្ឋការសម្រាប់ភ្ញៀវទេសចរទាំងអស់ ដែលមកពីបណ្តាប្រទេសនានាដែលកំពុងតែរងនូវការវាយប្រហារ ដោយវីរុសដ៏កាចសាហាវ COVID-19។ គួរបញ្ជាក់ថា ទិដ្ឋាការ Umrah គឺជាទិដ្ឋាការពិសេសម្យ៉ាង ដែលអារ៉ាប៊ីសាអ៊ូឌីតជាម្ចាស់ទឹកម្ចាស់ដី នៃទីក្រុងដ៏ពិសិដ្ឋបំផុតទាំងពីររបស់បណ្តាអ្នកកាន់សាសនាឥស្លាម នៅទូទាំងសកលលោក ផ្តល់ជូនសាសនិកឥស្លាម ដើម្បីចូលមកទស្សនាទីក្រុងទាំងពីរខាងលើ ក្នុងន័យគោរពទីសក្ការៈតាមបែបសាសនាឥស្លាម។
