ភ្នំពេញ៖ រហូតមកដល់ម៉ោងជាង៨យប់ថ្ងៃទី២៥ ខែកុម្ភៈ ឆ្នាំ២០២០នេះ អគ្គិភ័យឆេះផ្ទះប្រជាពលរដ្ឋ នៅក្បែរស្ពានជ្រោយចង្វារ ស្ថិតក្នុងខណ្ឌដូនពេញ រាជធានីភ្នំពេញ បានរលត់ទាំងស្រុងទៅវិញហើយ ក្រោយប្រើតឹករំលត់អស់ជា១០០ឡាន។
ទោះជាយ៉ាងណាក្នុងហេតុការណ៍គ្រោះអគ្គិភ័យនេះ បានបំផ្លាញផ្ទះប្រជាពលរដ្ឋអស់១២ខ្នង ខណៈកម្លាំងសមត្ថកិច្ចបានប្រើប្រាស់ឡានទឹក ចំនួន៤៦គ្រឿង ប្រើទឹកអស់ជាង១០០ឡានទើបអាចគ្រប់គ្រងបានទាំងស្រុង។
សូមបញ្ជាក់ថាកាលពីវេលាម៉ោង ៩និង២០នាទីថ្ងៃទី២៥ ខែកុម្ភៈ ឆ្នាំ២០២០ នៅតាមបណ្តោយផ្លូវរថភ្លើងកែង និងលេខ៧០ ស្ថិតក្នុងក្រុម១ភូមិបាក់ទូកសង្កាត់ទួលសង្កែទី១ខណ្ឌឫស្សីកែវ រាជធានីភ្នំពេញផ្ទះឈើប្រក់ស័ង្កសីចំនួន១៥ខ្នង ត្រូវបានអគ្គីភ័យឆាបឆេះអស់គ្មានសល់ ។
អាជ្ញាធរសង្កាត់ខណ្ឌនិងសមត្ថកិច្ចចម្រុះបានប្រញ៉ាប់ប្រញ៉ាល់ហៅរថយន្តពន្លត់អគ្គិភ័យចុះជួយអន្តរាគមន៍ដោយប្រើប្រាស់រថយន្តពន្លត់និងបង្ការអគ្គីភ័យអស់ជាច្រើនគ្រឿងជាមួយនឹងកម្លាំងអាជ្ញាធរសមត្ថកិច្ចជួយអន្តរាគមន៍ធ្វើឲ្យអគ្គីភ័យរលត់ទៅវិញក្នុងរយៈពេលប្រមាណជាង១ម៉ោងក្រោយមក។ប៉ុន្តែគួរឲ្យអាណោចអាធ័មណាស់ក្រោយអគ្គិភ័យរលត់ទាំងស្រុងនោះគេបានប្រទះឃើញសាកសពស្ត្រីម្នាក់ស្លាប់ដោយឆេះខ្លោចមើលមិនយល់ ហើយដែលគេស្គាល់ថា ស្ត្រីរងគ្រោះឈ្មោះ អម ស្រីមុំ អាយុ៣៥ឆ្នាំ ស្នាក់នៅក្នុងបន្ទប់ផ្ទះជួលដែលឆេះនោះ។
របាយការណ៍បឋមស្តីពីករណីអគ្គីភ័យឆាបឆេះផ្ទះគឺបណ្តាលអោយឆេះផ្ទះអស់ចំនួន១៥ខ្នងផ្ទះ និង៨០បន្ទប់ជួលដែលមូលហេតុដំបូងគឺគេដាក់ការសង្ស័យថាបណ្តាលមកពីផ្ទុះកំប៉ុងហ្គាស ពេលកំពុងដាំសម្លរ ទើបបង្កជាអគ្គិភ័យឆាបឆេះបែបនេះ ។
សូមរំលឹកថា ផ្ទះប្រជាពលរដ្ឋអមតាមផ្លូវរថភ្លើងសង់ពីឈើប្រក់ស័ង្កសី១៦ល្វែងប្រមាណជា១៦៥បន្ទប់ ស្មើ ១៦៥គ្រួសារ ត្រូវ អគ្គិភ័យ ឆាបឆេះអស់ទាំងស្រុងកាលពីវេលាម៉ោង១ និង៣០នាទីយប់រំលងអធ្រាត្រឈានចូលថ្ងៃទី៦ ខែមករា ឆ្នាំ២០២០ កន្លងទៅ ។