ប្រទេសអ៊ីរ៉ង់ ៖ អនុរដ្ឋមន្ត្រីក្រសួងសុខាភិបាលរបស់ប្រទេសអ៊ីរ៉ង់បានឆ្លងនូវជំងឺរលាកសួតថ្មីបង្កឡើងដោយមេរោគកូរ៉ូណាថ្មី ឬ covid-19 ចំពេលដែលប្រទេសអ៊ីរ៉ង់កំពុងតែមានការឆ្លងរាលដាលជំងឺនេះ។
ទីភ្នាក់ងារពត៍មានបារាំងAFP កាលពីថ្ងៃទី២៥ ខែកុម្ភ: ឆ្នាំ២០២០បានឲ្យដឹងថាតាមរយៈបណ្ដាញទំនាក់ទំនងសង្គម twitter លោកអាលីរ៉េហ្សាវ៉ាហាហ្សាដេ( Alireza Vahabzadeh )ទីប្រឹក្សាព័ត៌មានរបស់រដ្ឋមន្ត្រីក្រសួងសុខាភិបាលអ៊ីរ៉ង់បានបញ្ជាក់ថា ការធ្វើតេស្តមេរោគចំពោះរូបលោកឧបការីរដ្ឋមន្ត្រីក្រសួងសុខាភិបាល Harirchi ដែលជាអ្នកឈានមុខគេនៅក្នុងការប្រយុទ្ធប្រឆាំងជំងឺ covid-19 នោះ លទ្ធផល”វិជ្ជមាន” ។
ប្រភពបានបញ្ជាក់ថា លោក Iraj Harirchi មានអាការៈក្អកជាប្រចាំ ហើយមានបែកញើសអំឡុងពេលធ្វើសន្និសីទកាសែតមួយកាលពីថ្ងៃទី២៤ ខែកុម្ភៈ ឆ្នាំ២០២០ ជាមួយអ្នកនាំពាក្យរដ្ឋាភិបាល Ali Rabiei ។នៅក្នុងអំឡុងពេលធ្វើសន្និសីទកាសែតនោះ លោក Harirchi បានបដិសេធការលើកឡើងរបស់សមាជិកសភាអ៊ីរ៉ង់ដែលបានអះអាងថា មនុស្សជាង ៥០អ្នកបានស្លាប់ដោយសារតែជំងឺ covid-19 ស្ថិតនៅទីក្រុង Qom ។ លោក Harirchi បានអះអាងថា លោកនឹងលាលែងចេញពីតំណែង បើសិនការលើកឡើងរបស់អ្នកតំណាងរាស្ត្រពិតជាត្រឹមត្រូវប្រាកដមែននោះ។
នៅថ្ងៃទី២៥ ខែកុម្ភ: ឆ្នាំ២០២០ អ៊ីរ៉ង់បានបញ្ជាក់ថាអ្នកជំងឺ៣នាក់បន្ថែមទៀតបានបាត់បង់ជីវិតដោយសារតែជំងឺកូណាថ្មីឬ covid-19 និងមានអ្នកឆ្លងថ្មីចំនួន៣៤ករណី ធ្វើឱ្យនៅទូទាំងប្រទេសមានអ្នកស្លាប់ដោយសារជំងឺនេះចំនួន១៥នាក់ និងឆ្លងសរុប៩៥នាក់ហើយ។
សូមបញ្ជាក់ថានៅប្រទេសកូរ៉េខាងត្បូងចំនួនអ្នកឆ្លងជំងឺCovid-19 បានកើនឡើងដល់ជិត៩០០នាក់ហើយ ដែលធ្វើឲ្យប្រទេសនេះប្រកាសអាសន្នកម្រិតខ្ពស់ ខណៈអ្នកស្លាប់កើនឡើងដល់ជិត១០នាក់។ តាមពីក្រោយក៉ូរ៉េគឺប្រទេសជប៉ុនក៏កំពុងតែរាលដាលខ្លាំងប្រហាក់ប្រហែលគ្នានេះដែរ ខណៈនៅចិនដែលជាប្រទេសដើមចមហាក់ដូចជានៅទ្រឹងទៅវិញ។ ប៉ុន្តែអ្នកស្លាប់បានកើនឡើងដល់ ២ ៦៦៣នាក់ និងអ្នកដែលបានឆ្លងជំងឺនេះកើនដល់ ៧៧ ៦៥៨នាក់។ អង្គការសុខភាពពិភពលោក (WHO) បានប្រកាសជាថ្មីនៅថ្ងៃទី២៥កុម្ភៈថា ពិភពលោកគួរតែត្រៀមលក្ខណៈឲ្យរួចជាស្រេចដើម្បីប្រឈមមុខនឹងលទ្ធភាពផ្ទុះឡើងនៃជំងឺ COVID-19 ដែលក្លាយទៅជាជំងឺរាតត្បាតជាសកលនេះ៕
